ڈَر

بلوِندر کور کھرانا

رجونت دا ویاہ ہوئے نوں اجے پنج چھیج مہینے ہی ہوئے سن کہ اوس نوں دن چڑھ گئے۔ رجونت اتے اوس دا خاوند دوویں بہت خوش سن۔گھر وچ نویں جی دے آن دی تیاری شروع ہو گئی۔ رجونت دی طبیعت ڈھلی رہن لگی۔ روٹی اس دے گلے تھلیوں نہ اتردی، گلا دکھدا الٹیاں آندیاں تے ایس توں آفس وچ کم کرنا اوکھا ہوجاندا۔ اِک دن رجونت نے اپنی سس بھجن نوں کیہا، بی جی! گلا دکھدا اے، روٹی کھاہدی نہیں جاندی، کھا لواں تاں الٹیاں آندیاں نیں۔
رجی! لے آہ کیہڑی گل اے؟ ایہناں دناں وچ تاں ایہہ عام ہی ہوندا اے۔ ایویں نہ گھابر۔ بھجن نے کیہا۔
بی جی! ٹیسٹ کرا لواں؟
بئی میرے ‘صاحب نال تاں ڈاکٹراں دے بہتا جانا چنگا نہیں۔ڈاکٹر تاں جھٹ الٹراسانڈ کہہ دیندے آ۔ اثر تاں بچے دی صحت ‘تے پیندا اے۔ میں تینوں نرس چاچی توں دوائی لیا دوں۔
رجی سوچن لگی کہ بی جی ٹھیک ہی کہندے نیں۔ ماں وی کہندی سی کہ اینہیں دنیں کئی عورتاں دی تاں باہلی طبیعت خراب رہندی اے۔ فیر اوس نوں یاد آیا، گلا تاں اوس دا پہلاں وی کئی وار دکھدا سی۔ماں تیل نال گلا مل دیندی سی تے گرم گرم شِیرا پیا دیندی سی، فرق پے جاندا سی۔ جدوں رجو دی طبیعت بہت خراب ہوندی تاں اوہ گھر دے کول ہی لیڈی ڈاکٹر توں دوائی لے آندی۔ آن والے بچے دی خوشی وچ اوہ سبھ کجھ بھل جاندی۔ دلبیر دے چا نوں ویکھ کے تاں اوس نوں اپنی تکلیف بھل جاندی تے رات نوں دوویں نکیاں نکی گلاں وچ مست ہو جاندے۔
سویرے اٹھ کے رجو دفتر جاندی پر اوس دی کم کرن دی ہمت نہ ہوندی، ایس لئی دلبیر دی صلاح نال اوس نے چار مہینے پہلاں ہی دفتر توں چھٹی لے لئی۔ ہن رجو نوں آرام ہو گیا۔ ہن اوہ اپنے لئی ہلکیاں ہلکیاں چیزاں جیویں دلیِا، کھچڑی وغیرہ بنا لیندی تے رات ویلے شیرا پی لیندی۔ ایس طرحاں دن بیتدے گئے تے آخر اوہ دن وی آ گیا، جس دا اوہناں نوں انتظار سی۔
رجو نے اک کڑی نوں جنم دتا، جس نوں ویکھ رجو تے دلبیر بہت خوش ہوئے۔ پر اوہناں دی ساری خوشی ادوں ہوا وانگ اڈ گئی، جدوں ڈاکٹراں نے دسیا کہ کڑی دا جسمانی اتے ذہنی وکاس عام بچیاں وانگ نہیں ہے۔ ڈاکٹراں نے رجو دے اتے کڑی دے سارے ٹیسٹ کیتے تاں پتہ چلیا کہ رجو نوں کجھ سالاں توں تھائیرائیڈ سی، جس کرکے بچے دا جسمانی اتے ذہنی وکاس عام بچیاں وانگ نہیں سی۔ رجو اتے دلبیر اتے تاں جیویں بجلی ڈگ پئی۔ رجو نوں ہن سمجھ آیا کہ اس دا گلا کیوں دکھدا رہندا سی۔
