پی ایس ایل بارے بہت کجھ سنیا اے، ایس واری کھیڈن پاکستان ضرور آواں گا: ہاشم آملہ

سابق سٹائلش ٹیسٹ کرکٹر ہاشم آملہ دا کہنا اے پاکستان سپر لیگ (پی ایس ایل ) دی بہت تعریف سنی اے، ایس واری کھیڈ کے آپ تجربہ کراں گا۔ ہاشم آملہ لئی 2019دا ورلڈ کپ چنگا نہیں رہیا سی تے ورلڈ کپ دے بعد اگست وچ اوہناں نے انٹرنیشنل کرکٹ توں ریٹائرمنٹ دا اعلان کر دتا سی۔

ریٹائرمنٹ مگروں ہن ہاشم آملہ دا فوکس لیگز اُتے اے، ایہناں دناں اوہ ابوظہبی وچ ہون والی ٹی ٹین لیگ وچ رلت کر رہے نیں جد کہ اوہ ہن کاؤنٹی کرکٹ لئی انگلینڈ وچ سکونت اختیار کر رہے نیں۔36سالہ سابق جنوبی افریقی کپتان ہاشم آملہ آکھیا پاکستان سپر لیگ بارے بہت کجھ سن رکھیا اے جہڑے کھڈاریاں نے وی پی ایس ایل وچ رلت کیتی اے تے میری اوہناں نال گل ہوئی اے تے اوہناں نے پی ایس ایل نوں شاندار قرار دتا تے لیگ دے معیار نوں وی اعلیٰ آکھیا اے۔