اسٹیفن کنگ امیر ترین ناول نگار کیویں بنے؟

21ستمبر1947نوں امریکی شہر پورٹ لینڈ وچ پیدا ہون والے اسٹیفن کنگ اک مقبول لکھاری نیں

لکھت:حفیظ ظفر

21ستمبر 1947 نوں امریکی شہر پورٹ لینڈ وچ پیدا ہون والے اسٹیفن کنگ اک مقبول لکھاری نیں۔ اوہ ہارر تے پراسرار موضوعات اتے لکھدے نیں تے اوہناں دے ناول شائع ہوندے ای ہتھوں ہتھ وِک جاندے نیں۔ اسٹیفن کنگ جتھے دنیا دے وڈے لکھاری نیں اوتھے ای اوہ امیر ترین لکھاریاں وچوں وی اک نیں۔ اوہناں دی زندگی دی کہانی یقینی طور تے دلچسپی توں خالی نہیں۔ اسٹیفن کنگ اک زمانے وچ بہت غریب ہویا کردے سن۔ ایتھوں تک کہ اوہناں دے کول اپنا ذاتی ٹائپ رائٹر خریدن دے وی پیسے نہیں سن لیکن اوہناں دے لکھے گئے پہلے ناول نے اوہناں دی زندگی دی کایا پلٹ دتی تے اج اوہناں دی دولت دا تخمینہ 500 ملین ڈالر لایا جاناد اے۔ ہن تک اوہناں دی کتاباں دی 400 ملین توں ودھ کاپیاں دنیا بھر وچ فروخت ہو چکیاں نیں۔ تسیں ایہہ جان کے وی حیران ہوو گے کہ اسٹیفن کنگ نوں اج صرف اک کتاب اتے اک ملین ڈالر توں ودھ رقم بطور ایڈوانس ادا کیتی جاندی اے۔
اسٹیفن کنگ اجے صرف 2سال دے سن کہ اوہناں دے والدین وچ علیحدگی ہو گئی تے گھر دی مالی ضروریات پوری کرن دی ساری ذمہ داری اوہناں دی والدہ اتے آ گئی۔ اوہناں دی والدہ نوں گھر دے اخراجات چلان لئی مشکل تے تھکا دین والی نوکریاں کرنا پئیاں۔ جدوں اسٹیفن وڈے ہوئے تے سکول جان لگے تے اوہناں نے اپنے ذاتی اخراجات چکن لئی خود وی محنت مزدوری شروع کردتی۔ دوپہر نوں سکول توں چھٹی مگروںتن وجے توں رات 12وجے تک فیکٹری وچ مزدوری کردے سن۔ اک زمانے ایسا وی آیا کہ 12گھنٹے لانڈری اتے کپڑے دھویا کردے۔ اوہناں نے پٹرول پمپ اتے وی ملازمت کیتی۔ اوہناں نوں آلوواں دے کھیت وچ کم کرن لئی 25سینٹ فی بوری دے حساب نال دتے جاندے سن۔
اسٹیفن کنگ اپنی زندگی دا اک واقعہ بیان کردے ہوئے اج وی رو پیندے نیں کہ اوہناں دی ماں بڑھاپے دی وجہ نال بیمار رہن لگی سی۔ اک دن اوہ اپنے بالاں نوں لے کے اپنی ماں نال ملاقات لئی اوہناں دے گھر گئے تے اوہناں دی چھوٹی دھی نوں بخار سی۔ اسٹیفن تے اوہناں دی بیوی نوں ایس گل دا پتہ سی کہ دھی لئی فوری طور تے اینٹی بایوٹک دی لوڑ اے مگر اوہناں دے کول دوائی خریدن دے وی پیسے نہیں سن۔ اوہ واپس گھر پہنچے تے ڈاک دے ذریعے موصول ہون والا اک لفافہ اوہناں دا منتظر سی۔
