آکھن لو ک سیانے

Ahsan Bajwa

بھاکھرے تاں بھائی’ نہیں تاں وڈھ قصائی
معنے: بھاکھرے:پیار کرے
ویروا: ایس اکھان وِچ مت دِتی گئی اے پئی ایس جگ اندر جے بھرا وی پیار کرئے اتے اؤکھے ویلے سنگ کرے تاں بھرا اکھوا سکدا اے اتے جگ تے اوس توں چنگا کوئی نہیں ہوندا۔ نہیں تاں اوس وِچ اتے وڈھا گوشت کرن والے قصائی وِچ کوئی فرق نہیں رہ جاندا۔دوویں ای اگلے دا حق کھان والے ای رہ جاندے نیں۔
بھانڈے دا مُونہ موکلا ہووے تاں کُتے نُوں تے شرم کرنی چاہیدی اے
معنے:موکلا: کھُلا۔
ویروا:مت دِتی گئی اے پئی جے کر اگلا بندہ کِسے گل توں گھر آئے ہوئے بندے دی شرم کردا ہووے تاں آئے ہوئے بندے نُوں وی اوس گھر والے دی شرم کرنی چاہیدی اے۔اتے اوس دے مال نُوں اپنا مال ای نہیں سمجھ لینا چاہیدا۔
بھانڈے وِچ جو پائیے سویو اُچھلدا اے
معنے: سویو: اوہ ای
ویروا: ایس اکھان وِچ مَت دِتی گئی اے پئی جو کُجھ کِسے دے دِل وِچ ہووے اوہ ہروُ مرو اوس دے مُونہ تے آ ای جاندا اے۔ بھانویں کوئی اوس نُوں لکھ لُکاندا رہوے۔ ایس لئی اوڑک سچ نِتر ای جاندا اے اتے اوس نُوں چوکھا چِر لُکایا نہیں جا سکدا۔
بھانڈیاں وِچ اِک توا وی ضروُر ہوندا اے
معنے: بھانڈیاں؛ برتناں۔
ویروا: ایس اکھان وِچ مَت دِتی گئی اے پئی گھر وِچ سارے ای جی وی جے چنگے ہون تاں وی اوہناں وِچ کوئی نہ کوئی کؤڑے سبھا دا جاں اوہناں نُوں لِیک لان والا وی ضرور ہووے گا۔ایس لئی کِسے ہور دے مُونہ نُوں کِسے دا لِیا کرنا پے ای جاندا اے۔
وارث شاہ لُکائیے خلق کولوں بھانویں اپنا ای گُڑ کھائیے جی
معنے: خلق: دُنیا’ خُدائی۔
ویروا: ایس اکھان وِچ مت دِتی گئی اے پئی ہر بندے نُوں اپنا ہر کم لوکاں کولوں پردے وِچ رہ کے ای کرنا چاہیدا اے۔بھانویں اوہ اپنی ای کوئی شَے کھان لگے پر اوس نُوں لوکاں کولوں چھُپا لَینی چاہیدی اے تانجو اوہ حاسداں دی نظر توں بچیا رہوے۔اتے رب وی پردے وِچ ای راضی ہوندا اے۔٭٭

اپنا تبصرہ گھلو