پاکستان وچ طب دے زوال دا ذمہ دار کون؟

پروفیسر حکیم سید عمران فیاض

پاکستان طبی کانفرنس ای اطباء دی واحد نمائندہ جماعت اے۔ کونسل دی اراضی وچار دیواری دا حصول پاکستان طبی کانفرنس دا کارنامہ اے۔ ایہناں وچاراں دا اظہار پاکستان طبی کانفرنس دے راہنماواں پروفیسر حکیم منصور العزیز، پروفیسر حکیم حافظ محمد یونس، پروفیسر حکیم محمد احمد سلیمی، پروفیسر حکیم ذوالحسنین بخاری، حکیم مفتی محمد یوسف، پروفیسر حکیم سہد عمران فیاض، حکیم قیصر گھمن، پروفیسر حکیم عبدالخالق چوھدری، حکیم جاوید رسول، حکیم سید رضوان حیدر گیلانی نے خطاب کردے ہوئے کیتا۔ اوہناں نے کہیا کہ ایہہ جانچنا بوہت ضروری اے کہ پاکستان وچ طب دے تنزل دا ذمے دار کون اے۔


ذمے داراں نوں ساہمنے لیانا بوہت ضروری اے… آئو… ذرا ماضی ول چلنے آں پر ٹھہرو!
پہلے ایس گل نوں باور کرانا ہوئے گا کہ …غیر جانب داری نال گل نوں سنیا تے کیتا جائے گا… کیہ تسیں جان دے او کہ 1965 دا طبی ایکٹ اک وار حکومت ولوں واقعی چک کے سٹ دتا گیا سی؟… تسیں ایس شخصیت دا ناں ظاہر کرن دی جرات رکھدے او جس نے 1965 دا طبی ایکٹ دے خلاف… ایہہ کہہ کے مخالفت کیتی سی کہ پاکستان وچ رجسٹرڈ اطباء دی اکثریت اے… جد کہ ایس ویلے ملک وچ طبیہ کالجز … دی تعداد نہ ہون دے برابر سی تے نویں طبیہ کالجاں دا قیام 65 دے طبی ایکٹ توں مشروط سی؟ سازش کامیاب ہوئی تے ایکٹ دا مسودہ دو تکڑے کر کے حکماء نوں واپس کر دتا گیا… پر خدا غریقِ رحمت کرے ایہناں بزرک اطباء نوں جنہاں نے شدید مخالفت دے باوجود نویں سرے توں جدوجہد دا آغاز کیتا تے کامیاب ہوئے۔ ایکٹ منظور ہویا تے اج اسیں بطور طبیب… معاشرے وچ اہم شناخت دے حامل آں۔


