بے باک صحافی تے بے مثال خطیب ۔۔۔آغا شورش کاشمیریؒ

sadam sagar

تحریر: صدام ساگر

1970ء دی دہائی وچ دنیائے ادب و صحافت تے سیاسی افق اُتے ملک گیر شہرت دے حامل جیہڑے سیاستدان تے لکھاری سن ایہناں وچ آغا شورش کاشمیری اک منفرد حیثیت رکھدے نیں۔ اوہ 14اگست 1917ء نوں بھارت دے شہر امرتسر وچ نظام الدین دے کول پیدا ہوئے۔ایہناں دے دادا دا ناں امیر بخش سی ایہناں دے پردادا سری نگر تو نقل مکانی کر کے امرتسر آئے۔ اوہناں نے ’’دیو سماج‘‘ ہائی سکول توں میٹرک تیکر تعلیم حاصل کیتی۔ ایس دے بعد اوہ غربت و افلاس تے بے روز گاری دی وجہ نال مزید تعلیم حاصل نہ کر سکے۔ ہندوستان وچ قید و بند دیاں مشکلاں برداشت کردے ہوئے اوہناں نے قرآن مجید دی تعلیم جیل وچ مولانا محمد گل شیر توں حاصل کیتی۔ ایہناں دا پیدائشی ناں عبدالکریم سی پر آغا شورش کاشمیری دے ناں توں مشہور ہوئے۔
آغاشورش کاشمیری اک مجموعہ صفات شخصیت سن، صحافت، شعرا وادب، خطابت و سیاست ایہناں چارے شعبیاں دے اوہ شہسوار سن۔ اوہناں نے سیاست دی آغاز مولانا ظفر علی خاں دی جماعت ’’مجلس اتحاد ملت پارٹی ‘‘ توں اک سرگرم رکن دی حیثیت نال کیتا۔ تاریخ دے ورقے دسدے نیں کہ 1936ء وچ سانحہ گنج مسجد شہیدہوئے تے ایس وچ ودھ چڑھ کے حصہ لیا جس دی پاداش وچ اڑھائی قید دی سزا ہوئی۔ جد کہ دوجی جنگ عظیم دے دوران باغیانہ تقریر کرن دے جرم وچ ست ورھے قید بامشقت ہوئی۔‘‘
قیام پاکستان دے بعد اوہ مولانا ظفر علی خاں دے اخبار ’’زمیندار ‘‘ تے روزنامہ ’’آزاد‘‘ وچ صحافتی ذمے داریاں انجام دین لگے۔ کجھ ای عرصے دے بعد اوہناں نے 1949ء وچ اک ہفت روزہ اخبار ’’چٹان ‘‘ لہور دا اجراء کیتا جس دا آفس ایس ویلے بھاٹی دروازے دے باہر سی۔ ایس اخبار دی اشاعت دے دوران بوہت نامور صحافیاں نے اپنے ہفت روزہ تے روزنامے کڈے۔ پر ہفت روزہ ’’چٹان ‘‘ دے مقابلے وچ کوئی وی اخبار یا جریدہ اوہ مقبولیت حاصل نہیں کر سکیا جیہڑی 70 دی دہائی وچ ’’چٹان ‘‘ اخبار نوں نصیب ہوئی۔جد کہ ویلا حمید نظامی مرحوم دا ہفت روزہ ’’قندیل ‘‘ تے فیض احمد فیض دا ہفت روزہ ’’لیل و نہار‘‘ 60 دی دہائی وچ کثیر تعداد وچ شائع ہوندے سن۔
قیام پاکستان دے بعد صحافت وچ جیہڑے حضرات ایس شعبے نال جڑے ہوئے ایہناں وچوں کسے نے وی مالی فائدے نوں اپنے اُتے حرام تصور کیتا۔ اوہ صحافت وچ مالی فائدیاں دے بارے وچ ایس طرح سوچن اُتے لکھدے سن کہ ’’طوائف تے اخبار نویسی وچ کوئی فرق نہیں‘‘۔ آغاصاحب ’’چٹان ‘‘ اخبار دے اداریے وی آپ لکھدے اوہ اپنے اداریاں وچ اکثر ایہہ جملہ لکھدے کہ ’’صحافت تجارت نہیں‘‘۔ ایہو اوہناں نے مولانا ابوالکلام آزاد تے مولانا ظفر علی خاں دی صحبت نال سکھیا۔ ایسے لئی ’’چٹان‘‘ نوں اک نظریاتی اخبار تسلیم کیتا جاندا سی۔ اک تھاں سردار عبدالرب نشر آغا صاحب دے بارے وچ فرماندے نیں کہ ’’عمر بھر چٹان نال ٹکران والا بالآخر چٹان دی پناہ لین اُتے مجبور ہو گیا‘‘۔ بابا ئے صحافت مولانا ظفر علی خان دا ایہہ شعر ویکھے جیہڑا اوہناں نے اپنے شاگردِ رشید دے حوالے نال کہیا:
