پاکستانی سارے جان دے نیں پر….

لکھت:عتیق انور راجا

پاکستان وہ دیس اے جہدے شہری ہر مسئلے دا حل جاندے نیں۔ روز صبح سویرے اجہے پیغامات دی بھرمار موبائل فون تے حملہ آور ہوندی اے کہ جیویں کوئی بیماری بیماری ای نہیں سگوں ہر بیماری دا سوفیصد حل میرے دیس دے ہر بندے دے ہتھاں وچ اے۔ انج لگدا اے کہ میرے پاکستانی دنیا دے مسئلیاں نوں دنیا توں کدھرے بہتر جان دے نیں۔چین وچ کرونا وائرس دی وبا پھیلنا شروع ہوئی تے چین تے دنیا دے سارے ملک ایس وائرس توں بچن لئی احتیاطی تدابیر تلاش کرنا شروع ہو گئے۔ کہندے نیں چین وچ راتوں رات اک بہت وڈا ہسپتال کھڑا کر دتا گیا جہڑا چینی لوکاں دی مہارت دا منہ بولدا ثبوت اے پر ہر جدت دے بعد ہر سائنسی تحقیق دے بعد دنیا دے سارے ملک قدرت دے اگے بے بس ہو جاندے نیں۔ اسیں ٹی وی تے ویکھنے آں کہ ہر ورھے یورپ تے خاص کر امریکہ وچ سمندری طوفان تباہی و بربادی مچا دیندا اے پر اپنے آپ نوں دنیا دی سپر پاور سمجھن والا امریکہ ایس قدرتی آفت دے ساہمنے بے بس ہو جاندا اے۔ چین دا وی ایہو حال ہویا اے۔ چین وی اج دنیا دی اک وڈی طاقت بن کے ساہمنے آ چکیا اے پر خدا جدوں چاہندا اے کہ کہدی صدا بلند کردا اے تے دنیا نوں ہلا کے رکھ دیندا اے۔ جدوں توں چین وچ کرونا وائرس دی وبا پھیلی اے میرے دیس وچ میڈیا خاص کر سوشل میڈیا تے ایہدے توں بچاؤ دے سینکڑاں علاج دسے جا رہے نیں۔ اجہے اجہے علاج کہ بندہ سوچ کے پریشان ہو جاوے۔ دنیا وچ ایمانداری وچ 120ویں نمبر تے آن والے پاکستانی ایمان دی طاقت نال ایس وباء توں بچ نکلن لئی وظیفے بیان کردے نیں تے کدی دوجے طریقیاں نال اپنی قابلیت دا اظہار کردے نیں۔ فیر مینوں حیرت ہوندی اے کہ میرے دیس دے لوک سب جاندیاں ہوئیاں اپنے آپ نوں بدلن دی کوشش کیوں نہیں کردے۔ یعنی پاکستانی جاندے نیں کہ دنیا وچ ترقی لئی ہر شہری نوں ایمانداری نال محنت کرنی پیندی اے پر بہت سارے پاکستانی محنت دی بجائے چور دروازیاں توں اگے ودھن دی کوشش کردے نیں۔ پاکستانی جاندے نیں کہ ترقی لئی ملکی معیشت دا مضبوط ہونا ضروری ہوندا اے پر بہت سارے پاکستانی ملکی معیشت وچ اپنا کوئی کردار ادا کرن نوں تیار نہیں۔پاکستانی جاندے نیں کہ ترقی یافتہ ملکاں وچ ہر شہری سرکار نوں ٹیکس دیندا اے پر پاکستان دا ہر دوجا شہری سرکار نوں ٹیکس دین دی بجائے ٹیکس توں بچن لئی متبادل راہ لبھدا رہندا اے۔ پاکستان دے لوک جاندے نیں جدوں تک مزدور خوشحال نہ ہووے، اوہ دل نال محنت نہیں کردا تے محنت نہ کرن نال کارخانے تے فیکٹریاں کدی ویلے سر اجناس تیار نہیں کر سکدیاں پر پاکستانی کارخانیاں فیکٹریاں وچ مزدور نوں کوئی پوری مزدوری دین نوں تیار نہیں اے۔ پاکستانی جاندے نیں کہ سب دا رازق اللہ پاک اے پر ایتھوں دی اکثریت چور بازار، منافع خور، ملاوٹ تے چنگا مال وکھا کے غلط مال ویچن والیاں دی اے۔ پاکستانی جان دے نیں قنون ایہناں دی حفاظت لئی بنائے جاندے نیں پر پاکستانی قنون تے عمل کرن دی کوشش نہیں کردے۔ عام پاکستانی جاندے نیں کہ ہیلمٹ ایہناں دی جان بچان دے کم آندا اے پر ایتھے موٹرسائیکل چلان والے ہیلمٹ پاؤن دی بجائے پلس توں بچ بچا کے نکلن دی کوشش کردے نیں۔ پاکستانی جاندے نیں کہ سڑک، گڈی اپنی لائن وچ چلان، سجے کھبے مڑدیاں ویلے اشارے استعمال کرن نال حادثیاں توں بچیا جا سکدا اے پر پاکستانیاں دی اکثریت سڑک تے انھے واہ گڈیاں دوڑا رہی ہوندی اے۔ پاکستانی جاندے نیں کہ جرم سرزد ہون تے قانون نال تعاون کرنا چاہیدا اے پر ایتھے ملزم قنون دے شکنجے وچ آن توں پہلاں کسے نوں فون ملا کے پلس افسراں دے کناں نال لا کے جان چھڈان دی کوشش کردے نیں۔پاکستانی جاندے نیں کہ ایس دیس دے وڈے لیڈراں دے بچے دوجے ملکاں دے شہری بن جاندے نیں اوہناں دا کاروبار اوہناں دی شادیاں باہر ملکاں وچ ہوندیاں نیں پر پاکستانی ایہناں سیاستداناں دے اگے بھنگڑے وی پاندے رہندے نیں۔ پاکستانی جاندے نیں کہ ایس دیس دا ہر سیاستدان تے ہر دوجا وڈا افسر دوران ملازمت بیرون ملک جائیداداں بنا رہیا اے پر پاکستانی فیر وی ایہناں سیاستداناں تے افسراں نوں جھک جھک کے سلام کردے نیں۔ موت دا اک دن مقرر اے تے جدوں اوہ ویلا آ جانا اے تے کوئی تدبیر کوئی حفاظتی اقدام تے کوئی وظیفہ ایہنوں ٹال نہیں سکدا اے۔ سوشل میڈیا تے کسے وی قسم دے پیغامات گھلن دی بجائے بہتر ہووے کہ میرے ملک دے ہونہار لوک آپ کوئی کتاب پڑھن تے اپنے نال جڑے لوکاں لئی آسانیاں تلاش کرن دی کوشش کرن۔ مینوں شدت نال احساس ہو رہیا اے میرے دیس دے زیادہ لوکاں نوں سوشل میڈیا دی اہمیت دا پتہ ای نہیں اے ساڈے وچوں بہت سارے لوک سوشل میڈیا دا استعمال صرف وقت گزاری لئی تے نویں نویں دوست بنان لئی کردے نیں۔