کیہ تسیں ایس بندے نوں طب دا مدد گار سمجھدے او جس نے اطباء نوں لسانی تے گروہی تعصب وچ مبتلا کر دتا تے پاکستان بھر دے حکماء نوں بے ایمان قرار دے دتا؟ ایہناں سارے عناصر نوں کٹہرے وچ لیان دی جرات پیدا کرنی ہوئے گی۔ ایہناں دی باقیات اج فیر فن شریف دے وقار دی بجائے بداخلاقی، کرادر کشی تے فحش گوئی نوں فروغ دے رہی اے… کیہ تہاڈے وچ اینا حوصلہ اے کہ کونسل دے ایس رکن دا محاسبہ کر سکو جس نے سوائے ٹی اے/ ڈی اے بنان دے کوئی ہور کم نہیں کیتا کیہ تہاڈے وچ ہمت اے کہ تسیں ایس بندے دی طب دشمنی نمایاں کر سکیے جیہڑا طبی فارما نوں پیا کے ناں اُتے انگریزی دوائواں نوں طب یونانی وچ شامل کر کے اطباء نوں ہمیشہ لئی اتائیت دا راہ وکھا گیا؟ کیہ تسیں ایہناں عناصر نوں منظر عام لیان اُتے لیان دی کوشش کرن گے جنہاں نے بزرگ اطباء حکیم سید نیئر واسطی، حکیم محمد حسن قرشی ، حکیم شرف الحق تے دیگر مشاہیر دے خلاف فحش گالیاں نال بھرے ہوئے پمفلٹ تقسیم کروائے؟کیہ تسیں ایس گل نوں سنن دا حوصلہ رکھدے او کہ کونسل دی اک کمیٹی دے چیئر مین امتحانات دے دناں وچ روزانہ دی بنیاد اُتے صرف طبیہ کالج لہور ای جاندے تے اوتھے دے طلبا نوں امتحانات تو ں باہر نکلوان دا بندوبست کراندے سن…؟ تے ایہناں دا پتر … کونسل کارکن نہ ہون دے باوجود … نال جاندا تے طلباء نوں دھمکیاں دیندا سی۔ مقررین نے کہیا کہ جے حوصلہ اے … تے ہور سنیئے… ملک دے اک مقتدر طبیب نوں حکومت تیکر رسائی ملی سی … پر … حکماء … اپنے مریضاں نوں میڈیکل سرٹیفکیٹ جاری کرن دا اختیار حاصل کرن وچ صرف ایس لئی محروم کر دتے گئے کہ … پاکستان وچ سوائے ایس اک طبیب دے باقی سب اتائی نیں … کیہ تسیں ایہہ وی جان دے او کہ کویت دی طرفوں تعمیر کیتا جان والا بوہت وڈا طب کمپلیکس، اپنے ناں نال منسوب کرن والا اک حکیم ای سی؟… کیہ تسیں ایس حقیقت توں وی آشنا نیں کہ اک طبی دو ا ساز ادارہ ہر ورھے ارباں دا ٹیکس ہڑپ کر جاندا اے؟ تہانوں ایہہ گلاں جان کے حیرانی ہوئی ہوئے گی پر ایہہ سب کجھ الزام برائے خود نمائی نہیں بلکہ حقیقت اے تے سب توں وڈا سچ ایہہ اے کہ ایہناں عناصر دی باقیات ہن جوان ہو چکیاں نیں تے لیڈر اکھواندی اے تے کیہ ایہناں عناصر دے ہتھاں وچ ہتھ پا دتے جان جیہڑے شروع دن تو ں ای طب دشمنی دا کردار ادا کر کے ناں کما رہے نیں۔