رجو نے اپنا علاج وی شروع کروایا تے کڑی نوں لے کے وی اوس نے کئی ڈاکٹراں دے دھکے کھادے۔ آپ تاں اوہ دوائیاں دے سہارے ٹھیک رہن لگی پر کڑی بارے کسے وی ڈاکٹر نے کوئی امید نہ جگائی۔ رجو دیاں جنیپا چھٹیاں (میٹرنٹی لِیو) ختم ہو گئیاں۔اوہ دو دن دفتر گئی تے فیر چھ مہینے دی چھٹی لئی عرضی دے دتی۔ کڑی سال دی ہو گئی سی۔ نہ اوہ بیٹھدی سی، نہ رِڑھدی اتے نہ ہی عام بچیاں وانگ کھیڈدی اتے کھاندی پیندی سی۔ بس لمی ہو رہی سی۔ ہر ویلے اوس نوں چکنا پیندا سی۔ اِک اِک چمچ دودھ مونہہ وچ پانا پیندا، بوتل نال ہن اوہ پیِندی نہیں سی۔ دلبیر اتے رجو اوس رب دے جی ول ویکھدے اتے دل دکھی کردے رہندے۔
ہن رجو دیاں چھٹیاں ختم ہو گئیاں۔ اگوں ہور چھٹی نہ ملی۔ فیر کنی دیر چھٹی تے رہنا پوے، ایہہ وی تاں نہیں پتہ سی، ایس لئی اوس نے دفتر جان دی سوچی۔ ایہہ گل جدوں دلبیر نے اپنی ماں نال کیتی تے اوس نے کیہا، دلبیر رجو نے دفتر جانا اے، جی صدقے جاوے، پر میں سارا دن کڑی نہیں سنبھال سکدی۔

ہسدا کھیڈدا بچہ ہووے تاں تے میں سنبھال لاں، پر ایہنوں…..میرے ہڈاں چ دم نہیں۔ کوئی نوکرانی رکھ ل، سارا دن لئی تاں تے ٹھیک ہے۔
دلبیر جان دا سی کہ ماں لئی ایہہ کم واقعہ ای اوکھا ہے۔ اوہناں نے بڑی کوشش کیتی پر کوئی وی کم کرن والی ایہو جیہے بچے نوں کھن واسطے تیار نہ ہوئی۔ پھر دلبیر نے رجو نوں کیہا، رجو، توں اپنی ماں نال گل کر، جے اوہ من جے تاں، اوتھے تاں تیریاں دو بھرجائیاں وی ہن۔
ٹھیک ہے میں کردی آں گل۔ رجو نے کیہا۔
رجو نے ماں نال گل کیتی۔ دِھی دی پریشانی ویکھ کے اوہ من گئی۔ ہن رجو روز سویرے کڑی نوں ماں دے گھر چھڈدی تے شام ویلے لین جاندی۔ رجو دیاں بھرجائیاں وی کئی وار کلپدیاں کیوں کہ کڑی وڈی تاں ہو رہی سی پر اوہ نہ تاں کجھ بولدی، نہ چلدی، پِھردی، ایتھوں تک کہ ٹٹی پیشاب وی اوہ وچے ہی کر دیندی۔ رجو اتے دلبیر دی زندگی وی کڑی دے آلے دوآلے ہی گھمدی رہندی۔ کڑی ساڈھے چھ سال دی ہو گئی سی۔ فیر اِک دن اوس نوں بخار چڑھیا۔ علاج کروایا پر کڑی بچ نہ سکی۔ دلبیر اتے رجو بہت دکھی ہوئے تاں بھجن نے کیہا، واہگورو دا شکر کرو کہ ویلے سر سمیٹی گئی نہیں تاں پتہ نہیں ہور کنیاں مشکلاں آندیاں۔