اسٹیفن دسدے نیں کہ اوس لفافے نوں ویکھ کے اوہ ہور افسردہ ہو گئے کہ اوہناں نوں اج تک ڈاک وچ گھر دے بلاں دے علاوہ ہور کوئی چیز موصول نہیں ہوئی سی تے یقینا ایس واری وی لفافے وچ کوئی بل موجود ہووے گا لیکن ایہہ لفافہ اوہناں دی زندگی نوں اک نواں رخ دین والے تازہ ہوا دے اک جھونکے وانگوں آیا سی۔ جدوں اوہناں نے لفافہ کھولیا تے اوہدے وچ اوہناں دے اک افسانے دے معاوضے دے طور تے 500ڈالر دا چیک موجود سی‘ جہنوں ویکھ کے اسٹیفن بے ساختہ رو پئے ۔ اپنے افسانے دا اینا بوہتا معاوضہ ملن تے اسٹیفن ایس قدر خوش ہوئے کہ اوہناں نے ہور افسانے تے ناول لکھن دا فیصلہ کیتا۔
جدوں اسٹیفن نے اپنا ناول لکھنا شروع کیتا تے اوہناں دے کول اک ٹائپ رائٹر تک موجود نہیں سی۔ اخیر اوہناں نے اپنی بیوی کولوں پیسے ادھار لے کے اک عدد ٹائپ رائٹر خریدیا تے اپنا پہلا ناول لکھیا۔ لیکن ایس ناول نوں مکمل کرن توں پہلاں اوہ مالی مسائل دی وجہ نال کافی افسردہ وی رہے۔ ایتھوں تک کہ اوہناں نے ناول دے شروع دے کجھ صفحے لکھن مگروں اوہناں نوں ردی دی ٹوکری وچ سٹ دتا سی۔ لیکن اوہناں دی بیوی نے ایہہ صفحے ٹوکری توں کڈے تے اسٹیفن نوں دوبارہ کوشش کرن دی ترغیب دتی۔ بیوی دی حوصلہ افزائی پاروں اخیر اسٹیفن اپنا پہلا ناول کیری Carrie لکھن وچ کامیاب ہوئے۔ اوہناں نے جدوں ایہہ ناول شائع کرن لئی پبلشرز نال رابطہ کیتا تے لگاتار 30واری اوہناں دا ناول رد کردتا گیا۔
اسٹیفن کنگ ایس عرصے نوں اپنی زندگی دا مشکل ترین ویلادَسدے نیں۔ مشکلاں دے باوجود اسٹیفن نے کوشش جاری رکھی تے اخیر 31ویں کوشش وچ ڈبل ڈے نامی پبلشنگ کمپنی نے اوہناں دا ناول شائع کرن تے رضامندی ظاہرکردتی تے جدوں ایہہ ناول شائع ہویا تے اوہنوں ایس قدر پذیرائی ملی کہ اسٹیفن کنگ ایس ناول توں 3ملین ڈالر یعنی پاکستانی 66کروڑ روپے (اج دے حساب نال) توں ودھ دی آمدنی حاصل کرن وچ کامیاب رہے۔ اگرچہ ایسی صورتحال وچ کوئی وی دوجا شخص آسانی نال ہار من سکدا سی لیکن اسٹیفن کنگ نوں خود اتے تے اپنے کم اتے یقین سی جہنے اوہناں نوں کوشش جاری رکھن تے مجبور کیتے رکھیا لیکن کیہ کوئی سوچ وی سکدا اے کہ اک زمانے وچ ایس قدر مشکلاں وچ گھرے اسٹیفن زندگی وچ اینی کامیابی حاصل کر سکدے نیں کہ اج جدوں وی اپنا کوئی نواں ناول لکھدے نیں تے ایہہ ناول ایس قدر بوہتا وِکداد اے کہ پچھلے ناول دا ریکارڈ وی توڑ دیندا اے۔
ہن تک اوہناں دی کتاباں دی تقریباً 400ملین ہارڈ بائونڈ کاپیاں فروخت ہو چکیاں نیں۔ اسٹیفن نے کل 50ناول تے 200مختصر کہانیاں لکھیاں نیں جہناں وچوں 90فیصد نوں مثبت طور تے سراہیا گیا۔ اسٹیفن کنگ دی کہانیاں نوں یورپ تے امریکہ وچ ایس قدر پذیرائی حاصل ہوئی کہ ہالی وڈ فلم انڈسٹری وچ اوہناں دے ناولاں اتے بہت ساریاں فلماں بنائیاں گئیاں۔ اوہناں دے ناولاں اتے بنن والی سب توں مشہور فلماں وچ دی شاشنک ری ڈیمپیشن‘ دی ڈارک ٹاور‘ اٹ‘ فائر سٹارٹر تے دی گرین مائل وغیرہ سرفہرست نیں۔ اوہناں دی لکھی گئی فلماں وچ ہالی ووڈ دے وڈے وڈے اداکار جلوہ گر ہوئے جہناں وچ منے پرمنے اداکار مورگن فری مین‘ جونی ڈیپ ‘ ادریس ایلبا تے تھیومیک کونگے شامل نیں۔
