عراق وچ امریکی اڈیاں تے میزائل حملے، 80بندے ہلاک، ایرانی میڈیا دا دعویٰ

تہران: جنرل قاسم سلیمانی دے قتل دے بعد ایران ولوں بغداد وچ عین الاسد تے اربیل امریکی ہوائی اڈیاں تے میزائل حملے کیتے گئے۔ ایرانی میڈیا نے دعویٰ کیتا اے میزائل حملیاں وچ 80بندے مارے گئے۔ سپریم لیڈر آیت اللہ خامنہ ای نے آپریشنز ہیڈ کوارٹر آ کے کاروائی دی سربراہی کیتی۔

ایرانی سرکاری میڈیا دا دعویٰ اے عراق وچ امریکی ایئر بیس تے 30میزائل داغے گئے، بغداد وچ امریکی فوجی اڈیاں تے حملے وچ ہیلی کاپٹر تے فوجی سازوسامان نوں وی شدید نقصان اپڑیا اے۔ ایرانی میڈیا دے مطابق ٹرمپ دا آل از ویل کہن دا مقصد ایرانی میزائل نال ہون والے نقصان توں منہ لُکانا اے، میزائل حملے دے بعد امریکی فوجی اڈیاں توں ہیلی کاپٹراں نے پروازاں وی کیتیاں۔

ایران دی پاسداران انقلاب دا کہنا اے امریکا نے جے میزائل حملے تے جوابی کاروائی کیتی تے اسرائیل نوں نشانہ بناواں گے، امریکا تے اسرائیل نوں اک دوجے توں وکھرا نہیں سمجھدے، اسرائیلی شہراں ٰفہ تے تل ابیب نوں تباہ کرکے رکھ دیواں گے۔پنٹاگون نے عراق وچ امریکی فوج دے اڈے تے حملے دی تصدیق کر دتی۔

امریکی محکمہ دفاع دے مطابق حملہ مقامی ویلے دے مطابق صبح ساڈھے پنج وجے ایران توں کیتا گیا۔ عراقی فوج دے مطابق امریکی فوجی اڈیاں تے ٹوٹل 22میزائل داغے گئے، جہناں وچوں عین الاسد تے 17جد کہ اربیل تے 5میزائل نال حملہ ہویا، ایرانی میزائل حملیاں وچ کوئی عراقی ہلاک نہیں ہویا۔ ایرانی وزیر خارجہ دا کہنا اے متناسب جواب دے دتا، اوسے فوجی اڈے نوں نشانہ بنایا جتھوں ایرانی جنرل نوں ہدف بنایا گیا سی۔

اوہناں آکھیا اقوام متحدہ دے چارٹر دے تحت سیلف ڈیفنس وچ کاروائی کیتی۔امریکا توں بدلہ لیندیاں ای پاسداران انقلاب دے جنرل قاسم سلیمانی دی تدفین کرمان وچ کر دتی گئی۔ اودھر عراق دی پاپولر موبائلائزیشن فرنٹ نے وی امریکی فوج دے خلاف آپریشن دا اعلان کر دتا۔