میرے مسکین ہم وطنو! اج دے نوجواناں نوں 1977دی 5جولائی توں اگے حالات و واقعات تے معاشرت دا علم نہیں

لکھت:آصف عنایت

وطن عزیز دے کجھ لوکاں دے رویاں، گلاں تے افکار توں لگدا اے پاکستان 1947ء وچ نہیں 1992وچ معرض وجود وچ آیا سی حالاں جے موجودہ پاکستان 1970-71دا پاکستان اے۔ 72ورھیاں دی گل صرف طعنے دے طور تے کردے نیں جہناں وچ 18ورھے تے ایوب خان آرمی چیف جد کہ دس مکمل اقتدار تے فیر تن ورھے یحییٰ خان دی حکمرانی رہی جدوں ایس حکمرانی دی ہانڈی توں ڈھکن چکیا تے مشرقی پاکستان وکھرا ہو چکیا سی۔ اج دے نوجواناں نوں 1977دی 5جولائی توں اگے حالات و واقعات تے معاشرت دا علم نہیں کہ نظام مصطفی دے ناں تے انج جلسے جلوس ہوئے جیویں 1947ء توں پہلاں تحریک پاکستان لئی سن فیر ضیا الحق دے 11ورھیاں نے جہڑے نویں خاندان پیدا کیتے ایہناں وچ میاں برادران تے چوہدری برادران تے دوجیاں نے سیاست وچ اپنی تھاں بنائی پر میاں برادران وچ نوازشریف 1994ء وچ بھٹو مخالف قوتاں دے رہنما ٹھہرے۔ 1977توں لے کے 2019ویکھ رہے آں۔ مینوں فکر اے کہ میرے وطن دی غیور فوج دنیا دی انتہائی قابل ذکر طاقتور ترین فوجاں وچ پہلی پنج فوجاں وچ اے پر دنیا وچ وی تے اپنے وطن وچ مقبول ترین ادارہ اے۔ ایناں مقبول ترین کہ میرا خیال اے امریکی، بھارتی، فرانسیسی، انگلستان وغیرہ دے عوام اپنے ملک دے آرمی چیف دا ناں نہیں جان دے ہون گے پر الحمد للہ ساڈے آرمی چیف نوں دنیا جان دی اے جد کہ وطن عزیز وچ لوک تے میجراں دے ناں تک وی جاندے نیں ایہ ایہناں دی مقبولیت اے۔ فوجی راج وچ تے ہویاپر جمہوری ملک وچ کتھے کوئی کسے فوجی افسر دا ناں جاندا اے۔ ایہو حالت عدلیہ دی مقبولیت دی اے ساڈے جج صاحبان نوں دنیا جاندی اے جد کہ اندرون ملک تے عالیہ تے عظمیٰ دوواں عدالتاں دے سربراہان تے عہدیداران دے سارے خانوادے نوں لوک جاندے محبت کردے نیں۔ ایہو حالت بیورو کریسی دی اے۔ ایس پی کیہ ایس ایچ او توں اُتے اے سی کیہ ٹپوری توں اُتے کوئی افسر ہووے لوک اوہدا شجرہ نسب تک جاندے نیں۔ ایہ مقبولیت دے درجات نیں جہڑے اوہناں نے بڑی محنت تے قومی خدمات نال حاصل کیتے نیں عوام ایہناں توں بہت خوش نیں تے دعا گو نیں کہ اللہ رب العزت ایہناں دی آئندہ زندگیاں، منزلاں وی آسان کرے تے درجات بلند کرے۔
