بے لگام مہنگائی نوں لگام کون پائے گا !

تحریر:شاہد ندیم احمد

پی ڈی ایم دا گوجرانوالہ دے بعد کراچی دا جلسہ وی کامیاب رہیا، پر عوام نوں اپوزیشن دے احتجاجی جلسیاں نال کوئی غرض نہیں، ایہناں نوں تے ایہہ فکر کھادے جا رہی اے کہ بے لگام مہنگائی نوں لگام کون پائے گا۔ ایس ودھدی مہنگائی، بے روز گاری نال غریب تے نوجواناں دے چہرے مرجھائے ہوئے نیں۔ اعلیٰ تعلیم یافتہ نوجوان ملازمت لئی در در دیاں ٹھوکراں کھا رہیا اے، ودھدی مہنگائی وچ عوام دی قوت خرید دم توڑ چکی اے جد کہ کاروباری بندیاں دی زبان توں مندے دیاں اوازاں آ رہیاں نیں۔ تحریک انصاف حکومت آن توں بعد عوام خوش سن کہ پہلی وار ملک نوں انج دا وزیراعظم ملیا اے جس دے دامن اُتے کرپشن دا کوئی داغ نہیں، ایہہ دیانت دار قیادت ملکی وسائل لٹن تے عوام دا لہو نچوڑن والے سیاست داناں نوں نشانِ عبرت بنا کے رکھ دیوے گی تے عوام لئی خوش حالی دے دروازے کھول دیوے گی پر ہن تیکر حکومتی اقدامات توں انج لگدا اے کہ عوام مایوسی دی گہری تاریک کھائی وچ اتردے جا رہے نیں ۔ پچھلے دو ورھے وچ مہنگائی تن سو فیصد تیکر ودھ گئی اے، حد تے ایہہ اے کہ آٹا، دال، سبزی جنہوں غریب دی خوراک کہیا جاندا سی، ہن غریب دی قوت خرید توں باہر ہو چکی اے، ایس ودھدی مہنگائی دے عفریت نے جس تیزی نال عوام نوں اپنی لپیٹ وچ لیا اے ایس دے پیش نظر انج لگدا اے کہ ایس ملک وچ کوئی قانون تے نہ ای کوئی انج دا ادارہ فعال اے کہ جیڑا حسب منشا مصنوعات دے نرخ ودھان والے صنعت کاراں، ہل مالکان، تاجراں تے ذخیرہ اندوزاں اُتے ہتھ پا سکے، حکومت تے انتظامیہ بے بسی دی تصویر بنے عوام نوں مہنگائی دی دلدل وچ پھسدا ہویا ویکھدے جا رہے نیں۔
ایس وچ شک نہیں کہ تحریک انصاف نوں اقتدار سنبھالدے ای مختلف مشکلاں دا ساہمنا کرنا پیا، غیر ملکی قرضیاں دا بوجھ، سابق حکومت دے غیر منافع بخش میگا منصوبے، ایف اے ٹی ایف دی تلوار دے نال دوست ملکاں دا بدلیا طرز عمل مشکلاں وچ وادھے دا باعث بنیا اے۔ وزیراعظم عمران خان اپنے رفقاء دے نال مل کے مسلیاں توں نبرد آزما ہون دی پوری کوشش کر رہے نیں، ایس لئی عوامی سطح اُتے کسے حد تیکر حکومت نوں عمومی حمایت مل جاندی اے پر مہنگائی نوں قابو وچ کرنا خالصتاً حکومت دا کم اے جس وچ کامیاب ہوندی وکھائی نہیں دے رہی۔ ادارہ شماریات دی رپورٹ دے مطابق اک ہفتے دے دوران مہنگائی دی شرح 4.5 فیصد ودھی اے۔ اک ہفتے وچ 25 اشیائے ضروریہ دیاں قیمتاں وچ وادھا تشویش دا باعث اے، ایس ودھدی مہنگائی نوں آخر عوام کدوں تیکر برداشت کرن گے، جد کہ ایہناں دی قوتِ خرید ای ختم ہوندی جا رہی اے۔ وزیراعظم عمران خان محض مہنگائی دے تدارک دے اعلان نال عوام نوں مطمئن نہیں کر سکدے۔
