بھارتی انتہاپسندی تے عالمی دنیا دی بے بسی!

لکھت:شاہد ندیم احمد

بھارت وچ مسلم کش فسادات جاری نیں، مسلماناں نوں تشدد دا نشانہ بنان، املاک ساڑن دا سلسلہ رُکن دا ناں نہیں لے رہیا، بھارتی غنڈے جتھے تے جہڑے ویلے بپھردے نیں، مسلماناں دی جاناں تے املاک نوں تہس نہس کر دیندے نیں، کجھ دن وچ ہندوواں دے پرتشدد واقعات وچ ہن تک درجناں مسلمان شہید ہو چکے نیں جو مہذب ہون دی دعویدار دنیا دے منہ تے طمانچہ اے۔ عالمی برادری سوائے مذمتاں تے زبانی ردعمل دے عملی طور تے کجھ کرن نوں تیار نہیں، اقوام متحدہ نے فیر عالم اسلام بارے اپنی پالیسی دے مطابق بیان دتا کہ بھارت مسلماناں دے تحفظ لئی اقدامات کرے۔ حیرت اے کہ بھارت ایناں منہ زور ہو چکیا اے کہ مودی امریکی صدر ٹرمپ دی کوئی گل منن نوں تیار اے نہ انتہا پسند ہندو حکومت اپنے ’’ہندوتوا‘‘ ایجنڈے توں اک انچ پچھے ہٹن نوں راضی اے۔ اقوام متحدہ سنے ساری عالمی تنظیماں تے ادارے بھارت دے متنازعہ قنون شہریت نوں ایشیا وچ امن دشمنی تے بنیادی حقوق دی تلفی دی بنیاد قرار دے رہے نیں پر بھارت اپنی ضد توں ہٹن نوں تیار نہیں تے فیر کیہ اقوام متحدہ، سلامتی کونسل، ایف اے ٹی ایف سنے سارے عالمی اداریاں دے قوانین صرف پاکستان تے دوجے اسلامی ملکاں لئی ای نیں؟ اسلامی دہشت گردی دا پوری دنیا وچ کدھرے ناں و نشان نہیں، ایہ صرف اسلام دشمن ذہناں دی اختراع تے اسلام فوبیا اے۔ بھارت وچ جہڑا ظلم دا بازار گرم اے، اپنے ای دیس دی زمین جیویں اقلیتاں تے تنگ کیتا جا رہیا اے، اوہنوں ہندو انتہا پسندی قرار دینا اعتراف حقیقت تے متاثرین دے نال اظہار یکجہتی نہیں؟دنیا نوں دوہرا معیار ترک تے منافقت دا لبادہ لاہ کے بھارت وچ سسکدی تے دم توڑدی انسانیت نوں بچانا ہووے گا۔ایہدے وچ شک نہیں کہ عالمی دنیا دے مفادات بھارت دے نال جڑے نیں، ایس لئی بھارت دے جارحانہ اقدامات تے وی دنیا دی بے حسی نظر آندی اے، پر ہن کجھ ممالک بھارتی مسلماناں تے کیتے جان والے مظالم تے آواز بلند کرن لگے نیں۔ بھانویں زیادہ تر بھارتی میڈیا مودی سرکار دے کنٹرول وچ اے، پر کجھ وی بول پیندے نیں کہ حالیہ فسادات 2002ء گجرات فسادات توں وی ودھ منظم طور تے کیتے جا رہے نیں۔ اوس ویلے مودی تے امیت شاہ صرف گجرات تے اختیارات رکھدے سن، اوہناں نے مسلماناں دی املاک نوں نذرآتش کیتا تے بے دریغ نہتے مسلماناں دا قتل عام کیتا، جد کہ ہن اوہناں نوں بے پناہ اختیارات حاصل نیں، ایس لئی مودی سرکار تے امیت شاہ نے باقاعدہ منظم منصوبہ بندی نال دہلی دے باہر فسادیاں، بلوائیاں تے ہندو دہشت گرداں نوں سد کے فسادات کرائے جہنوں بعدوح تشدد دا ناں دتا گیا اے۔ بھارتی میڈیا نوں ویکھیا جاوے تے اوہ وی مودی دے زیر سایہ اے، ہر کوئی مودی دے گیت گاندا اے ، پر میڈیا دے بعض حلقیاں نے ایہناں مظالم تے وی آواز بلند کیتی اے تے ہندو انتہا پسنداں دے مسلماناں تے بہیمانہ حملیاں دے طریقیاں نوں نازی جرمنی توں وی جدید قرار دتا اے۔ اوہناں نے مودی تے بی جے پی تے تنقید کردیاں آکھیا سانوں گیس چیمبراں دی لوڑ نہیں، اسیں انساناں نوں سینکن لئی گھراں نوں تندروراں وچ بدل دینے آں۔ بھارتی میڈیا دی اکثریت یکطرفہ طور تے رپورٹنگ کر رہی اے، پر سوشل میڈیا نے مودی سرکار دی چالاں توں عالمی برادری نوں آگاہ کیتا اے کہ دہلی پلس آپ حملہ آوراں دی مدد کردی نظر آئی اے، کیوں جے اکثر بلوائی نئی دہلی دے راستیاں توں وی واقف نہیں سن، جد کہ دہلی پلس اوہناں نوں راستیاں توں آگاہ کردی رہی اے۔