کڑی دے جان پچھوں سبھ خالی ہو گئے۔ بھاویں اوہ جیہو جیہی وی سی، سبھ اوس دے کارن رجھے ہوئے سن۔ رجو اتے دلبیر نے دوجا بچہ کرن دا من بنایا۔ ایس وار اوہناں نے ڈاکٹراں دیاں پوریاں ہدایتاں دا پالن کیتا پر حمل نہ ٹھہریا۔ کئی ڈاکٹراں دی صلاح لئی پر سبھ دی اِکو رائے سی کہ حمل نہ ٹھہرن دا کارن وی تھائرائڈ ہی ہے۔ اِک دن دلبیر نے رجو نوں کیہا، رجو! آپاں بچہ گود لین دی سوچیے؟
گل تاں تہاڈی ٹھیک ہے پر بچہ لواں گے کتھوں؟
سوچدے ہاں، بی جی نوں پچھ لیندے ہاں۔
ٹھیک ہے۔ رجو نے آکھیا تے اوہ دیویں گل کرن لئی بی جی دے کمرے وچ چلے گئے۔ دلبیر نے آکھیا، بی جی! اسیں بچہ گود لین دی سوچ رہے ہاں، تسیں دسو تہاڈی کیہ صلاح ہے؟
بی جی کجھ دیر چپ رہے، جیویں کجھ سوچ رہے ہون تے پھر بولے، ویکھو! میری گل دھیان نال سنو، بچہ لینا ہے تاں پیکے سوہرے پریوار وچوں کسے دا لے ل پر باہروں کسے دا بچہ نہیں لینا۔
رجو دے جیٹھ جیٹھانی دے بچے تاں وڈے ہو چکے سن، ہاں دیور دا منڈا چھوٹا سی۔ دلبیر نے بھرا نوں کیہا، شنٹی، توں اپنا منڈا ساڈی جھولی پا دے۔
ایس توں پہلاں کہ بھرا کجھ بولدا، بھرجائی بول پئی، ویر جی! ساڈے کول کیہڑے بہتے ہن، اِک دھی تے اک پتر ہی تاں ہے تے میں اپنا پتر کیویں دے دیاں؟
بھابی! تہانوں رب ہور دے دو۔
ایہہ وی تاں رب نے ہی دتا ہے، برا نہ منیو پر میں اپنے جگر دا ٹکڑا نہیں دے سکدی۔
رجو اتے دلبیر مایوس ہو گئے۔ پھر رجو نے پیکے گھر ول نظر ماری۔ اجے اوہ بھرا نال گل کرن بارے سوچ ہی رہی سی کہ پیکیوں سنیہا آ گیا کہ بھرا دے گھر ست سال پچھوں دوجا منڈا ہویا ہے۔
رجو بھرا دے گھر ودھائی دین گئی تاں بچے نوں گودی چک کے اوس نے بھرا نوں آکھیا، ویر جی! ویکھو میری گودی وچ کنا سوہنا لگدا اے، ایہہ بچہ تاں تسیں مینوں ہی دے دیو۔
اوس دی بھرجائی نوں تاں گل سمجھ نہ آئی کہ رجو مذاق کر رہی ہے جاں سچیں کہہ رہی ہے پر اوس دا بھرا سمجھ گیا۔ بچہ دین دا حوصلہ اوس دا وی نہ پیا کیونکہ رجو دی بھرجائی تاں دوسرا بچہ نہیں سی کرنا چاہندی پر خاوند دے وار وار کہن ‘تے ہی اوہ ایس لئی تیار ہوئی سی۔ ایس لئی رجو دے بھرا نے رجو نوں کیہا۔

، رجو، ایتھے پلیا یاں اوتھے پلیا، تیرا ہی تاں ہے، توں جدوں مرضی آ کے اوس نال کھیڈ لیا کر۔
بھاویں رجو دے بھرا نے اوس نوں ودھیا طریقے نال منع کر دتا پر رجو دے دل پیکیوں وی ٹٹ گیا۔
