دیس وچ موجودہ کرکٹ دا اللہ ای حافظ اے: جاوید میانداد

لہور: سابق کپتان جاوید میانداد دا کہنا اے کرکٹ بورڈ جو کجھ وی کرے ایہدے وچ مداخلت نہیں کرنا چاہندا، ویلا آپ صحیح تے غلط دا فیصلہ کردیوے گا، ایہ لوک جو وی کر رہے نیں اللہ کرے سب چیزاں چنگیاں ہون۔ لہور وچ میڈیا نال گل کردیاں عظیم بلے باز آکھیا 20ورھیاں وچ اجہی کرکٹ نہیں کھیڈی، جہڑے انداز نال موجودہ کرکٹ کھڈائی جا رہی اے، اجہی کرکٹ دا تے اللہ ای حافظ اے۔ دنیا بھر وچ کرکٹ دی بنیادی چیزاں نوں نہیں بدلدے، فائن ٹیون ضرور کردے نیں ، ایہ کھڈاری تے منحصر اے، اوہ آپ اپنے کھیڈ وچ بہتری لیان لئی سیکھے۔ سابق کپتان دا موقف اے کہ کرکٹ وچ میرا باب بند ہو چکیا، میں جنی کرکٹ کھیڈنی سی، عزت دے نال کھیڈی، ساری دنیا جان دی اے، پاکستان وچ کوئی ایس چیز نوں منے یا نہ منے، مینوں ایہدے توں کوئی فرق نہیں پیندا۔ لوک میرے نال محبت کردے نیں تے عزت دیندے نیں جہڑا میرا سرمایہ اے۔