سینئر تے جونیئر/ستر ورھے

DR Kramat Mughal

میں پنجابی غزل دا شاعر آں،ایس لئی ہر ہفتے ہوون والے جتھے وی ہووے مشاعرے دی سُوہ رکھنا میرے تے فرض اے۔ایسے کر کے ای تاں کئی وار گھر لڑائی وی پے جاندی اے کہ آخر صرف مشاعرے ای رہ گئے نیں ،زندگی وچ۔۔۔۔پر گھر والیاں نوں کیہ پتا اوہناں دی سوچ عام لوکاں والی ای سوچ اے جو ادب نوں کسے صورت وی سمجھ نہیں سکدے ناں۔
حالے کل ای تاں منڈی عثمان والے اک وڈے مشاعرے وچ ساری رات بِتا کے آیا واں۔اج وی ایس مشاعرے دی سُوہ کدھروں مِل ای گئی تے ایتھے آنا تاں میرے تے فرض اے ناں۔گھروں بس نکل ای آیاواں۔ اج تے کہ کے آیاواں دس وجے تک گھر اپڑ آواں گا کیوں کہ اج مشاعرے دا نہیں دسیا اے۔اُنج وی ہفتے وچ دو تِن مشاعرے تاں پھڑے ای جاندے نیں۔
میں اک جونئیر شاعر آں تے مینوں پتا اے مشاعرے دے مُڈھ وچ ای میری واری آ جانی اے۔ایس لئی میں بہت اُتائولا ہویا بیٹھا آںکہ ہُن واری آئی کہ آئی۔حالے کل ای منڈی عثمان والے وچ شاعراں نوں جھگڑیاں توں بچایا اے۔
”میں نہیں پڑھنا ،اوہدے توں پہلے” کئی شاعراں نے سُنایا۔
”ہر کوئی اپنے آپ نوں سینئر سمجھدا اے ،تے اپنے آپ نوں سبھ توں اخیر تے پڑھنا چاہندا اے ”کمپیئرنگ نے اپنی معذوری وکھائی سی۔
”بئی کسے شاعر نوں ناراض نہیںکرنا” مشاعرے دی پربندھک کمیٹی نے دسیا۔بڑی مشکل نال لسٹ بنائی گئی پر اخیر تے کئیاں دے ”مونہ” بنے ہوئے سن۔
”میں تاں جونیئر شاعر آں،مینوں کیہ فرق”میں رنگ رنگ دیاں بلدیاں بتّیاں نوں ویکھدیاں وڈے سارے ہال وچ بیٹھے لوکاں دے ذوق نوں پرکھن لئی جویں اُڈدی جہی نگاہ ماری۔
” ایتھے تاں پورے پنجاب وچوں شاعر آئے نیں” میں شاعراں نوں ویکھ کے سوچیا،جو طرحاں طرحاں دیاں بولیاں بول رہے سن۔
ٹھیک سَت وجے مشاعرا شروع کر دِتا گیا۔
کمپئرنگ کرن والا آپ وی ریڈیو دا چنگا بُلیار سی’ اوس نے اک سماں بنھ دِتا۔پر حالے اک دو شاعراں نے ای اپنا کلام سُنایا سی کہ چالھی شاعراں وچوں ہر کوئی یاں تاں پرچی گھل رہیا سی،گھل رہی سی یاں فیر رمکے رمکے کمپئیرکول آ کے اپنی واقفیت دی دہائی پا ن لگا۔ جس نال سینئر پہلاں پڑھی جاندے سن ۔فِر سٹیج توں تھلے،اک فائل نوں کَچھ وچ دبائی کھڑے بندے کول جا کے کھلو جاندے ۔شاعر صاحب اک لفافا پھَڑ کے فائل تے دست خط کر کے ہال وچوں کوئی پنج سَت بندیاں نوں وی جواصل وچ اوہناں شاعر نال آئے دادیے سن۔اوہناں نوں لے کے ہال وچوں غائب ہو رہے سن۔
اج ہر کوئی اپنی سنیارٹی بھُلی پھردا ، دوجیاںتوں پہلوں پڑھن لئی مِنتاں ترلے کری جا رہیا۔اج کوئی وی سینئر نہیں سی تے ہر کوئی جونئیر بنی پھِردااے کوئی ناراض وی نہیں ہو رہیا۔
مینوں کافی دیر بعد اصل رولے دا پتا چلیا کہ اج کوئی جھگڑا نہیں ہو سکدا اے۔ اج کوئی اناء والا مسئلا ہے ای نہیں اصل مسئلا تاں چیک دا سی،جس توں جیب گرم ہو جانی سی۔۔۔۔
٭٭٭
”میں پنجابی کہانیکار آں”
”میں پنجابی شاعر آں”
”میں پنجابی ناول نگار آں”
”میں پنجابی کھوجکار آں”
”میں پنجابی دا استاد آں”
”میں جلوس کڈھن والا لیڈر آں”
”میں فیس بُک اُتے چھایا رہنا،پنجابی پنجابی کردا”
”میں پنجابی دے ناں اُتے پنجابی واسطے لڑ مر سکنا”
سارے میز اُتے پئے چاہ دیاں کپاں نوں پی کے ویلھا کر چُکے سن۔ ایہ اک فائیو سٹار ہوٹل وچ لگے میز دے دوالے بیٹھے گلاں کر رہے سن۔
”پچھلے ستر ورھیاں توں ایہ ایتھے آ کے ایوں ای گلاں کردے نیں تے خورے اگلے کنّے ورھے انج ای ہوندا رہوے گا، سبھ توں وڈیری عُمر دے پچھلے ویٹر نے وی مینوں ایہ ای گلاں سُنائیاں سن اوہنوں مریاں وی پون صدی بیت گئی اے۔”اک ویٹر نے دوجے نوں دسیا” اوہ وی پنجابی دا کوئی پیارا سی جو ایہناں دیاں گلاں تے افسوس کردا”
میز تے اک خالی کپ انج ای پیا رہیا شاید ایہ کسے اوس پنجابی دا سی جو پنجابی سیوا پاروں کدے وی نہیں سی آسکیا۔ویٹر نے خُشی نال اوہ کپ چُکیا کیوں جے ایہ اوس نوں دھونا نہیں سی پینا۔٭٭

اپنا تبصرہ گھلو