آکھن لوک سیانے

احسان باجوہ

تُرٹی تانی سؤکھی نہیں سنبھلدی.
معنے: تُرٹی: ٹُٹ گئی۔
ویروا: ایس اکھان وِچ مت دِتی گئی اے پئی تنداں جوڑ کے تانی تیار کردیاں کِسے وجہ پاروں کُجھ تنداں ٹُٹ جان تاں تانی نُوں مُڑ ٹھِیک کرن اؤکھا ہو جاندا اے۔اِنج ای گھراں وِچ پواڑے پئے چھیتی ٹھیک نہیں ہوندے۔
تُردا جاگدا’ بَیٹھا سُتا’سُتا مویا’ اِک بروبر
معنے: مویا: مریا۔
ویروا: ایس اکھان وِچ مت دِتی گئی اے پئی پَینڈے پیا بندہ ای چنگا ہوندا اے جو راہ وِچ بہ کے سؤں جاوے اوس دا پَینڈا کھوٹا ہوندا اے۔ اتے سؤں گیا تے مر گیا اِک برابرہوندے نیں۔
تُردے اتے نٹھدے دا کیہ جوڑ
معنے: جوڑ: مقابلہ۔
ویروا: ایس اکھان وِچ مت دِتی گئی اے پئی جدوں اِک بندہ نٹھ رہیا ہووے اتے دوجا ٹُر رہیا ہووے تاں نٹھن والا تاں لازمی اگے لنگھ ای جاوے گا۔
تریل مُڈھِیں پَیندی اے
معنے: تریل: اؤس٭ مُڈھِیں: مُڈھاں نال
ویروا: ایس اکھان وِچ مت دِتی گئی اے پئی جدوں وی کوئی جھگڑا جھیڑا ہووے تاں ہر کوئی اپنیاں وَل دا پَکھ مارن دی کوشش کردا اے۔خُدا لگدی کوئی گھٹ ای کردا اے۔٭٭