تسیں آپ سوچو کہ الائینس دی لوڑ کنہوں پیندی اے تعمیر کاراں نوں یا تخریب کاراں نوں؟ جدوں وی تعمیر دا کوئی راہ کھلدا اے تخریب اکٹھی ہو جاندی اے۔ تسیں آپ فیصلہ کرو کہ ایس دے پورکاراں دا ساتھ دینا جیہڑا مصافحے لئی ہتھ وی پورا نہیں دیندے یا ایہناں دا جیہڑا مجدد طب مسیح الملک حکیم محمد اجمل خان دے مشن دے وارث نیں؟ کیوں جے تن دے اجلے تے من دے کالے… محسن نہیں ہو سکدے۔ باقی رہی گل کسے دوا ساز ادارے دے آلہ کار ہون دی تے ایس دے متعلق اوہ بندا بہتر دس سکدا اے جیہڑا طب دے ناں اُتے اک ادارے نوں ایس لئی کیش کر رہیا اے کہ ایس دے اپنے وڈے وی ایہو تخریب کاری کردے ہوئے ایس دنیا توں چلے گئے۔ سانوں ایہناں منافق تے غدار عناصر دی حوصلہ شکنی کرنی ہوئے گی جیہڑے کلچھرے تے آپ اڑا رہے نیں پر بدنام ایہناں نوں کر رہے نیں جنہاں دی زبان فحش گوئی توں ہنوز پاک اے
اعلیٰ حضرَت!
ٹیکس چوری توں وڈی دھوکا دہی ہور کوئی نہیں ہو سکدی جنہاں نے فن طب دی بجائے صرف اپنے ادارے نوں ای ترقی دتی اوہ وی لوک طب یونانی دے تنزل دے زمیدار نیں ایہناں دے پیروکار اج وی ذاتی نمود ونمائش دی خاطر زندگی لنگھا رہے نیں ایہناں نوں طب تے طبیب نال کوئی غرض نہیں۔ جس دا ثبوت ایہہ اے کہ اوہ طب نوں پیش آئے مسئلیاں دے حل لئی اک وار وی گھر توں نکلے نکلے۔
براہ کرم! انج دے سپاں نوں پہچانو جیہڑے اپنے جرم دوجیاں دے کھاتے وچ پا کے ہمدردی سمیٹنا چاہندے نیں پر ہن ایہہ چال کامیاب نہیں ہون دتی جائے گی۔ 1965 دا یونانی آئیورویدک اینڈ ہومیو پیتھک پریکٹیشنرز ایکٹ ، شعبہ جراحت تے حجامہ دا احیا سرکاری ملازمتاں دا حصول قومی طبی کونسل دے دفتر لئی 5 کنال اراضی دا حصول تے چار دیواری دی تعمیر پاکستانی طبی کانفرنس دا ای کارنامہ اے۔
1982ء وچ حج میڈیکل مشن وچ اطباء دی شمولیت وی پاکستان طبی کانفرنس دی کیہ قیادت دے مرہون منت اے۔
1965 دے UAH ایکٹ دے مطابق نیشنل کونسل فارطب دے رجسٹرڈ طبیب خالصتاً طب یونانی طریقہ علاج دے مطابق علاج معالجہ کرن دے مجاز نیں۔ طبیہ کالج دے نصاب وچ شامل ادویات تے طبی کتب وچ درج طب یونانی دیاں دوائیاں دے مطابق ہر طبیب اپنے مریضاں دے علاج لئی دوائیاں تیار کر دین دا مجاز اے۔ نیشنل کونسل فار طب دے نوٹیفکیشن نمبر F-No,1-1/2018-NCT/3068 بتاریخ 2 مئی 2018 ء تے وزارت صحت دے نوٹیفکیشن بتاریخ 18 مئی 2009ء دے مطابق رجسٹرڈ طبیب آلات تشخیص پی پی اپریٹس، سینتھو سکوپ، تھرما میٹر وغیرہ دا استعمال کرن دا مجاز اے۔ایس دے اجراء وی طبی کانفرنس نے ای کرایا۔ ڈریپ دے نوٹیفکیشن بتاریخ 25 جنوری 2017دی رو نال کوئی وی ڈرگ انسپیکٹر ہیلتھ کیئر کمیشن دا عملہ یا محکمہ صحت دے اہلکاران، اپنے مریضاں لئی اپنے مطب اُتے دوا بنا کے دین توں منع نہیں کر سکدے۔
مذکورہ بالا سارے امور طبی کانفرنس دے تحت معرض وجود وچ آن والی نیشنل کونسل فار طب دے ایہناں ادوار وچ کیتے گئے نیں جنہاں وچ پاکستان طبی کانفرنس دے اراکین اُتے مشتمل کونسل ہویا کردی سی۔
پاکستان طبی کانفرنس مسیح املک حکیم اجمل خان تے شفا الملک حکیم محمد حسن قرشی دی یادگار نمائندہ تنظیم اے جدوں وی کدی طب تے طبیب اُتے کوئی اوکھا ویلا آندا اے تے جویں ای علم وچ آندا اے ایسے جماعت دے پلیٹ فارم توں اپنی بساط دے مطابق کوششاں کیتیاں جاندیاں نیں۔
مستقبل وچ اللہ نے موقع دتا تے اطبا نے ہمیشہ وانگوں اعتماد کردے ہوئے ذمے داری دتی تے طبی تعلیم نوں ایف ایس سی تے بی ایس سی دے مساوی قرار دلان قومی طبی فارما کوپیا دی تشکیل نو، طب کمپلیکس دی تعمیر، یونان ہسپتال دا قیام، نیچرل میڈیسن لیبارٹریز دا قیام، طب یونانی دے فروغ لئی پوری دنیا دے نال اشتراک عمل ، طبی دوا ساز کورس، جراحت ریفریشر کورس تے کئی اک نویں تعلیمی منصوبہ جات دا اجرا ایس ویلے پائپ لائن وچ اے ایہناں منصوبہ جات دی تکمیل لئی پاکستان طبی کانفرنس دا کونسل وچ آنا ضروری اے۔
ایس دے علاوہ بین الاقوامی ورکشاپاں دا انعقاد وی عمل وچ لیایا جائے گا۔ انشاء اللہ اجلاس وچ ڈاکٹر سکندر حیات زاہد، حکیم عطا ئالرحمن صدیقی،حکیم تصور محمدی،حکیم امجد وحید بھٹی،حکیم محمد اسماعیل، حکیم افضل بٹ، حکیم طاھر نوید جنجوعہ، حکیم سیف اللہ لودھی، حکیم مدثر مظفر ثواتی، حکیم انعام اللہ،حکیم ولایت علی گوھر، حکیم طاھر خان، حکیم رضا الحق نقشبندی، حکیم بابر حسن ندیم، حکیم عامر شہزاد، حکیم احمد سلیم، حکیم عمر فاروق گوندل، حکیم حامد محمود، حکیم جعفر طیار، سنے وڈی تعداد وچ اطبا نے شرکت کیتی۔

اپنا تبصرہ گھلو