امن دا نوبیل انعام ورلڈ فوڈ پروگرام دے ناں

امن دا نوبیل ایوارڈ برائے 2020ورلڈ فوڈ پروگرام نے جت لیا۔ امن دے نوبیل انعام نوں دنیا دا سب توں وڈا تے معتبر ایوارڈ تصور کیتا جاندا اے تے ایہ ایوارڈ اوہناں شخصیات، اداریاں تے تنظیماں نوں دتا جاندا اے جہناں نے تنازعات دے خاتمے، امن دے قیام تے اقوام وچکار تعلقات قائم کرن لئی اپنا کردار ادا کیتا ہووے۔ ایہدے علاوہ وکھو وکھ شعبہ ہائے زندگی نال تعلق رکھن والی شخصیات تے اداریاں نوں وی اپنے اپنے شعبیاں وچ خدمات تے عالمی ایوارڈ نال نوازیا جاندا اے۔

ایس ورھے ادب دا نوبیل انعام امریکی شاعرہ لوئس گلک دے ناں رہیا جد کہ کیمسٹری دا نوبیل انعام ایمانویل کارپنٹر تے جینیفرڈوڈنا دے ناں رہیا۔ فزکس دا نوبیل انعام برائے 2020مشترکہ طور تے راجر پنروز، رین ہرڈگینزل تے اینڈیا گیز نے حاصل کیتا جد کہ میڈیکل دا نوبیل انعام ہاروے جے آلٹر، مائیکل ہاگٹن تے چارلس ایم رائس دے ناں رہیا۔ہن نوبیل امن کمیٹی نے امن دے عالمی ایوارڈ دا اعلان وی کر دتا اے جو کہ ورلڈ فوڈ پروگرام نے اپنے ناں کر لیا اے۔ ڈبلیو ایف پی نوں نوبیل امن انعام جنگ زدہ علاقیاں وچ بھوک مٹان وچ کردار ادا کرن تے دتا گیا اے۔ ایس توں پہلاں امن دا عالمی ایوارڈ سابق امریکی صدور باراک اوباما تے جمی کارٹر، نیلسن منڈیلا ، مارٹن لوتھر کنگ تے ملالہ یوسفزئی جت چکیاں نیں۔

اپنا تبصرہ گھلو