مسلم لیگ (ن) وچ اک نواں تنازع

لکھت:محمد نواز رضا

حکومت پاکستان مسلم لیگ (ن) تے پاکستان پیپلزپارٹی دی مدد نال پارلیمان دے دوہاں ایواناں توں تناں مسلح فوجاں دے سربراہواں دی مدت ملازمت بارے قوانین وچ ترمیمی بل کثرت رائے نال منظور کران وچ کامیاب ہو گئی اے۔

صدر مملکت عارف علوی دے دستخطاں دے بعد ایہنوں پاکستان دے قنون دی حیثیت حاصل ہو گئی اے۔ ہن وزیراعظم پاکستان سپریم کورٹ دی ہدایت موجب آرمی ایکٹ وچ ترمیم دے بعد حاصل اختیارات نوں استعمال کردیاں ہوئیاں بری فوج دے سربراہ جنرل قمر جاوید باجوہ دی مدت ملازمت وچ 3ورھے دی توسیع کر سکن گے۔ تناں مسلح فوجاں دے سربراہواں دی مدت ملازمت وچ توسیع بارے قوانین وچ ترامیم دی منظوری وچ پس پردہ قوتاں نے کلیدی رول ادا کیتا اے اوتھے اپوزیشن دی سب توں وڈی جماعت پاکستان مسلم لیگ (ن) نوں وی وڈے دریا پار کرنے پئے۔ پاکستان مسلم لیگ (ن) نے تناں مسلح فوجاں دے سربراہواں دی مدت ملازمت وچ توسیع بارے غیر مشروط حمایت کرکے پاکستان پیپلزپارٹی دی بارگیننگ پاور ختم کر دتی۔بھاویں پاکستان پیپلزپارٹی نے وی کارخیر وچ اپنا حصہ تے پایا اے۔ گل ایتھے ختم نہیں ہوئی بظاہر اپوزیشن دی چار جماعتاںجمعیت علما اسلام (ف)، نیشنل پارٹی ، جماعت اسلامی تے پختونخوا ملی عوامی پارٹی نے پارلیمان وچ سروس ایکٹس ترمیمی بلاں دی مخالفت کیتی پر بلاں دی منظوری دے عمل دے دوران واک آؤٹ کرکے عملاً اپنے آپ نوں obstainرکھیا پر ہن ایہناں جماعتاں دی توپاں دا رخ وی پاکستان مسلم لیگ (ن) تے پاکستان پیپلزپارٹی ول ہو گیا اے۔ حکومت نوں ایہناں ترامیم دی منظوری وچ پارلیمانی محاذ تے مزاحمت دا کوئی ساہمنا نہیں کرنا پیا دلچسپ امر ایہ اے پارلیمانی محاذ تے کامیابی وچ پاکستان تحریک انصاف دی قیادت دا کوئی کردار نہیں پاکستان مسلم لیگ (ن) دی قیادت نوں وزیر دفاع پرویز خٹک جہناں نے دوہاں ایواناں وچ سروسز ایکٹس ترمیمی بل پیش کیتے۔ مسودے فوری طور تے فراہم کرن توںمعذوری دا اظہار کیتا تے آکھیا اوہ ایہ مسودے حاصل کرن دی کوشش کرن گے۔کجھ دیہاڑ پہلاں پارلیمنٹ ہاؤس وچ اپوزیشن چیمبر وچ پاکستان مسلم لیگ (ن) دے سیکرٹری جنرل احسن اقبال نال اوس ویلے مڈبھیڑ ہو گئی جدوں اوہناں نوں پروڈکشن آرڈر تے پارلیمنٹ ہاؤس لیایا گیا۔ اوہناں نے وزیر دفاع نوں سروسز ایکٹس وچ ترامیم نال عدم اتفاق کردیاں ہوئیاں کجھ تجاویز پیش کیتیاں تے پرویز خٹک آکھیا ایہناں دی تجاویز نوں قبول کرکے نواں پنڈورا باکس نہیں کھول سکدے۔

