جی20 تے ڈھائی لکھ کشمیری شہید

روہیل اکبر

سری نگر وچ 22توں 24مئی 2023ء تک ہون والا متنازعہ جی20 دا اجلاس کشمیریاں دے احتجاج پاروں دنیا بھر دیاں نظراں وچ آ گیا۔ بھارت نے اپنے ولوں چالاکی تے ہشیاری وکھائی سی جو اوہدے ای گلے پے گئی۔ ہن پوری دنیا نوں پتہ لگ چکیا اے کہ کشمیر اقوام متحدہ دا متنازعہ علاقہ قرار دتا گیا اے جتھے اقوام متحدہ دا کوئی وی رکن یکطرفہ اجلاس نہیں کر سکدا تے رکن ملک متنازعہ کشمیر دی حقیقت نوں چھپان لئی بھارت دے گھٹیا عزائم دا حصہ نہ بنن کیوں جے ہندوستان جموں و کشمیر تے اپنی جبری حاکمیت ثابت کرن تے جنگی جرائم چھپان لئی جی20 دا اجلاس کرنا چاہندا اے مودی حکومت جو کشمیریاں دی قاتل اے اوہ مقبوضہ کشمیر وچ جی 20 ملکاں دا اجلاس کرکے دنیا دی اکھاں وچ مٹی پا رہیا اے کہ بھارت دے زیرقبضہ مقبوضہ ریاست جموں و کشمیر وچ حالات معمول دے مطابق نیں اقوام متحدہ نے وی ریاست جموں و کشمیر نوں متنازعہ علاقہ قرار دے رکھیا اے۔ بھارت دھوکھا دہی نال مقبوضہ کشمیر وچ جی 20 ملکاں دی تنظیم دا اجلاس منعقد کرکے کشمیریاں دے پھٹاں تے لون چھڑکنا چاہندا اے کشمیری رہنما فاروق آزاد‘ آفتاب نازکی تے شہزاد نازکی نے مقبوضہ کشمیر وچ بھارت دی مرضی تے منعقد ہون والے جی20 ملکاں دے جلاس تے ریاست دے دوہاں پاسے احتجاج دی کال دے کے اپنے مقبوضہ کشمیر دے بھراواں نوں ایہ واضح پیغام دتا اے کہ تحریک آزادی کشمیر دی کامیابی دی جدوجہد وچ لوک اوہناں دے موڈھے نال موڈھا جوڑ کے کھڑے نیں تے اسیں اپنی آزادی لئی کسے وی قربانی توں دریغ نہیں کراں گے۔
ریاست بھر دیاں ساریاں سیاسی جماعتاں تے اہل کشمیر تحریک آزادی دی کامیابی لئی اکمٹھ تے منظم تے بھرپور باہمی اتحاد و اتفاق اے جی 20 ملکاں توں وی کشمیری ایہ توقع کردے نیں کہ اوہ سری نگر وچ ہون والے سیشن وچ شرکت نہیں کرن گے جد کہ چین تے ترکی نے بھارت دی چھترچھاویں جی20 ملکاں دے اجلاس وچ عدم شرکت دا اعلان کرکے کشمیریاں دی حوصلہ افزائی کیتی اے جہدے تے کشمیری اوہناں ملکاں دا شکریہ ادا کردے نیں تے باقی شامل ملکاں توں وی توقع کردے نیں کہ اوہ کشمیریاں دے پھٹاں تے لون نہیں چھڑکن گے تے جی 20 دے ملک متنازعہ علاقے سری نگر وچ اجلاس توں گریز کرن بھارت جی 20 نوں سری نگر لے جا کے اوہناں دی اکھاں وچ مٹی پانا چاہندا اے بھارت دنیا دا وڈا دہشت گرد ملک اے جنہے 5اگست 2019ء نوں بھارتی آئین دی دفعہ 370 تے 35 اے وچ ترمیم کر کے ریاست