رجو اتے دلبیر دکھی تاں ہوئے پر رب دی رضا منن توں سوا اوہناں کول ہور کوئی چارہ نہیں سی۔ رجو دفتر وچ اپنیاں سہیلیاں اگے دل ہولا کردی۔ رب دا بھانا کہ رجو دی سہیلی سنتوش دی بھرجائی دی جنیپے وچ ہی موت ہو گئی۔ اِک دھی اس دی پہلاں سی تے دوجی نو جمی نوں چھڈ اوہ تر گئی۔ رجو سنتوش دے پیکے گھر افسوس کرن گئی۔ اوتھے اوس دودھ مونہیں بچی نوں روندے ویکھ کے رجو دا دل بھر آیا۔ رجو نے اوس نوں چک کے سینے نال لایا تاں اوس دی ممتا کرلا اٹھی۔ سنتوش نے اِک نظر اپنی بھتیجی ول ویکھیا تے اک نظر رجو ول۔ فیر اوس نے رجو نوں کیہا،
رجو! برا نہ منے تاں اِک گل کہاں؟
ہاں بول، کیہ کہنا چاہندی اے۔
رجو ایس کڑی نوں توں گود لے لے، ایتھے ایہہ رل جائے گی، تینوں بچہ مل جائے گا تے اوس نوں ماں۔
رجو اندروں خوش تاں ہوئی پر اوہ کجھ سوچ کے بولی، سنتوش! بی جی نے نہیں مننا۔
رجو بی جی نوں دلبیر آپے منا ل گا، توں بس ہاں کر دے۔ویکھ توں اوہناں دا بچہ لینا چاہندی اے، جو تینوں دینا نہیں چاہندے۔ توں اوس بچے نوں کیوں نہیں اپناندی، جس نوں تیری لوڑ اے۔
رجو سوچیں پے گئی تاں سنتوش نے کیہا، اسیں تینوں قانونی طور تے بچہ دیاں گے تے ایہہ وی لکھ کے دیاں گے کہ اج توں بعد بچے اتے ساڈا کوئی حق نہیں ہوویگا۔
رجو نے دلبیر نال گل کیتی، اوہ وی من گیا تے قانونی طور تے بچہ گود لے لیا گیا۔
دلبیر دی ماں بھجن نے اعتراض کیتا تاں دلبیر نے آکھیا،
بی جی! تسیں ویکھیا ہے نہ کہ گھر وچوں کوئی بچہ دین نوں تیار نہیں۔
ماں چپ کر گئی۔ رجو اتے دلبیر نے اِک چھوٹا جیہا فنکشن کیتا تے نیڑے دے رشتے داراں اتے سہیلیاں دوستاں نوں بلایا۔ رجو دی سہیلی سنتوش تے سندیپ وی آئیاں۔ سندیپ تے رجو اکٹھیاں پڑھیاں سن۔ اوس دا خاوند سنگاپور دی عالمی کمپنی وچ کم کردا سی تے کجھ دناں وچ اوہ وی اپنے بیٹے نوں لے کے سنگاپور خاوند کول رہن جا رہی سی۔ سنتوش تے سندیپ دوویں رجو دے فیصلے ‘تے بہت خوش سن تے باقی رشتے دار وی۔ رجو نوں اپنی دِھی رب دی دتی اسیس لگدی سی،اس لئی اس نے اس دا نام وی اسیس ہی رکھیا۔
اسیس دے آن نال رجو اتے دلبیر دی زندگی وچ بہار آ گئی۔ اوہ گولو مولو جیہی اسیس جدوں نکیاں نکی کھیڈاں کردی تاں سبھ دا دل جت لیندی۔ دلبیر دی ماں بھجن نے کجھ دن اوپراپن کیتا پر اسیس دی مسکان اگے اوہ وی جھک گئی۔ اسیس تن سال دی ہوئی تاں سکول داخل کروایا گیا تے قانون انوسار ماتاپتا دے کھانے وچ رجونت کور تے دلبیر سنگھ دا ناں لکھیا گیا۔
