بابر اعظم آئی سی سی ون ڈے ٹیم آف دی ایئر وچ شامل

دبئی: آئی سی سی نے 2019ء دے سالانہ ایوارڈز دا اعلان کر دتا پر فہرست وچ کوئی وی پاکستانی کھڈاری جگہ نہیں بنا سکیا۔

آئی سی سی دے سالانہ ایوارڈز حاصل کرن والیاں دی فہرست وچ ایس واری کوئی پاکستانی وی جگہ نہیں بنا سکیا پر پاکستان دے بابر اعظم واحد کرکٹر نیں جہناں نوں آئی سی سی دی بہترین ون ڈے ٹیم وچ جگہ مل سکی اے پر ٹیسٹ ٹیم وچ کسے پاکستانی نوں شامل نہیں کیتا گیا۔

آسٹریلیا دے فاسٹ بولر پیٹ کمنز نوں بہترین ٹیسٹ بولر دا ایوارڈ دتا گیا، اوہناں نے مجموعی طور تے 59وکٹاں اپنے ناں کیتیاں۔ ورلڈ کپ وچ انگلینڈ نوں چیمپئن بنوان وچ اہم کردار ادا کرن والے بن سٹروکس نوں آئی سی سی مینز کرکٹر آف دی ایئر دی سرگیری سوبرز ٹرافی دتی گئی اے۔

بھارتی بلے باز روہت شرما ون ڈے کرکٹ دے بہترین بلے باز قرار دتے گئے نیں۔ بھارتی کپتان ویرات کوہلی نوں سپرٹ آف دی کرکٹر ایوارڈ لئی چنیا گیا اے۔

بھارت دے دیپک چہار نوں ٹی ٹونٹی پرفارمر آف دی ایئر جد کہ مارنس لابو شین نوں ایمرجنگ کرکٹر آف دی ایئر ایوارڈ دا مستحق ٹھہرایا گیا اے۔ رچرڈ النگورتھ نوں بہترین امپائر آف دی ایئر دا ایوارڈ دتا گیا اے۔