بھارتی دہشت گردی تے دنیا

Hameed Ullah Bhatti

تحریر حمیداللہ بھٹی

عیاں حقیقت ایہہ اے کہ بھارت نے داعش سنے دہشت گرد تنظیماں دی حکومتی سطح اُتے سرپرستی شروع کر رکھی اے جس دی وجہ نال خطے دا امن متاثر ہو رہیا اے حیرانگی دی گل ایہہ اے کہ کئی حکومتی عہدیداراں ولوں دہشت گردی دی سرپرستی تے ہمسایہ ملکاں وچ مداخلت دے اعتراف دے باوجود وی دنیا بھارت نوں امن پسند سمجھدی اے۔ ایہہ خالصتاً جانبداری اے تے ایہہ دُہرا معیار ای امن دی راہ وچ رکاوٹ اے پر ہن بھارت دی نکی امن پسندی توں نقاب سرکن لگیا اے تے دنیا دے ذرائع ابلاغ نے بھارت دا حقیقی مکروہ کردار بے نقاب کرنا شروع کر دتا اے پر بھارتی شدت پسندی ہنوز راز وچ اے اقوام متحدہ نے کیرالہ تے کرناٹک وچ دہشت گرد گروپاں دی موجودگی دی تصدیق کردے ہوئے کہیا اے کہ ایہہ دہشت گرد حکومتی اعانت نال متعدد تخریبی کاروائیاں وچ نہ صرف ملوث اے تے بھارتی حکومت ایہناں نوں تربیت دے نال مالی معاونت کردی اے جس دے بعد دنیا نوں کاروائی کرن لئی مزید کسے قسم دے شواہد درکار نیں یا کجھ طاقتور ملکاں دی ناراضگی دے پیش نظر برائی دی محور ریاست توں چشم پوشی کیتی جا رہی اے؟ کیوں جے شواہد دی کمی نہیں جے سلامتی کونسل چاہے تے جنوبی ایشیا وچ حکومتی تائید نال ہون والی دہشت گردی دا تدارک کرن لئی ایس مسئلے نوں زیر بحث لیا سکدی اے پر کجھ طاقتور ملکاں دی ناراضگی دے خدشے اُتے انج کرن توں اجتناب کیتا جا رہیا اے جیہڑا انصاف دے اصولاں دے منافی اے اسلحہ ویچ کے معیشت سنوارن توں بحر حل انسانی جان دی زیادہ قدر و قیمت اے دہشت گردی دا الزام لا کے اک توں ودھ اسلامی ملکاں نوں کھنڈر بنان والیاں نے بھارت دی شدت پسندی نوں نظر انداز کرن دا سلسلہ جاری رکھیا تے جلدی ایہہ ناسور بن کے عالمی امن لئی خطرہ بن جائے گا۔
امریکی جریدے فارن پالیسی نے اپنی تازہ اشاعت وچ لکھیا اے کہ عالمی سطح اُتے دہشت گردی وچ ملوث ملکاں وچ بھارتی سر فہرست ملک اے دنیا وچ وڈے پیمانے اُتے تخریب کاری لئی داعش نوں بھارت استعمال کر رہیا اے آر ایس ایس جہی جنونی تنظیم دا نریندر مودی تاحیات رکن اے جیہڑا بطور وزیراعلیٰ گجرات دو ہزا ر توں ودھ مسلماناں نوں ما رن وچ براہ راست ملوث اے۔ اک جنونی بندے دا بھارت دا وزیراعظم بننا دنیا دے امن دی موت ثابت ہو سکدا اے کیوں جے بھارت اک جوہری طاقت اے تے جوہری ہتھیار اک جنونی دی دسترس وچ ہونا کسے انہونی دا موجب ہو سکدا اے جس توں مزید اکھاں بند کرنا حماقت ہوئے گی۔
تقسیمِ ہند دے نال ای بھارت نے خطے وچ امن لیان دی سازشاں وچ مصروف اے۔ پاکستان توں الحاق کرن والی ریاستاں جونا گڑھ، حیدر آباد تے دکن اُتے نہ صرف قبضہ کیتا بلکہ پاکستان نوں غیر مستحکم کرن تے توڑن دی کوشش وچ اے۔ بنگلہ دیش وچ علیحدگی بھارتی مداخلت اُتے ہوئی مکتی باہنی دی آڑ وچ بھارتی حاشیہ بردار دستیاں ے ہزاراں خواتین دی آبرو ریزی دی پاکستان دی حمایت کرن والیاں دا قتل عام کیتا گیا تے ستم ظریفی ایہہ کہ ناپاک حرکتاں دا الزام وی پاک فوج اُتے لا دتا نریندر مودی نے بنگلہ دیشی دورے دے دوران سقوطِ ڈھاکہ دا فخریہ ذکر کیتا پر افسوس امن دے دعویداراں نے اک دہشت گرد دے اعتراف دا نوٹس نہیں لیا۔
