زمبابوے دے خلاف نوجواناں نوں آزمان دا ایہ بہترین ویلا اے: وقار یونس

لہور: پاکستانی ٹیم دے بولنگ کوچ وقار یونس دا کہنا اے کہنا تے نہیں چاہیدا پر حقیقت ایہ ای اے کہ زمبابوے دی ٹیم نسبتاً کمزور حریف اے ایہدے خلاف نوجواناں نوں آزمان دا ایہ بہترین ویلا ہووے گا۔ لہور وچ میڈیا نال گل کردیاں وقار یونس آکھیا مصباح الحق دی وی ایہ ای سوچ اے کہ نویں مُنڈیاں نوں موقع ملنا چاہیدا اے، ایس ویلے وی ساڈی ٹیم وچ شاہین شاہ آفریدی، حسنین، حارث رؤف اجے نویں نیں جہڑے کھیڈ رہے نیں، جے موجودہ نیشنل ٹی ٹونٹی ٹورنامنٹ وچ کوئی نواں بلے باز تے بالر مسلسل زیادہ بہتر کارکردگی وکھاندا اے تے اوہنوں زمبابوے دے خلاف سیریز وچ موقع دتا جا سکتا اے۔ اسیں سارے اوہناں دی کارکردگی تے نظر رکھے ہوئے آں۔ سارے میچاں وچ سب دی کارکردگی نوں پرکھیا جا رہیا اے۔ اوہناں آکھیا زمبابوے دے خلاف سیریز نویں مُنڈیاں لئی بہترین پلیٹ فارم ثابت ہو سکدی اے۔ ہوم سیریز وچ کھیڈنا تے پرفارم کرنا ہر کھڈاری دی خواہش ہوندی اے۔