آکھن لوک سیانے

Ahsan Bajwa

احسان باجوہ

پہلاں اپنا’ فیر پرایا
ویروا: مت دِتی گئی اے پئی جدوں وی کوئی شَے دان کرن لگیے تاں پہلاں اپنے نِگدیاں وَل نظر مارنی چاہیدی اے اتے جے اوہناں وِچ کوئی لَین والا نہ ہووے تاں پرائے لوکاں نُوں دان کرنا چاہیدا اے۔
پہلاں تولو’ فِیر بولو/ پہلوُں تول’ پِچھوں بول
ویروا: مت دِتی گئی اے پئی بندے نُوں گل کرن توں پہلاں اوس چوں نِکلن والے نتِیجے بارے سوچ لَینا چاہیدا اے۔تاں مُڑ اوس نُوں مُونہوں پھُٹنا چاہیدا اے۔
پہلوان’ ساہن’تے کاہن آخری عُمرے دھکے ای کھاندے نیں
معنے: ساہن: مجھاں گانواں نُوں نویں دُدھ کرن لئی چھڈیا ڈھگا وچھا جاں سنڈھا٭ کاہن:نجوُمی جوتشی۔
ویروا: مَت دِتی گئی اے پئی پہلوان دی وڈھیری عُمر گوڈیاں گِٹیاں دیاں درداں نال لڑدیاں گُذردی اے۔ اتے ساہن وی جدوں ماڑا ہو جاوے تاں ہر کِسے کولوں ٹکراں ای کھاندا پھِردا اے ۔ تھاں تھاں پھالاں پاکے کمائی کرکے لیاؤن والا جوتشی وی اخِیری عُمرے گھردیاں کولوں ای جُگتاں کراندا اے۔
پہلے آتما’ فیرپرماتما
معنے: آتما: رُوح٭ پرماتما: وڈھی رُوح’ رب۔
ویروا: مَت دِتی گئی اے پئی رب دا منن وی چنگی طرح رج کھاون توں مگروں ای ہوندا اے۔ اتے بھُکھے بندے دا کوئی دِین ایِمان نہیں ہوندا۔پہلاں بندے نُوں کھان لئی روٹی دیو فیر اوس کولوں مذہب تے پکا رہن دی آس لائو۔
پہؤناں پانی اِچ’ ڈرنا چھِندکاں کولوں
معنے:پہؤناں: بھؤنا: پَیر پانا’ ٭ چھندکاں: چھِٹاں۔
ویروا: مت دِتی گئی اے پئی جدوں بندہ پانی وِچ وڑ ای جاوے تاں اوس نُوں پانی دیاں چِھٹاں کولوں نہیں گھابرنا چاہیدا۔جدوں آپ پہلاں بدی دا بی بیج لیا مُڑ کنڈیاں توں ڈرن کاہدا۔ (جاری اے)

اپنا تبصرہ گھلو