دوویں جی بہت خوش سن۔ ہن اسیس وڈی ہو رہی سی، جدوں اوہ ٹھکا جیہا بستا موڈھے تے پا سکول جاندی تاں دوویں میاں بیوی دیاں اکھاں نوں ٹھنڈھک پہنچدی۔
ہن رجو نوں اک ہور ڈر نے گھیر لیا کہ کوئی اسیس نوں اس دے اصلی ماں پیو بارے نہ دس دیوے تے اوہ اوہناں کول جان دی ضد کرے۔ ویسے تاں رجو نوں سنتوش نے دسیا سی کہ اس دے بھرا نے ووہٹی مرن دے چھ مہینے پچھوں ہی ویاہ کروا لیا سی تے ہن اوس دا اک منڈا وی سی۔ بھاویں رجو اتے دلبیر نے سارے رشتے داراں اتے جانکاراں نوں منع کیتا سی ۔

کہ اوہ اسیس نوں اس دے جنم بارے کجھ نہ دسن پر پتہ نہیں کیوں اوہناں نوں ڈر رہندا کہ کوئی کسے دن اسیس نوں اصلیت نہ دس دیوے۔ رجو اتے دلبیر نے اسیس نوں بڑیاں ریجھاں نال پالیا۔ جس چیزتے اوہ ہتھ رکھدی، اوہ کدی منع نہ کردے۔ دلبیر تاں دفتروں آ کے کنی کنی دیر اس نال کھیڈدا رہندا۔ کدی اوس دا گھوڑا بندا، کدی موڈھے تے چک کے کھڈاندا، کدی پیراں تے بٹھا جھوٹے ماہیاں کردا۔ جدوں رجو روٹی بنا کے لے آندی تاں ہی اوہناں دیاں کھیڈاں رکدیاں۔
رجو تھوڑے کو دناں بعد دلبیر اگے اپنے من دا توکھلا ظاہر کردی، سنو جی! جے اسیس نوں کسے نے دس دتا کہ اسیں اوس دے اصلی ماں پیو نہیں، فیر؟
ہن تاں دلبیر وی اس بارے گمبھیر ہو کے سوچن لگ پیا سی۔ دلبیر نے کسے دور دی کالونی وچ نواں گھر لے لیا، جتھے پہلاں کوئی اوہناں نوں جاندا نہیں سی۔ نویں کالونی وچ آ کے رجو وی کجھ بے فکر ہو گئی سی۔
سماں اپنے حساب نال چل رہیا سی۔ اسیس نویاں پلانگھاں پٹ رہی سی۔ اوہ پڑھائی وچ وی ہشیار سی تے ڈانس وی بہت سوہنا کردی سی۔ دلبیر اس دیاں ویڈیو بنا بنا کے سبھ واقفاں نوں وکھاندا رہندا۔ اسیس ہن دسویں جماعت وچ ہو گئی سی۔ اِک دن رجو دی سہیلی سندیپ سنگاپور توں آئی۔ رجو نوں ملن دے ارادے نال اوہ اوس دے گھر گئی پر اس نوں پتہ لگیا کہ رجو ہوریں ایتھوں چلے گئے ہن تاں اوہ اوس دے پیکے گھروں نویں گھر دا پتہ لے کے اوتھے ملن لئی پہنچی۔
دوویں سہیلیاں ورھیاں بعد اک دوجے نوں مل کے بہت خوش ہوئیاں۔ رجو نے اسیس نوں بلا کے سندیپ نال اس دی جان پچھان کرائی، اسیس! ایہہ ہے تیری ماسی سندیپ، سنگاپور توں آئی ہے۔
اسیس نے سندیپ نوں ست سری اکال بلائی اتے رجو دے کہن تے سندیپ لئی چاہ بنان چلی گئی۔ اسیس چاہ بنا لیائی تاں سندیپ نے اسیس نوں جیکیٹ پھڑاندے ہوئے کیہا، اسیس بیٹا! ایہہ تیرے لئی ہے تے دوجی تیری ممی لئی۔
