ترکی دا پاکستان دے نال تجارت 5ارب ڈالر تک لے جان دا اعلان

اسلام آباد: ترکی دے صدر رجب طیب اردوان نے پاکستان دے نال تجارت دا حجم 5ارب ڈالر تک لے جان دا اعلان کر دتا۔

اسلام آباد وچ پاک ترک بزنس فورم نال خطاب کردیاں ترک صدر رجب طیب اردوان آکھیا پاکستان ساڈا دوجا گھر اے، ایتھے آ کے بہت خوشی ہوئی، اینی چنگی میزبانی تے پاکستان دا شکر گزار آں۔

رجب طیب اردوان آکھیا پاک ترک باہمی تجارتی حجم اپنی صلاحیتاں توں کدھرے گھٹ اے، پاکستان دے نال تجارت نوں پنج ارب ڈالر تک لے جاواں گے، سانوں دوطرفہ تجارت نوں ہور فروغ دینا چاہیدا اے، ترکی نے پاکستان وچ سرمایہ کاری وچ وادھا کیتا اے، چاہنے آں ہور پاکستانی تاجر وی ترکی وچ سرمایہ کاری کرن، پاکستان لئی ترک ویزیاںوچ آسانی پیدا کراں گے۔

ترک صدر دا کہنا سی پاکستان دے نال وکھو وکھ سطح تے تعلقات نوں فروغ دے رہے آں، سی پیک منصوبے نال پاکستانی معیشت مضبوط ہووے گی، ترکی نوں وی مشکل معاشی حالات دا ساہمنا سی، عزم و ہمت نال قابو پایا۔

اپنا تبصرہ گھلو