تحریک انصاف حکومت دی طرفوں مہنگائی اُتے قابو پان دے اعلان کیتے جا رہے نیں، پر حکومتی اعلان دے نتیجے عوام تیکر نہیں اپڑ رہے، کیوں جے حکومتی وزراء عوام نوں ریلیف اپڑان اُتے فوکس کرن دی بجائے اپوزیشن تحریک نوں ناکام بنان وچ مصروف نیں، حکومت تے اپوزیشن قیادت نوں غریب دی بھکھ تے افلاس دی کوئی فکر نہیں، ایہناں نوں اقتدار بچان تے اقتدار حاصل کرن دی فکر کھادے جا رہی اے ، ووٹ نوں عزت دو دا نعرہ لان والے وی عوام دی عزت نفس پامال کرن اُتے تلے نیں، 30 ورھے اقتدار دے مزے لٹن دے بعد وی ایہناں دا ڈیڑھ نہیں بھریا، جد کہ عوام دے منہ توں روٹی دا نوالہ وی کھوہ لیا گیا اے۔ اپوزیشن بظاہر جمہوریت بچان نکلی اے پر جمہور لئی اواز اُچی نہیں کر رہی، پورے ملک وچ مہنگائی بے لگام ہو چکی، کھان پین والیاں شیواں دی قیمتاں دن بدن ودھدیاں جا رہیاں نیں، عوام لئی دو ویلے دی روٹی دا حصول مشکل ہو گیا اے، حکومت تے اپوزیشن عوام نال بے پرواہ دست گریباں اے۔ حکومت مہنگائی دے تدارک دے اعلان اُتے انحصار کر کے سمجھ رہی اے کہ مہنگائی کنٹرول ہو جائے گی جد کہ ایس دے برعکس مہنگائی کنٹرول دے حکومتی اعلان بے اثر تے ضروری شیواں دیاں قیمتاں اسمان نال گلاں کرن لگیاں نیں، لہور وچ چکی دا آٹا مزید مہنگا ہو کے 84 روپئے فی کلو تیکر اپڑ گیا جد کہ چینی 110 روپئے تے انڈے 200 روپئے فی درجن ویچے جا رہے نیں۔حکومتی اعلان تے اقدامات وچ تذاد پاروں کھان پین والیاں شیواں عام بندے دی پہنچ توں دور ہو گئیاں تے عوام حکمراناں توں مایوس نظر آن لگے نیں۔
ایہہ امر واضح اے کہ ملک وچ موجود چند کجھ منافع خور تے ذخیرہ اندوز عناصر نے غریب عوام لئی دائرہ حیات مزید تنگ کر کے رکھ دتا اے، تاں حکومت ناجائز منافع خوراں دے خلاف بلاتاخیر سخت کاروائی یقینی بنا کے عوام دی مایوسی نوں امید وچ بدل سکدی اے حکومت نوں مہنگائی اُتے قابو پان لئی ضلعی و تحصیل سطح اُتے نظام نوں وی فعال کرنا ہوئے گا، ایہہ سدھی سادھی بدانتظامی تے نالائقی اے کہ حکومت دے مقرر کردہ نرخ اُتے انتظامیہ عمل درآمد کروان وچ ناکام نظر آندی اے۔ حکومت ریاستی اختیارات استعمال کر کے مسئلیاں دا حل لبھ رہی اے جد کہ ایتھے نوبت ایہہ وے کہ کوئی اپنی ذمے داریاں سمجھن تے اداکرن لئی تیار ای نہیں۔ بے لگام مہنگائی دی ملی بھگت وچ اُتوں لے کے تھلے تیکر منافع خوراں دی سرپرستی شامل اے، حکومت نوں چاہیدا اے کہ ٹائیگر فورس نوں نکے تاجراں دے پچھے لا کے عوام نوں مطمئن کرن دی بجائے وڈے مل مالکاں تے ذخیرہ اندوزاں اُتے سخت گرفت کرے
تاں جے مارکیٹ وچ مصنوعی بحران پیدا کر کے ایہہ لوک غریب دی کھال ادھیڑن توں باز رہن تے بے لگام مہنگائی نوں وی لگام پائی جا سکے۔ پاکستان ڈیمو کریٹک موومنٹ دا سردست ایجنڈۃ اپنے آپ نوں بچانا اے تاں حالات دے پیش نظر تیزی نال ودھدی مہنگائی دا پاسا تبدیل کر کے ایہنوں سیاسی ایجنڈے اُتے لیایا جا رہیا اے، جے اپوزیشن ایس حکمت عملی وچ کامیاب ہو گئی تے انتظامی بحران شدید تر ہو کے حکومت لئی خطرے دا باعث بن سکدا اے، ایس توں بچن لئی عوام وچ احساس بیدار کرنا ہوئے گا کہ حکومت بے لگام مہنگائی نوں لگام پان وچ کامیاب ہو جائے گی، عوام دا بھروسہ ای حکومت لئی اک مضبوط ڈھال بن سکدا اے۔