اسیس نے ماسی دا شکریہ کیتا تے تنوں جنیاں چاہ پین لگ پئیاں۔ چاہ پیندے پیندے رجو دا دھیان مٹھیائی دے ڈبے ‘تے پیا تاں اس نے سندیپ نوں کیہا، سندیپ! ایہہ مٹھیائی کیوں لیائی اے؟
رجو تینوں پتہ اے نہ، میرے چھوٹے بھرا دے گھر اجے تک کوئی بچہ نہیں ہویا سی…۔
اچھا! پھر تاں خوش خبری ہے، چھیتی دس کڑی ہوئی کہ منڈا۔
ہویا نہیں رجو، اوس نے وی تیرے وانگ کڑی گود لئی ہے۔
سندیپ سہج سبھا ہی ایہہ سبھ کجھ کہہ گئی۔
گل سن کے رجو دا رنگ اڈ گیا۔ جس گل توں اوہ اینے سال ڈردی رہی، اج اوہ ساہمنے آ ہی گئی۔ رجو نے اسیس ول ویکھیا، اوہ سبھ کجھ سن چکی سی۔ سندیپ نوں وی اپنی غلطی دا احساس ہو چکیا سی پر ہن کیہ ہو سکدا سی، تیر تاں کمان وچوں نکل چکا سی۔ ہن رجو اتے سندیپ دوہاں لئی بیٹھنا اوکھا ہو گیا سی۔ اسیس اٹھ کے اندر چلی گئی۔ سندیپ نے رجو توں اپنی غلطی لئی معافی منگدے کیہا، رجو مینوں معاف کر دے، میں ایہہ جان بجھ کے نہیں کیتا، پتہ نہیں کیویں میرے مونہوں اچانک نکل گیا۔ اینا کہہ کے سندیپ چلی گئی۔
سندیپ دے جان پچھوں رجو اسیس دے کمرے وچ گئی۔ اوس نوں ویکھیا کہ اوہ مونہہ تے چادر لے کے لیٹی ہوئی سی۔ رجو نے اس نوں آواز ماری،
اسیس، اسیس۔ پر اوہ کجھ نہ بولی۔ رجو نے اس نوں اٹھا کے گل کرنا ٹھیک نہ سمجھیا۔ اس نے سوچیا کہ دلبیر آ جاوے، پھر ہی گل کراں گی۔ اندروں اندروں اس نوں ڈر ستا رہیا سی۔

ہن رجو اتے سندیپ دوہاں لئی بیٹھنا اوکھا ہو گیا سی۔ اسیس اٹھ کے اندر چلی گئی۔ سندیپ نے رجو توں اپنی غلطی لئی معافی منگدے کیہا، رجو مینوں معاف کر دے، میں ایہہ جان بجھ کے نہیں کیتا، پتہ نہیں کیویں میرے مونہوں اچانک نکل گیا۔ اینا کہہ کے سندیپ چلی گئی۔
سندیپ دے جان پچھوں رجو اسیس دے کمرے وچ گئی۔ اوس نوں ویکھیا کہ اوہ مونہہ تے چادر لے کے لیٹی ہوئی سی۔ رجو نے اس نوں آواز ماری،
اسیس، اسیس۔ پر اوہ کجھ نہ بولی۔ رجو نے اس نوں اٹھا کے گل کرنا ٹھیک نہ سمجھیا۔ اس نے سوچیا کہ دلبیر آ جاوے، پھر ہی گل کراں گی۔ اندروں اندروں اس نوں ڈر ستا رہیا سی۔
کہ پتہ نہیں اج کیہ ہوویگا؟ اسیس دا کیہ پرتیکرم ہوویگا؟ کیہ اس دی اینے سالاں دی تپسیا بے کار چلی جاوے گی؟
