کلمہء حق آکھن دی عادت اپنائو(شہادت امام حسین)

لکھت:عتیق انور راجہ

ہجے کجھ دن پہلے حضرت ابراہیم علیہ السلام دی قربانی دی گل چل رہی سی تے اج میرے قلم نوں ایس قربانی نوں بیان کرنا پئے رہیا اے جس دی مثال تاریخ عالم وچ نہ پہلے سی نہ ہے تے نہ ای مستقبل وچ ہوئے گی۔ ایہہ قربانی دین والی ہستی دو عالم دے سردار دی سب توں پیاری دھی تے ہر مشکل وچ ساتھ نبھان والے چچازاد بھائی حضرت علی رضی اللہ عنہ دے جگر دا ٹکڑا سی۔ رسول پاک ﷺ نے حضرت حسین ؓ دے پیدا ہوندے ای اپنی پیاری دھی نوں کربلا دے میدان وچ ایہناں دی شہادت توں باخبر کر دتا سی۔ انج ویکھیا جائے تے ایہہ ازمائش رسول پاک ﷺ تے حضرت علیؓ تے حضرت فاطمہؓ دی وی سی۔ ایہناں سب نے حضرت امام حسین رضی اللہ عنہ نوں ایس وڈی قربانی لئی انج دا تیار کیتا کہ امام حسین رضی اللہ عنہ دے قم کسے صورت ڈگمان نہ پان۔آقا کریم ﷺ نے فرمایا کہ جنی آزمائشاں میرے اُتے آئیاں کسے ہور نبی اُتے نہیں آئیاں۔ بس اک شہادت دا منصب رہ گیا سی اوہ وی اللہ پاک نے آپ دے پیارے نواسے دی شکل وچ آپ ﷺ توں طلب کر لیا۔ امام حسین رضی اللہ عنہ جنہاں دا بچپن شہر علم دے موہڈیاں اُتے سوار ہو کے مہر نبوت نال کھیڈدے لنگھیا۔ حسین ؓ اوہ جیہڑے علم دے دروازے دا دربان رہیا۔ حسینؓ اوہ جنہاں لئی اللہ دے پیارے تے محبوب نبی ﷺ اپنے سجدے لمبے کر دیندے سن۔ جنہاں دے دن رات دی تربیت کائنات دی دو عظیم ہستیاں حضرت علیؓ تے حضرت فاطمہؓ نے کیتی ہوئے۔ ایس حسین رضی اللہ عنہ دے علم دانش دی انتہا کیہ ہوئے گی۔ ایسے علم دی وجہ نال آپؓ بوہت دور تیکر اکھ رکھدے سن تے ایسے علم دی وجہ نال آپؓ نے یزید دی بیت توں انکار کیتا سی۔ اگرچے آپؓ اپنے سفر دی حیثیت توں آگاہ سن۔ ایہناں نوں پتہ سی کہ کوفہ وچ ایہناں دا بلاوہ کسے ہور وجہ نال اے۔ آپ یزید نال جنگ دے ارادے نال یا اقتدار دی خاہش لئی کوفہ ول محو سفر نہیں ہوئے سن بلکے آپ ؓ ملعون یزید نوں احتمام حجت لئی نصیحت دین لئی تے کوفہ دے لوکاں دی دلجوئی لئی روانہ ہوئے سن۔ آپؓ نوں اپنی منزل دا پتہ سی، ایس لئی جدوں آپ کربلا دے مقام اُتے اپڑے تے اپنے رفقا نوں کہیا کہ ایتھے خیمے لا دیو۔انجام دی پوری خبر دے باوجود آپ اپنے ساتھ اپنے گھر والیاں، نکے معصوم بچیاں دے نال پورے حوصلے تے جوش دے نال اوتھے اپڑے سن۔ اج ایس امتحان دا ویلا آن اپڑیا سی جس لئی ایہناں بچپن توں تیار کیتا گیا سی۔ آپؓ ایہناں ساری مشکلاں دا مقابلہ کرن لئی تیار سن جیہڑی آپؓ دے ایمان و استقامت نوں آزمان لئی آپؓ دی منتظر سن۔ اللہ پاک نے اپنے سارے پیغمبراں نوں مختلف ازمائشاں نال ازمایا۔ کسے نوں بھکھ، کسے نوں جان دا ڈر، کسے نوں مال دا نقصان، ناموس دی حفاظت اولاد دی جدائی تے کسے نوں پیاس دی شدت نال آزمایا۔اللہ پاک نے اپنے پاک پیغمبراں اُتے ایہہ ازمائشاں اک اک کر کے نازل کیتیاں پر ہن ویلا اپنے سب توں پیارے نبی ﷺ دے گھر دی قربانی لین دا آیا تے اللہ پاک نے اپنے پیارے حبیب ﷺ دے نواسے توں اک ساتھ ای ساری قربانیاں منگ لیاں۔ جان دا خطرہ وی آپؓ دے ساہمنے سی۔ ناموس وی نشانے اُتے سی۔ بھک تے پیاس نال نڈھال اولاد وی آپؓ دے نال سی۔ دنیا وچ بہادر توں بہادر بندا اپنے نال ہر طرح دا سلوک برداشت کر لیندا اے۔ اپنی جان اپنے مقصد لئی ہر ویلے قربان کرن نوں تیار وی بوہت سارے لوک ہوندے نیں پر کوئی بہادر توں بہادر بندا اپنی اولاد نوں اپنے ساہمنے بھُکھ تے پیاس گرمی دی شدت نال تڑپدا ویکھ کے اپنے حوصلے برقرار نہیں رکھ سکدا۔ پر امام حسینؓ دے ساہمنے ایہہ ساری ازمائشاں اک ساتھ کھڑیاں سن۔
ایہہ امام حسین رضی اللہ عنہ ای سن جنہاں نے نہ صرف اپنی ذات اُتے دشمن دا ہر جبر برداشت کیتا بلکے اپنی اکھاں دے ساہمنے اپنے معصوم بچیاں نوں بھکھ تے پیاس نال تڑپدے وی ویکھیا۔ اپنے ساتھیاں نوں زخماں نال نڈھال وی ویکھیا۔ اپنی دھیاں، بھیناں تے اپنی دوجی رشتے دار خواتین دے چہریاں توں ایہناں دے اندر دا کرب وی محسوس کیتا۔آپؓ نوں صرف اپنے رب دی رضا دی فکر سی ایس لئی وڈی توں وڈی تکلیف وی آپؓ نوں یزید دے اگے جھکن اُتے مجبور نہیں کر سکی۔ آپؓ دا مقصد دنیا نوں ایہہ سبق دینا سی کہ اصول دے اگے حق دے ساہمنے کوئی رشتہ، کوئی تعلق، کوئی مشکل رکاوٹ نہیں بننی چاہیدی۔
واقعہ کربلا اک نظریہ اے اک فکر اے جس دے اندر انسانیت دی پوری تاریخ پوشیدہ اے۔ اج سانوں واقعہ کربلا توں سبق لیندے ہوئے اپنی زندگیاں وچ ایمان تے دین اسلام دی سربلندی دی خاطر جابر سلطان تے ظالم طاقتاں دے ساہمنے کلمہ حق کہن دی ہمت اپنے اندر پیدا کرن دی لوڑ اے پر افسوس اج ساڈے علما دی اکثریت کلمہ حق کہن دی بجائے فاسق و فاجر سیاست داناں دی حمایت کردی وکھائی آ رہی اے۔ ساڈے سیاسی و مذہبی راہنمائواں دے بیان ایہناں دی عملی زندگی دے نیڑے وی وکھائی نہیں دیندے۔ عام لوکاں نوں سادگی، کفایت شعاری دا درس دین والے مذہبی پیشوا آپ لگژی لائف سٹائل جی رہے نیں۔ چندیاں اُتے چلن والے مدرسیاں دے متولی مہنگی گڈیاں اُتے سفر کردے نیں تے دنیا جہاں دیاں نعمتاں حاصل کر رہے نیں تے میں ایہہ صاف صاف کہنا چاہنا واں کہ جے مسلمان اج پوری دنیا وچ سخت مصیبتاں تے مسائل وچ ڈگے ہوئے نیں تے ایس دی وڈی وجہ درباری علماء نیں جیہڑے حکمراناں دے قصیدے پڑھدے نیں، ایہناں دی خوشی لئی اپنے مقام دا خیال نہیں رکھ رہے۔ پوری دنیا وچ مسلماناں دے حالات دا جائزہ لیے تے شدت نال احساس ہوندا اے کہ جویں اج وی امت مظلوم کربلا وچ ای اے۔ حق گل کہن والیاں نوں پابند سلاسل کیتا جاندا اے تے کدی کوئی انھی گولی کسے سچے دی جان لے لیندی اے۔ اک پاسے عوامی نمائندیاں دے عالیشان محل نیں دنیا و جہاں وچ ایہناں دے اہل و عیال دی دولت دے انبار لگے ہوئے نیں، ایہناں دے اثاثے ہر لنگھدے دن دے نال ودھ رہے نیں تے دوجے پاسے عوام لئی جینا مشکل تر ہو چکیا اے۔ روزمرہ استعمال دی ہر ہر شے مہنگی ہو رہی اے۔ پاکستانی لوک فوج نال دیوانہ وار محبت کردے نیں پر فوج حکومتاں بنان، ایہناں نوں گھر گھلن تے این آر او دین وچ لگی ہوئی اے جس ملک وچ لکھاں نوجوان اعلیٰ تعلیم دے باوجود بیروزگار نیں ایس ملک وچ ہر ریٹائر ہون والے افسر نوں دوبارہ بھاری معاوضے اُتے نوکری دتی جا رہی اے۔ اج ساڈی نہ جان محفوظ اے، نہ مال، ساڈی اولاد وی دشمن دے نشانے اُتے اے۔ ساڈی زندگیاں اج ڈر خوف دے سائے وچ اے۔ اسیں ہر پاسیوں ظلم و ستم دا نشانہ بنے ہوئے آں۔ اک پاسے بھارت کشمیر نوں اپنا قانونی حصہ بنا چکیا اے تے دوجے پاسے اوہ اپنے ملک وچ موجود کروڑاں مسلماناں نوں مذہب دی بنا اُتے ظلم و ستم دا نشانہ بنا رہیا اے۔مسلماناں لئی ایہناں دی مذہبی رسماں دی انجام دہی مشکل توں مشکل ہوندی جا رہی اے۔ غیر مسلم دنیا تے اک پاسے ساڈی مسلم دنیا توں وی کوئی واضع تے دو ٹوک پیغام بھارتی حکمراناں تیکر نہیں اپڑ سکیا۔ کشمیر وچ مسلماناں دے بچے شہید ہو رہے نیں۔ پنج ورھے دی معصوم بچیاں توں لے کے اسی ورھے دی بڈھی مسلم خواتین دی عزتاں لٹیاں جا رہیاں نیں۔ جوان بچیاں دی عزتاں دشمن دے نشانے اُتے نیں۔کشمیریاں دیاں نسلاں قربانیاں دے رہیاں نیں پر امت مسلمہ دی بے حسی دی وجہ نال اغیار ایہناں اُتے ظلم و ستم دا بازار گرم کیتے ہوئے نیں۔ فلسطین وچ پچھلی کئی دہائیاں توں یزیدی طاقتاں مسلماناں اُتے ظلم و ستم کیتے چلے جا رہیاں نیں۔ شام تے یمن وچ اج وی مسلم لہو بہایا جا رہیا اے تے اج دے جدید دور وچ جدوں کوئی وی خبر نظراں توں اوجھل نہیں رہ سکدی برما دی حکومت بڑی درندہ دلی نال مسلماناں دی نسل کشی کر رہی اے۔
