نوازشریف دے لندن وچ قیام وچ توسیع دا معاملہ، محکمہ داخلہ دے رپورٹ تے تحفظات


لہور: محکمہ داخلہ پنجاب نے نوازشریف دی ضمانت وچ توسیع دین دی مخالفت کردیاں رپورٹ تے تحفظات ظاہر کر دتے۔ رپورٹ دا جائزہ لین لئی محکمہ صحت گھل دتی۔

وسیلیاں دے مطابق محکمہ داخلہ پنجاب نے دوجی میڈیکل رپورٹ تے تحفظات ظاہر کردیاں ایہنوں میڈیکل بورڈ دے سپرد کرن دا فیصلہ کیتا اے۔

محکمہ داخلہ پنجاب ذرائع دسدے نیں کہ ایس حوالے نال اج ہون والے اجلاس وچ آکھیا گیا کہ نوازشریف دی میڈیکل رپورٹ نوں اوس ویلے تک درست نہیں قرار دتا جا سکدا جدوں تک متعلقہ بورڈ ایہنوں درست نہیں قرار دیندا۔

محکمہ داخلہ پنجاب دے مطابق محکمہ صحت پنجاب میڈیکل رپورٹ دا جائزہ لے کے تجاویز پیش کرے، محکمہ صحت پنجاب میڈیکل رپورٹ دا جائزہ لین لئی میدیکل بورڈ تشکیل دیوے گا، ایہناں دی تجاویز آن دے بعد ای رپورٹ نوں صوبائی کابینہ دے اجلاس وچ رکھیا جاوے گا۔

دوجے پاسے سابق وزیراعظم نوازشریف دے ذاتی معالج نے نوازشریف دی تازہ میڈیکل رپورٹ دی مصدقہ رپورٹاں وی ٹویٹر تے شیئر کر دتیاں، نوازشریف دی میڈیکل رپورٹ لندن وچ پاکستانی ہائی کمیشن تے نوٹری پبلک، فارن اینڈ کامن ویلتھ آفس یو کے توں تصدیق شدہ نیں۔ نوازشریف دی میڈیکل رپورٹاں دی 14جنوری نوں تصدیق کروائی گئی اے، سابق وزیراعظم دی تازہ میڈیکل رپورٹ پچھلے دیہاڑ ای حکومت پنجاب نوں جمع کروائی گئی اے۔

اپنا تبصرہ گھلو