اسٹیفن دے بچپن دی گل کیتی جاوے تے اوہناں نوں بہت چھوٹی عمر توں ای لکھن دا شوق سی۔ سکول میگزین وچ اوہناں دے مضمون شائع ہوندے سن۔ اوہ مختصر کہانیاں لکھدے تے اوہناں نوں اپنے دوستاں نوں کجھ سینٹ دے عوض ویچ دیندے سن۔ اوہناں نے 1970 وچ یونیورسٹی آف مین توں بیچلر آف آرٹس دی ڈگری دے نال گریجویشن پوری کیتی۔ ہائی سکول دے استاد دی حیثیت نال اوہناں نوں کوئی ملازمت نہ ملن پاروں اپنی مختصر کہانیاں مختلف رسالیاں نوں ویچنیاں پئیاں جہناں دے عوض اوہناں نوں معاوضہ ادا کردتا جاندا سی۔
1970 دی دہائی وچ ای جدوں اوہ ہیمپڈن اکیڈمی وچ بطور استاد کم کر رہے سن۔ اوہ شراب دے عادی ہو گئے تے اوہناں دا طرززندگی بدل گیا۔ اگرچہ اوہ کہانیاں لکھ رہے سن لیکن اوہناں دی ذاتی زندگی متاثر ہوئی تے اوہناں دی صحت دی حالت وی ابتر ہو گئی۔ دس سال تک اوہ انج ای زندگی گزاردے رہے۔ آخرکار اوہناں نے شراب نوشی چھڈ دتی تے اپنے کیرئیر اتے توجہ دتی۔
1971 وچ اوہناں نے ہیمپڈن وچ بطور استاد ملازمت اختیار کر لیتی۔ ایس دوران اوہ نویں آئیڈیاز تے کہانیاں بارے سوچدے رہندے جہناں اتے اوہ کم کرسکن۔ اوہناں دے پہلے ناول کیری مگروں ویسے تے اوہناں دی بہت ساری کتاباں شائع ہوئیاں لیکن 1977 وچ اوہناں دی کتاب دی شائننگ نوں دنیا دے وڈے وڈے ناقدین ولوں سراہیا گیا۔ 1980 دی دہائی وچ اسٹیفن نے ناقابل یقین حد تک مقبول دی ڈارک ٹاور سیریز لکھنا شروع کیتی۔ ایہہ کتاب بڑی کامیاب ہوئی تے اسٹیفن نوں انھیرے توں چانن وچ لے آئی۔1981 وچ اوہناں دی کتاب فائیر سٹارٹر دی 100,000 کاپیاں وکیاں جہدے توں اوہناں دی مقبولیت وچ ہور وادھا ہویا۔ ایس کتاب اتے ہالی وڈ وچ فائیر سٹارٹر دے نام توں ای فلم بن چکی اے جہنے ناظرین وچ کامیاب مقبولیت حاصل کیتی۔ فائیر سٹارٹر مگروں اوہناں دی اگلی شائع ہون والی کتاب کرسٹین دی دو لکھ 50ہزار کاپیاں دنیا بھر وچ وکیاں۔اسٹیفن نے اپنے ودھدے مداحواں نوں مطمئن کرن لئی ایسے صنف وچ ودھ توں ودھ کہانیاں لکھنا شروع کر دتیاں۔ کتاب ’’دی ڈارک ٹاورII‘ دی ڈرائنگ آف دی ٹری دی ریلیز نے اوہناں نوں ہور کامیابی حاصل کرن وچ مدد دتی۔