دہلی پلس دے کول وسیع اختیارات سن، جے اوہ چاہندے تے کجھ گھنٹیاں وچ حالات تے قابو پا سکدے سن، پر گجرات فسادات دی طرح پلس نے ہندو دہشت گرداں نوں ایتھے وی فری ہینڈ دتا اے۔ دہلی دے وزیراعلیٰ کیجروال وی ہندوواں دی طرفداری کردے نظر آندے نیں، حالاں جے دہلی دے مسلماناں نے اوہناں نوں ووٹ دے کے تیجی واری وزیراعلیٰ دے منصب تے فائز کیتا، پر اوہناں نے 24فروری دے بعد توں اجے تک متاثرہ علاقیاں دا دورہ کرکے جانی تے مالی نقصان دی تلافی لئی کوئی وی اعلان نہیں کیتا، جو اوہناں دی جانبداری نوں ظاہر کردا اے۔اقوام متحدہ شورش زدہ ملکاں وچ امن فوج گھل کے اوتھوں دے لوکاں دے جان و مال دی حفاظت نوں یقینی بناندی اے۔ ایس ویلے مقبوضہ کشمیر تے بھارت وچ دوواں ای تھاواں تے بھارتی حکومت اقلیتاں تے عرصہ حیات تنگ کیتے ہوئے اے۔ ایس لئی اقوام متحدہ دی ذمہ داری بن دی اے کہ اوہ اجہے علاقیاں وچ امن فوج تعینات کرکے اوتھوں دے مظلوماں دی حفاظت وی یقینی بناوے۔ دہلی فسادات امریکی صدر ڈونلڈ ٹرمپ دی بھارت وچ موجودگی دے ویلے شروع ہوئے، جد کہ امریکہ ایہدی کئی واری مذمت وی کر چکیا اے، پر صرف مذمت کافی نہیں ہووے گی، امریکہ نے جیویں گجرات فسادات دے امریکہ داخلے تے پابندی لاگو کیتی سی، ہن وی امیت شاہ تے اوہدے آلے دوالے موجود بلوائیاں دے خلاف اجہی کاروائی نوں یقینی بناوے، تاں جے مستقبل وچ اجہے واقعات توں بچیا جا سکے۔ جے عالمی برادری نے انج ای چپ وٹ رکھی تے فیر مودی دے دور اقتدار وچ اقلیتاں تے بدترین حالات آن گے، ایس لئی انسانی حقوق دی تنظیماں، او آئی سی، عرب لیگ سنے خطے دے دوجے ملکاں نوں ایہدا نوٹس لینا ہووے گا تاں جے انسانیت دا قتل عام روکیا جا سکے۔ مقبوضہ کشمیر دے حالات وی دن بدن خراب ہوندے جا رہے نیں، بھارت نے فوج دے اضافی دستیاں نوں ہور وادی وچ رکھن د ا فیصلہ کیتا اے۔ خصوصی حیثیت دے خاتمے توں پہلاں عارضی طور تے مقبوضہ وادی وچ گھلے جان والے ہزاراں فوجیاں نوں اجے تک واپس نہیں بلایا جا رہیا، جہدا مقصد کشمیریاں دی صدائے احتجاج نوں دبا کے رکھنا اے۔بھارت وچ انتہا پسندی سر چڑھ کے بولدیاں بولدیاں ہن انسانیت نوں بری طرح روند رہی اے، مقبوضہ وادی دے محاصرے نوں 212دن لنگھ چکے نیں، صرف فروری 2020ء، وچ 10نوجواناں نوں شہید کیتا گیا اے، جد کہ ایس توں پہلاں ہزاراں بندیاں نوں شہید کیتا جا چکیا اے۔ مقبوضہ کشمیر اک الارمنگ صورتحال اختیار کر چکیا اے، بھارت کرفیو دے نفاذ نال کشمیریاں دی جدوجہد آزادی نوں دبا نہیں سکدا، ایس خطے وچ اک لاوا اُبل رہیا اے، ایہ جس دیہاڑ پُھٹ پیا، سب کجھ ایہدے وچ روڑھ جاوے گا۔ کشمیری الحاق پاکستان دے مشن تے ڈٹے ہوئے نیں تے خون دے آخری قطرہ تک جدوجہد آزادی جاری رکھن دے عزم تے قائم نیں۔ پاکستانی حکومت ، جرات و جوانمردی دا استعارہ پاک فوج تے پوری پاکستانی قوم وی مہرو وفا دے تقاضیاں دے عین مطابق کشمیریاں دے شانہ بشانہ نیں۔ عالمی برادری یورپی نونین، انسانی حقوق دی تنظیماں تے اقوام متحدہ نوں وی ایہدا فوری نوٹس لینا چاہیدا اے، تاں جے خطے وچ ہور بدامنی نوں پھیلن توں روکیا جا سکے، پر جے عالمی برادری نے ایس صورتحال دا نوٹس نہ لیا تے فیر خطے وچ حالات ہور خراب ہون دا خدشہ اے۔ دو ایٹمی طاقتاں آمنے ساہمنے کھڑیاں نیں، ایس ویلے اقوام متحدہ دا نوٹس نہ لینا حالات نوں ہور خراب کرن دی وجہ بنے گا۔