وسیم اکرم نے نسیم شاہ نوں بہترین دریافت قرار دے دتا

لہور: سابق کپتان وسیم اکرم نے نسیم شاہ نوں بہترین دریافت قرار دیندیاں آکھیا نسیم شاہ پاکستان کرکٹ وچ چنگا وادھا ثابت ہون گے۔

اک انٹرویو وچ وسیم اکرم دا کہنا سی نوجوان پیسر نے آسٹریلیا وچ ٹور میچ کھیڈدیاں ڈونگھا تاثر چھڈیا، پاکستان وچ فرسٹ کلاس میچاں وچ وی بہترین کارکردگی دا مظاہرہ کیتا تے اک میچ وچ 9شکار کیتے، اوہناں آکھیا جے کسے کول پیس دا ہتھیار اے، فرسٹ کلاس وچ وکٹاں وی حاصل کیتیاں ہون تے اوہ ٹیسٹ کرکٹ لئی تیار اے، میری تے وقار یونس دی کرکٹ دا آغاز وی 17ورھے دی عمر وچ ہویا۔ وسیم اکرم دا کہنا سی نسیم شاہ اپنی والدہ دے انتقال دے باوجود آسٹریلیا توں واپس نہیں گئے، سارے اوہناں نوں کھیڈدا تے پرفارم کردا ویکھنا چاہندے نیں، پاکستان کرکٹ لئی وی ایہ دور بڑی اہمیت دا حامل اے، نواں کوچ تے نویں مینجمنٹ اے، وقار یونس جہے سابق عظیم بولر دی رہنمائی وی میسر اے، ایہناں سب نوں مستحکم ہون وچ ویلا لگے گا پر پاکستان کرکٹ سدھے پاسے گامزن اے۔