ٹیسٹ چیمپئن شپ لئی ہر میچ جتن دی کوشش کراں گے: اظہر علی

راولپنڈی: قومی ٹیسٹ ٹیم دے کپتان اظہر علی دا کہنا اے پاکستان وچ انٹرنیشنل کرکٹ دی بحالی نال ہر پاکستانی خوش اے تے ٹیسٹ چیمپئن شپ لئی ہر میچ جتن دی کوشش کراں گے۔

راولپنڈی سٹیڈیم وچ میڈیا نال گل کردیاں ٹیسٹ کپتان اظہر علی آکھیا محمد عامر تے وہاب ریاض دے بعد شاہین شاہ آفریدی تے نسیم شاہ دی صورت وچ چنگے بولرز مل گئے نیں ایہناں فاسٹ بولر نوں ویکھ کے نویں بولر نوں حوصلہ ملے گا، سپنر ماضی وچ وکٹ لیندے نیں پر فاسٹ بولر زیادہ فائدہ مند ہوندے نیں۔

یاسر شاہ توں لوکاں دی توقعات زیادہ سن، اوہ ساڈا چیمپئن بولر اے پر ایتھے سپنر لئی زیادہ ماحول نہیں سی ایہدے باوجود اوہ اپنے آپ نوں ہر ماحول وچ ایڈجسٹ کرن دی کوشش کر رہیا اے۔فواد عالم نوں پلینگ الیون وچ شامل نہ کرن بارے پچھے گئے سوال تے اظہر علی نے آکھیا بنگلہ دیش دے خلاف اگلے میچ وچ وکٹ دے حساب نال سلیکشن کراں گے جو ٹیم لئی چنگا ثابت ہووے گا، اوہنوں کھڈایا جاوے گا، حارث سہیل بیٹنگ دے نال بولنگ وی کردا اے ایس لئی اوہنوں کھڈایا۔

اپنا تبصرہ گھلو