دنیا دی بے حسی نال بھارت نوں کشمیر دی خصوصی حیثیت ختم کرن دی نہ صرف شہ ملی بلکہ کشمیر نوں دنیا دی سب توں وڈی انسانی جیل بنان دی جسارت ہوئی۔ 1990 توں لے کے اج تیکر اک محتاط اندازے دے مطابق بھارت دی قابض فوج اک لکھ توں ودھ زائد کشمیریاں دیاں جاناں لے چکی اے جس دی وجہ نال 25 ہزار دے نیڑے خواتی بیوہ جد کہ سوا لکھ بچے یتیم ہوئے نیں۔ ایس توں علاوہ 11 ہزار توں ودھ خواتین نوں بے آبرو کیتا گیا پر دنیا دے امن دے ٹھیکیداراں دی اکھاں نہیں کھلیاں جس دا بھارت نے ایہہ اثر لیا اے کہ انسانی حقوق دی گل کرن والی تنظیماں نوں ملک وچ کم کرن توں روک دتا اے۔ ایمنسٹی انٹرنیشنل نے بھارت دی مکروہ تے وحشیانہ حرکتاں توں تنگ آ کے دفتر بند کردے ہوئے کم بند کر دتا اے فیر وی تھپکی دین والے ملک چپ نیں ہن تے ایہہ وی ثابت ہو گیا اے کہ علاقائی مفادات لئی دہشت گرد گروپاں دی بھارت سرپرستی کردا اے۔ امریکی جریدے نے بھارت دی چیرہ دستیاں دا چاک کردے ہوئے کسے قسم دا بہام نہیں رہن دتا جریدے نے لکھیا اے 2016 وچ اتاترک ایئر پورٹ نوں نشانہ بنان وچ بھارتی کردار روزِ روشن وانگوں عیاں اے۔ 2017 وچ نویں ورھے دے آغاز اُتے ترکی دے اک کلب اُتے حملہ، نیویارک تے اسٹاک ہوم وچ ہون والے کئی حملے بھارت دی ایما اُتے ہوئے جلال آباد دی جیل نوں وی بھارت دی خواہش اُتے نشانہ بنایا گیا کابل وچ سکھاں دی عبادت گاہ وی داعش نے بھارتی خواہش اُتے تباہی کیتی سری لنکا وچ 2019 دے دوران ایسٹر دے موقعے اُتے بم دھماکے وی بھارت نے اپنے حمایتی شدت پسنداں توں کرائے پر الزام مسلماناں اُتے لا کے ایہناں نوں نفرت دا نشانہ بنایا پچھلے ہفتے ای بنگلہ دیش وچ اک چینی انجینئر دے قتل وچ بھارتی کارندیاں دا کردار واضح ہویا اے۔ ہن دنیا دا اولین فرض اے کہ بھارت دے گھنائونے کردار اُتے دو ٹوک فیصلہ سنائے نہیں تے دنیا دے امن نوں ناقابل تلافی نقصان دا حتمال اے پشاور وچ بالاں دے سکول اُتے حملے وچ بھارتی کردار نوں جھٹلایا نہیں جا سکدا کیوں جے شواہد بھارت دی چیخ چیخ کے نشاندہی کردے نیں۔
بھارت اک انج دا سپ اے جیہڑا ہندواں دے سوا سب نوں ڈسن لئی بے تاب اے ایہہ ڈسدے ہوئے دلتاں اُتے وی بے رحم حملے کردا اے جنہوں ویلے اُتے قابو نہ کیتا گیا تے نریندر مودی گجرات دے قصاب دے بعد دنیا دا قصاب بن جائے گا تے ایس قصاب نال دنیا دے سکھ، مسلمان، عیسائی کوئی وی محفوظ نہیں رہے گا دنیا نوں امن تے مالی مفاد وچ اک دا انتخاب کرنا پئے گا نہیں تے جوہری بھارت دنیا دا امن سبوتاژ کرن وچ کامیاب ہو جائے گا۔ پاکستان سنے چین، افغانستان، بنگلہ دیش، سری لنکا، نیپال، بھوٹان تے مالدیپ وچ بدامنی نوں فروغ دین وچ بھارت براہ راست ملوث اے ایس لئی کسے ہمسائیہ ملک نال مراسم ٹھیک نہیں مقبوضہ ریاست سکم وچ وی ستم دے پہاڑ تور رہیا اے پر عالمی ادارے چپ نیں کیہ اوہ کسے وڈے سانحے دے انتظار وچ نیں؟ داعش تے بھارت دا گٹھ جوڑ امریکی جریدے نے طشت ازبام کیتا اے جنہوں سنجیدہ لین وچ ای عافیت اے۔
خطے وچ بھارت دی ریشہ دوانیاں کسے توں لُکیاں نہیں پر ہن تے بھارت جہے انتہا پسند ملک دی عالمی سطح اُتے دہشت گردی نوں بطور ہتھیار استعمال کرن وچ کوئی ابہام نہیں افغانستان تے شام وچ داعش دی دہشت گردانہ کاروائیاں وچ بھارتی معاونت لُکی چھپی نہیں رہی فارن پالیسی نے داعش تے بھارت دے گٹھ جوڑ دے حملیاں دی تصیلات نال دنیا نوں آگاہ کر دتا اے جس دا تدارک ہونا چاہیدا اے کیوں جے دہشت گردی دا نقصان مسلم امہ نے چکیا اے۔ امریکی جریدے دی طرفوں ناقابل تردید حقائق دی نشاندہی دا تقاضہ اے کہ دنیا دا امن برقرار رکھن لئی عالمی دہشت گرد بھارت دی راہ روکی جائے ایس توں پہلاں کہ اوہ اپنے مذموم ارادیاں وچ کامیاب ہو کے دنیا نوں جہنم بنا دیوے۔
hameedullahbhati@gmail.com

اپنا تبصرہ گھلو