جموں و کشمیر دی خصوصی حیثیت نوں ختم کرن دی بین الاقوامی جارحیت کیتی اے کشمیری قوم تے بھارت نے ظلم و جبر دے سارے ہتھکنڈے تے جبر کرکے ویکھ لیا پر اوہ کشمیریاں دے جذبہ آزادی نوں ٹھنڈا نہیں کر سکیا اج وی مقبوضہ ریاست جموں و کشمیر وچ بھارتی فوجی کرفیو تے گولیاں دے سائے وچ پاکستان زندہ باد دے نعرے لگدے نیں تے کشمیری قیادت سید علی گیلانی دے نعرہ ہم ہیں پاکستانی تے پاکستان ہمارا ہے۔ پوری وادی وچ گونج رہیا اے۔ مقبوضہ کشمیر وچ بھارتی فوجاں دے جبر نال جو وی کشمیری شہید ہوندا اے تے اوہنوں وی پاکستانی جھنڈے وچ دفن کیتا جاندا اے ایس لازوال رشتے نوں ختم کرن لئی ہندوستان نے کھرباں روپیے اپنی فوج تے خرچ کیتے پر اوہ کشمیریاں دے ضمیر نہیں خرید سکے ایہو وجہ اے کہ نام نہاد جمہوریت دے دعویدار بھارت دے ہتھوں 75 ورھیاں توں کشمیریاں دی نسل کشی دا بدترین سلسلہ جاری اے۔
1947ء توں ہن تک بھارت مقبوضہ کشمیر وچ ڈھائی لکھ توں ودھ کشمیریاں نوں شہید کر چکیا اے 1989ء توں ہن تک 96 ہزار توں ودھ کشمیری شہید ہو چکے نیں تے 23 ہزار کشمیری عورتاں بیوہ تے اک لکھ توں ودھ بچے یتیم ہوئے نیں۔ 1990ء وچ ہندواڑہ‘ تینج پورہ تے زکورہ‘ 1993ء وچ سو پور‘ لال چوک تے بیجی بہارہ جد کہ 1994ء وچ کپواڑہ وچ قتل عام دے راہیں ہزاراں کشمیریاں نوں شہید کیتا گیا۔ بھارتی فوج کشمیر وچ یاراں ہزار توں ودھ عورتاں دے نال اجتماعی زیادتی جد کہ ست ہزار توں ودھ ماورائے عدالت قتل کر چکی اے۔ 6جنوری 1993ء نوں سوپور وچ 43 کشمیریاں نوں شہید کیتا گیا 300 دکاناں نوں ساڑیا گیا تے سو توں ودھ گھراں نوں ڈھا دتا گیا سی جنوری 1994ء نوں کپواڑہ وچ 27 کشمیریاں نوں شہید کیتا گیا چھ جولائی 2016ء نوں برہان وانی دی شہادت دے بعد دو سو توں ودھ لوکاں نوں احتجاج دورانش ہید کیتا گیا بھارت مقبوضہ کشمیر نوں دس لکھ فوج راہیں چھائونی وچ بدل چکیا اے ایمنسٹی انٹرنیشنل تے ہیومن رائٹس دیاں تنظیماں کشمیریاں دے قتل عام دی کئی واری مذمت کرن دے نال ایہ وی واضح کر چکیاں نیں کہ بھارت کشمیریاں دی نسل کشی راہیں تحریک آزادی نوں دبانا چاہندا اے۔ سوال ایہہ وے کہ کیہ کشمیر وچ شرکت کرن والے ملکاں دے ارکان بھارت ولوں کشمیریاں دی نسل کشی تے پچھ دس کرن گے کیوں جے ہندوستانی فوجاں نام نہاد تے سرچ اپریشن دوران بے گناہ کشمیری نوجواناں نوں شہید کر رہی اے ہزاراں دی گنتی وچ کشمیری نوجواناں نوں تشدد دے عقوبت خانیاں وچ ڈک رکھیا اے۔ ٭