مسکین ہم وطنو! تسیں وی مبارکباد دے مستحق او کہ تسیں لوہے دے اعصاب دے نال پیدا ہوئے اجہے سخت جان لوک شاید دنیا دے کسے ہور خطہ نوں نصیب نہ ہون۔ ریڈیو پاکستان اُتے تے پی ٹی وی تے اعتبار نہیں تے رات دس وجے بی بی سی دی اردو سروس ریڈیو تے رضا عابدی دا سیربین پروگرام لا کے دکاناں، بازاراں تے گھراں وچوں سننا شروع ہو گئے کہ سچ سن سکیے ایہ سلسلہ جناب بھٹو دے خلاف جعلی مقدمہ توں چلیا آ رہیا اے۔ اج سینکڑاں چینلز نیں فیر وی سچ دی آواز ناپید اے۔ اعلیٰ عدالتی حوالے نال چلدیاں چلدیاں اک واقعہ یاد آ گیا کہ اک ملک سعید حسن ہوند ے سن اج وی ہائی کورٹ بار وچ سب توں زیادہ آباد ہال ایہناں دے ناں توں اے۔ ضیا دے ویلے ہائی کورٹ دے جج سن اک دن عدالت آئے معمول دے مطابق جہڑے وکلاء کھڑے ہوئے اودوں تک عدلیہ دا دل توںعوام احترام کردے سن کیوں جے ڈکٹیٹراں دے حق وچ فیصلے تے آندے رہے پر اجے تک کسے مقبول قیادت نوں عبرت نہیں بنایا گیا سی۔ جج صاحب بیٹھے وکلاء وی بیٹھ گئے۔ عدالت شروع ہون لگی اوہناں نے عملے نوںمقدمات دی کروائی شروع کرن توں روک دتا۔ جج صاحب نے اپنااستعفیٰ ٹائپ کروایا کہ آئین قنون تے ضمیر دے خلاف فیصلے نہیں دتے جا سکدے۔ دستخط کرکے بذریعہ رجسٹرار چیف جسٹس نوں گھلن دا آکھیا کمرہ عدالت وچ بیٹھے ہوئے وکلاء توں آکھیا آؤ چلو بار روم چاء پینے آں دوجا کیانی ہال اے اٹھاری ورھے توں ودھ عرصہ آرمی چیف تے 10ورھے مطلق العنان حاکم رہن والے ایوب خان دے دور دی قیامت خیز شروعات دے دن نیں۔ اک بریگیڈیئر صاحب تشریف لیاندے نیں۔ ہائی کورٹ دے پروٹوکول افسر توں کہندے نیں کہ اوہ ساریاں عدالتاں دا دورہ کرنا چاہندے نیں چیف جسٹس مغربی پاکستان ہائی کورٹ رستم خان کیانی دے کول پروٹوکول افسر آندے نیں تے جناب بریگیڈیئر صاحب دی خواہش توں آگاہ کردے نیں کیانی صاحب آکھیا بریگیڈیئر صاحب نوں بلاؤ اوہ ایتھے تشریف لیان بریگیڈیئر صاحب آئے کیانی صاحب نے پچھیا اوہناں نے حاکمانہ خواہش دا اظہار کیتا، کیانی صاحب آکھیا جناب بریگیڈیئر تہاڈے کول 5منٹ نیں، ہائی کورٹ دے احاطہ توں باہر چلے جاؤ نہیں تاں تسیں ہائی کورٹ دی لاک اپ وچ ہوو گے۔ بریگیڈیئر صاحب نوں آپ پتہ نہ چلیا تے پنج منٹ دا عرصہ 5سیکنڈ وچ پورا کیتا بعدوں ایوب خان گورنر ہاؤس آئے چیف جسٹس وی ملن گئے۔ ایوب خان نے جیویں سرراہ ہوندا اے پچھیا کہ سنیا اے ایہ واقعہ ہویا سی کیانی صاحب بولے جناب اوہ تے بریگیڈیئر سی جناب وی ہوندے تے ایہو ہوندا۔ ایہ لوک جسٹس کیانی جسٹس سعید حسن جسٹس کارنیلیس، جسٹس شبیر صاحبان نے قوم نوں خراب کیتا۔ عوامی رہنماواں وچ ذوالفقار علی بھٹو ایہناں دے بعد ایہناں دی دھی نے قوم دا ویلا برباد کیتا۔ ایہناں دے بعد زرداری تے نوازشریف نے وی ایہو کوشش کیتی تے آپ برباد ہوئے۔ ایہ فیض احمد فیض، جالب، وارث میر، منو بھائی ، لوکاں نے میری مسکین ہم وطنو! تہانوں بہت خراب کیتا۔ تہاڈی مثال ایس مزددور جہی اے جہڑا شام دے ویلے برسات دے دناں وچ گندم دیاں بوریاں صحن پوڑیاں چڑھ کے چھت تے چڑھا رہیا سی۔ چڑھاندے چڑھاندے شام ہوئی چلی تے چوہدری نے جیب توں ماچس کڈھی اک ای تیلی سی اوہنے ماچس نال تیل بالیا۔ روشنی ہوئی برسات دے موسم دی وجہ توں تیلی نم سی مزدور ہنیرے وچ بوریاں اُتے چڑھا رہیا سی۔ مسکین ہم وطنو! ہنیرے وچ چلدیاں چلدیاں روشنی دی طرح ای راستے یاد ہو جاندے نیں۔ ہنیریاں وچ وی روشنی دی طرح دا معمول بن جایا کردا اے۔ایس ہنیرے وچ لمحہ بھر دی روشنی آن دے نال ای ختم ہو جاوے تے تیرگی وچ شدت نال وادھا ہو جایا کردا اے جو ہنیرے توں اجالے دا کم کرن والے مسکین حقیقی ہنیریاں وچ واپس جاوے تے ایہدے احساس وچ وادھا ہو جاندا اے جدوں چوہدری دی تیلی نمی دی جہ توں فوراً بجھ گئی تے مزدور نے آکھیا چوہدری جی تسیں نے ساڈا ہنیرا وی گوایا جے۔ میرے عزیز ہم وطنو! اسیں 1977دی 5جولائی توں ویکھ رہے آں تسیں امیداں بنھ لیندے او تہانوں یقین کر لینا چاہیدا اے جسٹس کیانی، سعید حسن ملک، جسٹس کارنیلیئس، جسٹس شبیر ، جناب ذوالفقار علی بھٹو محترمہ بے نظیر بھٹو، فیض، جالب، وارث میر، منو بھائی لوک تہاڈے نال زیادتی کر گئے۔ تہاڈا ہنیرا خراب کرکے چلے گئے۔ تسیں کسے فیصلے، کسی حکم، کسے دعوے دا اعتبار نہ کریا کرو۔ تسیں حکمران طبقیاں دے چڑھے ہوئے سورج دی تپش تے تقدیر دے اجتماعی گھٹا ٹوپ ہنیرے وچ سرسُٹ کے حیاتی دے دن پورے کرو تے اللہ رب العزت دے فیصلے دا انتظار کرو جہڑا چڑھے ہوئے سورجاں نوں ڈبدے سورجاں دیاں لاشاں وچ بدل دیندا اے، سورج مکھیاں دی پیروی بند کر دیو۔ موجودہ عدالتی فیصلے وچ جہڑی گیند اسمبلی وچ سُٹی گئی اے۔ اسمبلیاں وچ موجودہ لوکاں دی حکمراناں نوں اینی اکثریت ہر ویلے میسر رہندی اے کہ حکمرانی دا حصہ بنن دی خاطر اوہ ہر بل منظور کر دین گے۔ میرے مسکین ہم وطنو! کسے تے آس مت بنھو حضرت علیؓ فرماندے نیں لوکاں توں ناامید آزادی اے۔ حقیقی آزادی تے بس نصیب نہیں ہوئی لوکاں توں آزادی ای حاصل کرو۔

50% LikesVS
50% Dislikes

اپنا تبصرہ گھلو