شانِ رسالت ﷺ

لكهت:رابعہ رحمن

ساڈے نبی آخر الزماں حضرت محمد ﷺ نال محبت عین ایمان اے جس طرح نال صرف لا الہ الا اللہ کہنا کلمہ پاک نوں مکمل نہیں کردا ایس دے نال محمد رسول اللہ کہن نال مسلمان دا کلمہ تے ایمان دونویں مکمل ہو جاندے نیں۔ جنہا اللہ نوں مننا اہم اے اینا ای ایس دی منن دی اہمیت مسلمہ اے، اپنے پیغمبراں دی تعظیم ایہناں دے فرمودات اُتے عمل تے ساڈے آخری نبی حضرت محمد ﷺ دے اسوئہ حسنہ اُتے عمل احسن زندگی دا شاخسانہ اے۔
سمجھا نہیں ہنوز مرا عشق ہے ثبات
توکائنات حسنِ ہے یا حسنِ کائنات
عشق مصطفی وچ بے چین رہنا دل نوں مضبوط کرنا تے ایمان نوں جلا بخشنا اے انسان دی حیاتی وچ مختلف نوعیت دی قلبی وارداتاں ہوندیاں نیں پر آقائے دوجہاں دی مدح لکھن وچ جیہڑا سرور ملدا اے اوہ کسے ہور مصرعے وچ نہیں ماسوائے (حمدیہ کلام) دے۔ اوہ رخشندہ تابندہ ذات کائنات نوں جس توں روشنی ملی۔ ایہناں دے ہر عمل دے پچھے صلہ رحمی، قربانی، صبر تے شکر دا دریا وگدا اے۔ آپ دے کردار و افکار دی جامعیت تے ہمہ گیریت مسلمہ اے۔ آپ دی حیاتی پر اسرار پردیاں دے پچھے لُکی نہیں۔ آپ دے ہر عمل تے قول نوں محفوظ کر کے آشکار کیتا گیا کیوں جے زینہ بہ زینہ آپ دی زندگی انسانیت تے عبادت دے نال نال سماجی تعلقات، معاشی معاملات، آئینی احکامات، مذہبی عقیدت تے عمل صالح دا واضح نمونہ سی۔ آپ دا ہر عمل سچا موتی، آپ دے دہن مبارک توں نکلیا ہر کلمہ نادر اے۔ 63 سالہ زندگی وچ شیر خوارگی وی سی، یتیمی دا سایہ وی سی، ماں دا آسرا وی جاندا رہیا، دادا جان وی جلدی داغ مفارقت دے گئے، لڑکپن، جوانی ، ازدواجی دور، چرواہے دی حیثیت وچ لنگھی زندگی تے فیر تجارت وی کیتی یعنی کہ معاشرے جڑ کے رہے پر ایہناں سارے ادوار وچ میرے آقائے دو جہاں نے اپنی امتیازی حیثیت اپنے قول و فعل دی سچائی، ایمانداری، بردباری نال قائم رکھی۔ حسن تدبیر توں وڈے اہم فیصلے وی کیتے، صادق تے امین مشہور ہوئے، مظلوماں دی داد رسی کرن والے مستحقین نوں حق دلوان والے، بے راہ روی دا شکار ہون والیاں نوں صراط مستقیم اُتے چلان والے، ظلمت کدے مٹان والے، چراغ الفت جلان والے میرے آقا حضرت محمد ﷺ اُتے جدوں ازمائشاں آئیاں۔ مخالفتاں نے سر چکیا دشمن جان دے در پے ہوئے تاں وی آپ دی حیاتی وچ لغزش دا اک لمحہ وی نہیں آیا۔ اذیتاں دا احوال ایہہ سی کہ نعلین مبارک لہو نال بھر جاندے تے وی ہدایت دی دعا فرماندے۔ اوہ ہدایت دا انج دا نور سن کہ دشمن وی آپ دی عظمت دے معتقد سن، عابد و زاہد میرے نبی مسلسل روزے وی رکھے جاندے تے فرماندے، تسیں میرے ہمسری نہ کر سکو گے میرا رب مینوں کھلاندا تے پلاندا اے۔ ہمیشہ فرماندے کہ انج عبادت کرو گویا تسیں اللہ نوں وکھ رہے او، امر بالمعروف تے نہی عن المنکر نوں ہر مومن لئی لازمی قرار دتا۔