اوہ 1986 وچ اپنی کامیابی دے عروج اتے پہنچ گئے جدوں اوہناں دی کتاب It دی دس لکھ کاپیاں وکیاں تے اوہنے پچھلے سارے ریکارڈ توڑ دتے۔اوہناں نے اپنے پورے کیرئیر وچ مختصر کہانیاں تے ناول لکھدے ہوئے اپنی کامیابی نوں جاری رکھیا جہرے ہمیشہ مداح تے ناقدین ولوں یکساں طور تے پذیرائی حاصل کردے رہے۔ جدوں اوہ ہیمپڈن اکیڈمی وچ بطور استاد کم کر رہے سن۔ اوہ شراب دے عادی ہو گئے تے اوہناں دا طرززندگی بدل گیا۔ اگرچہ اوہ کہانیاں لکھ رہے سن لیکن اوہناں دی ذاتی زندگی متاثر ہوئی تے اوہناں دی صحت دی حالت وی ابتر ہو گئی۔ دس سال تک اوہ انج ای زندگی گزاردے رہے۔ آخرکار اوہناں نے شراب نوشی چھڈ دتی تے اپنے کیرئیر اتے توجہ دتی۔مسلسل کامیابیاں دا ایہہ سلسلہ چل رہیا سی کہ اچانک 19جون 1999نوں اسٹیفن اک حادثے دا شکار ہو گئے۔ حادثہ ایس قدر شدید سی کہ ڈاکٹراں نے اوہناں دی حالت نازک قرار دے دتی۔ اک توں ودھ فریکچرز تے پھیپھڑیاں دی چوٹاں نے اوہناں نوں تن مہینے لئی بستر تک محدود کردتا۔ اوہناں نوں معمول دی زندگی وچ واپس آن وچ چھ مہینے توں ودھ دا ویلا لگیا۔اوہ ایس عرصے دے دوران ریٹائرمنٹ دا اعلان کرنا چاہندے سن لیکن اوہناں دے خاندان دی محبت تے تعاون نے اوہناں نوں چھیتی صحت یاب کر دتا۔
اسٹیفن کنگ دے ڈارک یونرا اتے کہانیاں لکھن دے حوالے نال کہیا جاندا اے کہ بچپن وچ اوہناں دا اک دوست ٹرین دے اک ہولناک حادثے وچ مر گیا تے ناقدین دے مطابق اوس حادثے نے اوہناں دی شخصیت تے طرز تحریر اتے اہم کردار ادا کیتا تے ایہو وجہ اے کہ اوہناں دی بوہتی تخلیقات Dark Genre اتے نیں۔ تاہم اوہناں نے ایس واقعہ یا ایہدے اثرات دا کدی کدھرے ذکر نہیں کیتا بلکہ اوہ اپنے انٹرویو وچ دسدے نیں کہ بچپن توں ای اوہناں نوں ہارر کامکس پسند سن تے اوہناں دے بوہتے کم انٹرٹینگ کامکس کمپنی دے ہارر کامکس توں بہت زیادہ متاثر نیں۔
اسٹیفن کنگ دی زندگی اک سبق اے جہڑی سانوں سکھاندی اے کہ ا پنے آپ اتے یقین رکھنا ای اوہ واحد رستہ اے جہدے توں تسیں کامیاب انسان بن سکدے او۔ ایہہ اک ایسے شخص دی روشن مثال اے جہنے نکامی نوں اپنی پہچان نہیں بنن دتا ‘ جہنے کدی ہار نہ منن دی سادہ جئی حقیقت توں کامیابی دا رستہ تلاش کیتا۔ اوہ اپنے پس منظر تے مالی پریشانیاں پاروں اپنے آپ نوں کوشش کرن توں روک سکدے سن لیکن اوہناں نے ایسا نہیں کیتا۔ 30واری رد کیتے جان تے اوہ ایہہ وی سوچ سکدے سن کہ اوہ کدی اک کامیاب مصنف نہیں بن سکدے لیکن اوہناں نے لکھنا جاری رکھیا۔ ہر ردعمل توں سکھدے ہوئے اپنے ہنر تے اپنی صلاحیتاں نوں بہتر کیتا۔ اپنی پہلی ادبی کامیابی مگروں اوہ خود پسندی دا شکاربن سکدے سن یا اپنا پیسہ عیاشی دی نذر کر سکدے سن۔ اوہناں نے کدی ایسا نہیں کیتا۔ اوہ ایہدے اتے قابو پا کے اگے ودھ گئے تے فیر ودھدے ای چلے گئے۔