اج امام حسین رضی اللہ عنہ دی ذات نوں عملی شکل وچ خراج پیش کرن لئی ایہناں دے افکار نوں مدنظر رکھیا جانا چاہیدا اے۔ پوری دنیا وچ مسلمان اج سخت مشکل وچ نیں۔ پوری دنیا دے مجبور و بے کس مسلماناں نوں یزیدی طاقتاں دے خلاف کلمہ حق کہن دی ہمت پیدا کرنی پئے گی۔ اج سانوں ایہہ سوچنا اے کہ کیوں حضرت امام حسین رضی اللہ عنہ نے یزید دی بیعت توں انکار کیتا؟ کیوں اپنے معصوم بالاں نوں بھکھ پیاس دی حالت وچ شہید ہون دتا۔
حقیقت ایہو اے کہ حضرت امام حسین رضی اللہ عنہ نے اپنی تے اپنے گھر والیاں دی قربانی دے کے ایہہ پیغام دے دتا کہ رہندی دنیا تیکر مسلماناں نوں کنج حکمراناں دی بیعت کرنی ہوئے گی سانوں حضرت امام حسین رضی اللہ عنہ دی قربانی دا واقعہ تے یاد اے پر ساڈی زندگیاں وچ عملی طور اُتے ایس قربانی دا کوئی اثر نظر نہیں آ رہیا کیوں جے اسیں ہر طاقتور دے اگے گھٹنے ٹیک دینے آں۔ اسیں ہر ظالم حکمران دی اطاعت کر لینے آں، کدی ساڈے توں ووٹ کھوہ لیا جاندا اے کدی ساڈا ووٹ چوری ہو جاندا اے، ساڈے راہنما ایس ملک نوں لٹ رہے نیں۔ دولت دے انبار دوجے ملکاں وچ جمع کر رہے نیں ساڈے حکمراناں دے بچے دوجے ملکاں دے شہری بن کے موجاں کر رہے نیں تے عوام فیر وی اکھاں اُتے پٹی بنھے ایہناں چوراں نوں اپنا نجات دہندہ سمجھ کے اپنے موہڈیاں اُتے بیٹھا لیندی اے۔ حضرت امام حسین رضی اللہ عنہ نال محبت دا تقاضہ تے ایہہ وے کہ ہر مسلمان اپنے دین نوں سمجھے تے فیر دنیا داری وچ انج دے لوکاں نوں مسند اقتدار اُتے بٹھان دی کوشش کرے جیہڑا واقعی دین دار ہوئے، جنہاں نوں زمانے دے نال چلنا وی آندا ہوئے تے جنہاں دا اپنا کردار وی مثالی ہوئے پر ہجے تیکر انج ہوندا وکھائی نہیں دے رہیا۔ بڑی حیرت ہوندی اے کہ ہر ضروریات زندگی وچ ملاوٹ کرن والے، چور بازاری کرن والے، گوشت، ددھ وچ پانی ملان والے، مرچاں وچ اٹاں تے بجلی و گیس چوری کرن والے لوک وی اپنے بہتر مستقبل لئی کسے معجزے دے منتظر نیں۔ صاحبو! دین وچ کوئی شارٹ کٹ نہیں۔ جے عزت نال جینا اے تے اپنے اعمال اُتے دھیان دینا شروع کرو۔ دنیاوی فائدے لئی حق گل کہن توں نہ ڈرو، ایہہ زندگی جدوں ختم ہو ای جانی اے تے بستر مرگ اُتے ایڑھیاں رگڑ رگڑ کے مرن توں بہتر اے حق لئی کھڑے ہو کے شہادت دی موت دا انتخاب کر لیا جائے۔

50% LikesVS
50% Dislikes

اپنا تبصرہ گھلو