سفارتی تنائو نئی حماقت

Hameed Ullah Bhatti

تحریر حمیداللہ بھٹی

پاکستان دی امن پسندی نوں کمزور ی نال تعبیر کرنا حماقت توں سوا کجھ نہیں۔ ایس توں پہلاں حماقت دے نتیجے وچ بھارت پچھلے ورھے 27 فروری نوں دو لڑاکا طیاریا ں توں محرومی دی صورت وچ سزا بھگت چکیا اے پر لگدا اے اینوں عقل نہیں آئی پاکستان ای نہیں چین، یپال تے بنگلہ دیش تیکر بھارت دی چیردستیاں اُتے نراض نیں سری لنکا وچ شاد نہیں بھوٹان نے بھارتی ریاست آسام دے سرحدی ضلع باکساکو جان والا پانی روک کے نراضگی وکھائی اے سارے گوانڈھی کیوں نراض نیں ایس تے انتہا پسند مودی سرکار نوں جائز ہ لین دی لوڑ اے جدوں ہر ملک بھارت اُتے انگلی چک رہیا اے تے فیر خرابی کسے گوانڈھی وچ نہیں آپ بھارت وچ اے دنیا وچ معاشی سبقت دی نس بھج وچ مصروف اے پر بھارت دی سوج نہیں بدل سکی اج وی اوہ گوانڈھیاں نوں تنگ کرن تے جارحانہ حکمتِ عملی تے کاربند اے، اقوام عالم عالمی وبا دیاں تباہ کاریاں گھٹ کرن دی کوشش وچ اے پر بھارت خطے وچ جنگ دے شعلے اُچے کرنا چاہندا اے پر اگ لاندے ہوئے ایہہ نہیں بھلنا چاہیدا کہ اپنا آشیانہ وی سڑ سکدا اے۔
15جون نوں بھارتی ہائی کمیشن دی گڈی نے نہ صرف حد رفتار دی خلاف ورزی کیتی بلکے اک شہری نوں کچل کے زخمی کرن توں بعد نس گئی۔ ایہہ واقعہ پاکستان دے دارالحکومت اسلام آباد وچ پیش آیا جس دی پاداش وچ پلس نے قانونی کاروائی کردے ہوئے ہائی کمیشن دے دو اہلکاراں نوں حراست وچ لے لیا، تلاشی دے دوران اک اہلکار توں داہ ہزار دی پاکستانی جعلی کرنسی وی برآمد ہوئی ایس لئی شہری نوں کچل کے نسن تے جعلی کرنسی دی دفعات دے نال مقدمہ درج کر لیا گیا کیوں جے ویانا کنونشن دے تحت سفارتی نمائندیاں نوں استثنیٰ حاصل اے ایسے لئی پاکستان نے گرفتار اہلکاراں نوں چھڈ دتا دونویں اہلکار رہائی توں بعد واہگہ بارڈر دے ذریعے بھارت روانہ ہو گئے پر بھارت نوں جھوٹ بولن دی پرانی بیماری اے بجائے ایس دے کہ سفارتی عملے دی غیر قانونی سرگرمیاں اتے آئندہ محتاط رہن دی یقین دہانی کراندا الٹا کھسیانی بلی کھمبا نوچے دے مصداق گن پوائنٹ اُتے اغوا کرن، بھیڑا سلوک تے ہراساں کرن دا الزام لا دتا حالاں کے پاکستان دا رویہ ہمیشہ مصالحانہ تے امن پسندانہ رہیا اے بھارت دیاں سازشاں توں آگاہ ہون دے باوجود انج دی سرگرمی وچ حصہ نہیں لیا جس نال خطہ جنگ دے شعلیاں دی نذر ہو جائے۔
بلوچستان ، فاٹا تے سندھ وچ بھارتی مداخلت اک کھلی حقیقت اے۔ سی پیک دے خلاف سازشاں وی لُکیاں نہیں پر پاکستان دے اداریاں نے بھاری چاولاں دا توڑ کرن دے علاوہ کدی کسے غیر ذمے داری دا مظاہرہ نہیں کیتا تے ہمیشہ عدم جارحیت دی پالیسی اپنائی اے پر ہن ایہہ روز روشن وانگوں عیاں ہو گیا اے کہ پاکستان دی امن پسندی یکطرفہ اے تے بھارت توسیع پسندانہ عزائم چھڈن تے تیار نہیں دونواں ملکاں وچ سفارتی تعلقات اتار چڑھائو دا شکار رہندے نیں۔ اندراگاندھی توں لے کے ہن تیکر کدی انج دے تعلقات نہیں رہے جنہاں نوں خوشگوار یا اک بااعتماد گوانڈھی دے شایان شان کہیا جائے جس دی وجہ بھارتی قیادت دی پاکستان دشمنی اے۔ عمران خان نے وزارت عظمیٰ دا عہدہ سنبھالن توں بعد اک توں ودھ وار کشیدگی گھٹ کرن لئی مذاکرات دی مخلصانہ پیشکش کیتی پر پاکستان دے خلوص نوں کمزور توں تعبیر کردے ہوئے کسے پیشکش دا مثبت جواب نہ دین دی زحمت نہ کیتی گئی حالیہ سفارتی تنائو دا آغاز وی پچھلے مہینے دے آخری دن 31مئی نوں ہویا جدوں پاکستانی ہائی کمیشن دہلی دے دو اہلکاراں نوں سفر دے دوران رکن تے تشدد توں بعد جاسوسی دا الزام لا کے بھارت توں نکل جان دا حکم دتا گیا بے بنیاد الزاماں نوں پاکستان نے مسترد کر دتا پر بھارت نے کشیدگی وچ وادھا کرن لئی مزید پیر چکدے ہوئے خط لکھ کے دہلی تے اسلام آباد وچ موجود عملہ ادھا کرن دا مطالبہ کیتا پاکستان دی طرفوں ست دن وچ عملدرآمد دے وعدے دے باوجود بھارت نے بے صبری وکھائی تے یکطرفہ طور تے سفارتی عملے دی تعداد پجاہ فیصد تیکر گھٹ کرن دا اعلان کر دتا۔ ایہہ انتہائی غیر ذمے دارانہ حرکت توں علاوہ سفارتی آداب دے منافی رویہ اے جس اُتے پاکستان دی خموشی تے صبر و تحمل بلاجواز محسوس ہوندا اے ہن ویلا آ گیا اے کہ پاکستان وی چین نہیں تے گھٹوں گھٹ نیپال جہے رویے دا مظاہرہ کرے۔
بھارت نوں طاقت دا نشہ اے جیہڑا چین توں زلت آمیز پٹائی دے باوجود گھٹ نہیں ہویا نیپال جہے اک انج دے نکے ملک دی طرفوں جیہڑی تجارت لئی بھارتی سرزمین استعمال کردا اے ایس نے وی بھارتی شہریاں اُتے فائرنگ کر کے غم و غصے دا اظہار کیتا اے جس اتے بھارت علملایا ہویا اے تے انج محسوس ہوندا اے کہ ہر پاسے ہزیمت چکن توں بعد دہلی نواں محاذ کھولنا چاہندا اے جس لئی امن دا یکطرفہ راگ الاپن دی بجائے ہن پاکستان نوں 27 فروری وانگوں فالس فلیگ اپریشن دیاں دھمکیاں تے سنجیدہ ہو کے دندان شکن جواب دی تیاری کرنی چاہیدی اے۔
بھارت خطے وچ نفرت دا سمبل بن چکیا اے اوہ ای بنگلہ دیش جنہوں وکھرا ملک بنان لئی نریندر مودی نے ڈھاکہ وچ کھڑے ہو کے اپنی کوششاں دا فخریہ ذکر کیتا سی اوہ ای بنگلہ دیش متنازعہ شہریت دا قانون بنان دی وجہ نال ہن بھارت توں نال نہ صرف نراض اے بلکے انتہا پسندانہ پالیسیاں اتے تنقید کرن لگیا اے جس دی بنا تے چارے پاسے بھارت لئی خطرے ودھ گئے نیں ایس لئی اوہ بوکھلا کے اوچھے ہتھکنڈیاں اُتے آ گیا اے جس تے محتاط رہن تے منہ توڑ جواب دین دی لوڑ اے کیوں جے بھارت امن دی زبان سمجھدا ای نہیں جس دی تازہ ترین مثال چین نال ہون والی پٹائی اے لداخ وچ ہون والی پٹائی نے بھارت نوں کجھ سکون دتا اے تے ہن اوہ لڑن دی بجائے تصفیہ طلب مسئلے مذاکرات دے ذریعے حل کرن دی استدعا اُتے آ گیا اے اپوزیشن جماعتاں وی مودی نوں ہدف تنقید بنا رہیاںنیں پر اوہ کجھ کرن دی بجائے سکتے دی کیفیت وچ وکھائی دیندے نیں تے اپنی عوام نوں پُرامن رہن دی تلقین کرن وچ مصروف نیں پر جدوں پاکستان دی گل آندی اے تے ڈرپوک مودی اچانک شیر ہو جاندا اے انج کیوں اے؟ جواب بلکل واضح اے بزدلی وکھان نال نہیں امن لئی وی قوت دا اظہار لازم اے بھارت نے سفارتی تنائو پیدا کرن دی حمایت کیتی اے ذہن وچ رکھن والی گل ایہہ اے کہ بھارت نوں اخلاق،اصول یا کسے ضابطے دی پروا نہیں بدمعاش دی بدمعاشی روکن لئی طاقت دا مظاہرہ کرن وچ حرج نہیں پاکستان نے اک وار وی چین یا نیپال جہیا جواب دے دتا تے مستقبل وچ بھارت ولوں نویں شرارت دی جرات نہیں ہوئے گی۔

اپنا تبصرہ گھلو