شورش سے مرا رشتہ ہے اور وہ ازلی ہے
میں وقت کا رستم ہوں وہ ثانی سہراب
آغاصاحب دی شخصیت تے تقریراں دے انداز دی تاریخی نیز نگیاں وچ مقررین اسیر ہو جاندے، ایہناں وچ زندگی دا اک نواں آہنگ تھر تھران لگدا، عام و خواص وچ امید دی اک کرن اُجاگر ہو جاندی۔ بے ساختگی، جرات، گفتار، کردار و عزم تے قومی بیداری دے بپھردے دریائواں دی باغبانہ لہراں دے مدد جزر وچ اپنی اواز تے قلم نوں تلوار دی مانند کلمہ حق دی صدا نوں اُچا کرن دا بخوبی ہنر رکھدے سن۔ ایس حوالے نال ایہناں دے فرزندِ ارجمند آغا شورش کاشمیری اپنے اک مضمون وچ راقم طراز اے کہ ’’میں ایس ویلے ستویں جماعت دا طالب علم سی تے اپنے والد محترم دی خطابت دے بارے وچ بوہت کجھ سن رکھیا سی پر ایہناں نوں تقریر کردے ہوئے سنیا تے نہ ای ویکھیا۔ اسیں کجھ دوستاں نے پروگرام بنایا تے اسیں نومبر یا دسمبر 1973ء بروز اتوار موچی دروازے باغ ول چل پئے جتھے والد محترم نے بانی جماعت اسلامی سید مولانا ابوالااعلیٰ مودودیؒ ، قائد جمہوریت نواب زادہ نصراللہ دی ہمراہی وچ عوام نال خطاب کرنا سی۔ والد محترم جلسے دے آخری مقرر ہویا کردے سن۔ اوہ رات ساڑھے 11 وجے تقریر لئی اُٹھے، عوام دا اک جم غفیر جلسہ گاہ وچ امڈ آیا، عوام دی کثیر تعداد دے پیش نظر موچی دروازے دے باہر وی مختلف مقامات اُتے لائوڈ سپیکرز لائے گئے سن۔ جلسے دی غرض و غایت دا تے مینوں پتا نہیں پر والد محترم دے کجھ الفاظ اج وی میرے حافظے وچ گونج رہے نیں۔ اوہ ہر اعتبار نال قد آور سن، اوہناں نے اپنے مخصوص انداز نال بارعب اواز وچ کہیا لوگو! سچ بولنا بوہت خطرناک اے، سچ توں زیادہ کوئی شے کوڑی نہیں، سچ لئی ہمیشہ دو دی لوڑ ہوندی اے، اک اوہ جیہڑا سچ بولے تے دوجا اوہ جیہڑا سچ سنے، سچ تاں ای مکمل ہوندا اے۔ ایتھے سچ بولن والے گھٹ تے سنن والے گھٹ بلکہ نایاب نیں۔ حضرات اکثر سچائیاں صرف ایس لئی ناکام ہو گئیاں کہ ایہناں دے کول طاقت نہیں سی تے بیشتر جھوٹ ایس لئی کامیاب ہو گئے کہ ایہناں نوں طاقت نے پروان چڑھایا۔‘‘
آکھدے نیں کہ وڈے لوک بنائے نہیں جاندے بلکہ پیدا ہوندے نیں، ایسے گل دے باقول آغا شورش کاشمیری اک بوہت وڈے بندے سن۔ جنہاں دے اندر اللہ نے سچ سنن تے سچ نوں بیان کرن دی طاقت دتی۔ ایہناں دا دل عشق محمد ؐ دی عقیدت تے محبت نال سرشار رہندا تے ایہو وجہ اے کہ اوہناں نے 74 دی دہائی وچ قادیانیاں نوں غیر مسلم قرار دیندے ہوئے ختم نبوت لئی اہم کردار ادا کیتا جنہوں رہندی دنیا تیکر ہمیشہ یاد رکھیا جائے گا۔ بلاشبہ ان گنت خوبیاں دے مالک شورش کاشمیری جیہڑا علم و ادب، صحافت و سیاست تے خطابت دے علاوہ اوہناں نے بھرپور شاعری وی کیتی۔ ایہناں دے قلم توں بوہت تصانیف وی منظر عام اُتے آئی۔ جنہاں دا ذکر فیر کسے ہور ویلے کراں گا آخر وچ جاندے جاندے شاعر مشرق حضرت علامہ اقبالؒ
شورش سے بھاگتا ہوں، دل ڈھونڈتا ہے میرا
ایسا سکوت جس پر تقریر بھی فدا ہو

اپنا تبصرہ گھلو