رجو واپس اپنے کمرے وچ آئی۔ اوس دا دل اک عجیب جیہے ڈر نال زور زور دی دھڑک رہیا سی۔ دسمبر دے مہینے وچ وی اوہ پسینوں پسینیں ہوئی سی۔ اپنی گھبراہٹ دور کرن لئی اس نے اپنی کتاباں والی الماری کھولھی تے اک کہانیاں دی کتاب چک کے پڑھن لگی۔ اوس دیاں اکھاں تاں کتاب دے شبداں اتے گھم رہیاں سن پر دماغ شبداں نوں پکڑ نہیں سی رہیا۔ اس نے پوری کہانی پڑھ لئی پر اس نوں کجھ پتہ نہیں سی کہ کہانی وچ کیہ سی۔ اوہ ڈور بھوری جیہی کندھاں ول تکدی رہی۔ پھر اس نے ٹی.وی. لگایا۔ اوہ رموٹ پھڑ بے وجہ ہی اک چینل توں دوجے چینل ‘تے جاندی رہی، اس دے پلے کجھ نہیں سی پے رہیا۔ فیر اوس نے ٹی.وی. بند کر میز اتے پیا پیپرویٹ پھڑ لیا تے اس نوں گول گول گھمان لگی۔ جنی تیزی نال پیپر ویٹ گھم رہیا سی، اس توں وی ودھ تیزی نال اس دا دماغ۔ اوس نے گھڑی ول نظر ماری۔ اس نوں وقت رکیا ہویا لگیا۔ اوہ اجے وی بسترے وچ لیٹی ہوئی سی۔ پھر اوہ اکھاں بند کرکے دلبیر دی اڈیک کرن لگی۔
دلبیر گھر آیا، رجو نے اس نوں سا ری گل دسی تاں دلبیر نے کیہا،
رجو گھبرا نہ، ہمت رکھ، واہگورو بھلی کرو۔
رجو نے روٹی تیار کرکے میز اتے رکھی تے دلبیر نوں کیہا کہ اوہ اسیس نوں بلا لیاوے۔ دلبیر اسیس دے کمرے وچ گیا تے اس نے اسیس نوں ہلا کے کیہا،
اسیس پتر! اٹھ روٹی کھا لے۔
نہیں پاپا، مینوں بھکھ نہیں۔
دلبیر نے ویکھیا اسیس دیاں رو رو کے اکھاں سجیاں ہوئیاں سن۔ اس نے اپنے آپ ‘تے قابو پاندے کیہا، اچھا اٹھ تاں سہی، کجھ تاں کھا لے۔ نہیں پاپا، میں کجھ نہیں کھانا۔
اسیس دا اتر سن کے رجو ٹٹ جیہی گئی تے اوہ روندے ہوئے بولی، ہاں ہن توں کیوں کھائیں گی، ہن تینوں پتہ جو چل گیا ہے کہ میں تیری ماں نہیں۔
کس نے کیہا، تسیں میری ماں نہیں۔
فیر روٹی کیوں نہیں کھا رہی؟
ہاں میں روٹی نہیں کھا رہی کیونکہ مینوں دکھ ہے کہ تسیں اپنی دھی تے بھروسہ نہیں کیتا تے میرے کولوں سچائی چھپائی۔
اسیس پتر! اسیں تینوں کھوہنا نہیں چاہندے سی، اس لئی ڈردے سی۔ اسیں تیرے گنہگار ہاں۔
دلبیر نے کیہا، انجھ نہ کہو پاپا، تسیں میرے لئی فرشتے ہو۔ ماں صرف دیوکی نہیں ہوندی، یشودھا وی ہوندی ہے۔ جنا پیار مینوں تسیں دوہاں نے دتا، میرے سکے ماں باپ وی نہیں دے سکدے سی۔
اینا کہہ کے اسیس نے رجو اتے دلبیر دوہاں نوں گلوکڑی پا لئی۔ رجو اتے دلبیر دیاں اکھاں وچوں اتھرواں دی دھارا وہ تری تے اس دے نال ہی ورھیاں توں اوہناں دے من وچ بیٹھا ڈر وی ویہہ کے کِتے دور چلا گیا۔٭

اپنا تبصرہ گھلو