حضرت محمد ﷺدی اک شان ایہہ وی سی کہ دعوتِ دین لئی ایہناں دا سینہ کھول دتا گیا سی۔ میرے آقا دے جمالِ فطرت نے کنہے ای گناہگاراں تے سیہ کاراں نوں حسن آفرینی عطا کیتی تے ایمان دے چراغ نال ایہناں نوں منور کیتا۔ جس طرح ساڈا رب سریع الرضا اے ایسے طرح ساڈے آقائے ہر جہاں دا انداز تفہیم و تعلیم و کلام حیرت انگیز طور اُتے سریع الاثر سی۔ آپ دے اوصاف کجھ ایسے طرح بیان کیتے گئے کہ آپ نوع انسانی اُتے گواہ نیں، ڈرن والے، بشارت دین والے، اللہ دی یکتائی بیان کرن والے، انسان نوں معاشرے وچ معتبر کرن والے، دھی نوں تحفظ تے عزت دین والے آقائے دو جہاں دے اقال و افکار عقائد و اعمال ساڈے لئی ترقی دا اوہ رستہ اے۔ جس دے بنا اسیں جنی وی سائنسی یا جدید علوم و فنون وچ ترقی کر لین کدی ترقی یافتہ نہیں ہو سکدے۔ ایہناں دی ذات اقدس ساڈے لئی اک نمونہ اے۔ مائیکل ہارٹ اک عیسائی سائنس دان اے ایس نے 1978ء وچ کتاب لکھی اے ایس نے کہیا اے کہ میں سارے انساناں وچوں 100 بہترین انساناں نوں لبھیا، اک عیسائی ہون دے ناطے کتاب دے آغاز وچوں سب توں پہلے حضرت عیسیٰ دا ناں لکھنا چاہیا پر ضمیر نے گواہی دتی کہ عیسیٰ اک پیغمبر ضرور نیں، دعوت دے میدان وچ موجود نیں پر میدان جہاد وچ اک سالار دی حیثیت نال ۔ میدان حکومت وچ اک حکمران دی حیچیت نال تے میدان عدالت وچ اک قاضی دی حیثیت نال موجود نہیں۔ ایس نے کہیا کہ اک سائنس دان ہون دے ناطے وچ کسے سائنسداناں دا ناں پہلے لکھنا چاہیا تے خیال آیا کہ سائنس داناں نے تے صرف فلسفے پیش کیتے نیں۔ میں کسے بادشاہ دا ناں لکھن دا سوچیا تے خیال آیا کہ بادشاہواں نے تے صرف انساناں دے سراں اُتے حکمرانی کیتی اے تے جرنیلاں نے انساناں دے سراں نوں اُڑایا اے۔ انسان نوں بے توقیر تے کیتا اے پر اوہ انسان جس نے انساناں دے سراں نوں عزت دتی اے تے ایہناں دے دلاں اُتے حکمرانی کیتی اے جیہڑا میدان جہاد وچ اک سالار دی حیثیت نال، میدان حکومت وچ اک حکمران دی حیثیت نال، عدالت وچ اک قاضی دی حیثیت نال، اک مہاجر دی حیثیت نال اک تاجر دی حیثیت نال، اک گھر دے سربراہ دی حیثیت نال نظر آندے نیں۔ اوہ صرف محمد ﷺ نیں۔ آپ دی رسالت دا اقرار تے آپ دا آخری نبی ہون اُتے یقین مومنون دا عقیدہ تے ایمان اے، عشق مصطفیٰ دا تقاضا اے اسیں اپنی اپنی زندگیاں نوں عشق مصطفیٰ نال روشن کریئے۔ ساڈے نبی ﷺ دی زبان مبارک نال کدی کسے لئی بددعا نہیں نکلی کیوں جے ایہناں نوں یقینِ کامل سی کہ ایہہ لوک نہیں تے ایہناں دی نسل وچوں اللہ دی عبادت کرن والے شر نوں مٹان والے تے خیر نوں ودھان والے پیدا ہون گے۔ نبی آخری الزمان نے اپنی امت اُتے ہمیشہ خیر فرمائی۔ میرے ساتھیو! سانوں وی اج اک دوجے لئی خیر دی دعا منگنی چاہیدی اے تے شر نوں نابود کر دینا چاہیدا اے۔