اسیں ایہدے وچ کامہ تے فل سٹاپ تک تبدیل نہیں کر سکدے ایس لئی تہاڈی مرضی اے کہ ترمیمی بلاں دی حمایت کرو یاں مخالفت، ایہ گل قابل ذکر اے کہ احسن اقبال قومی اسمبلی وچ ترمیمی بلاں دی منظوری دے عمل توں لاتعلق ہو گئے تے پورا دن نیب ہیڈ کوارٹراں وچ ای گذار دتا۔ اگلے دیہاڑ مسلم لیگی رہنماواں نے منت سماجت کرکے اوہناں نوں پارلیمنٹ ہاؤس وچ آن تے راضی کیتا۔ گل ایتھے ختم نہیں ہوئی پاکستان مسلم لیگ (ن) دے سینئر نائب صدر شاہد خاقان عباسی جہڑے جیل جان توں پہلاں عملاً پارٹی دی قیادت کر رہے سن اوہ نوازشریف دے بیانیہ تے یوٹرن تے ناراض نیں۔ اوہناں نے پروڈکشن آرڈر جاری ہون دے باوجود پارلیمنٹ ہاؤس آن توں انکار کر دتا۔ اوہ نجی ہسپتال وچ پتے دے آپریشن دے سلسلے وچ داخل نیں۔ اوہناں نے پارلیمنٹ آن دی بجائے دوبارہ اڈیالہ جیل جان نوں ترجیح دتی اے۔ انج وکھائی دیندا اے پاکستان مسلم لیگ (ن) دے اندر فیصلہ سازی وچ کدھرے کمزوری پائی جاندی اے جہدی وجہ توں پارٹی وچ پائے جان والے اختلاف رائے دی بازگشت سیاسی حلقیاں وچ سنائی دے رہی اے۔ ایہدی اک وجہ ایہ وی اے پاکستان مسلم لیگ (ن) دے قائد میاں نوازشریف صاحب فراش نیں جد کہ پارٹی دے صدر میاں شہباز شریف نے وی لندن وچ ڈیرے لا لئے نیں۔ اوہناںدی فوری طور تے وطن واپسی دا وی کوئی امکان نہیں۔ پارٹی تے گرفت کمزور ہون نال مسلم لیگی رہنماواں وچکار قیادت دے تنازعات کھڑے ہو رہے نیں۔ میرے لئی ایہ حیران کن گل اے اک پاسے پارٹی قائد اپنی حیاتی دی جنگ لڑ رہیا اے۔دوجے پاسے ایہناں دی تھاں لین لئی وزارت عظمیٰ دے چار پنج امیدواراں دے وچکار کھینچا تانی دا سلسلہ جاری اے۔ پارلیمانی توں سروسز ایکٹس ترمیمی بلاں دی منظوری نے جتھے سرکار نوں اک آئینی بحران توں کڈھ لیا اے اوتھے اپوزیشن جماعتاں دے اتحاد نوں شدیدجھٹکا لگن دے نال مسلم لیگی رہنماواں دے وچکار غلط فہمیاں نوں جنم دے دتا اے۔ پاکستان مسلم لیگ (ن) دے رہنماواں دا دعویٰ اے کہ میاں نوازشریف نے سروسز ایکٹس وچ ترمیمی بلاں دی مشروط طور تے حمایت دی ہدایت کیتی سی تے آکھیا سی ایہناں بلاں دے تحت اک واری سروسز چیفس دی مدت ملازمت وچ توسیع دا اختیار وزیراعظم نوں دتا جاوے تے ایہدے وچ sun set دی شق شامل کیتی جاوے پر پاکستان مسلم لیگ (ن) نے ترمیمی بل وچ کامہ تے فل سٹاپ تک تبدیل کرائے بغیر غیر مشروط طور حمایت کر دتی۔ قومی اسمبلی وچ پاکستان مسلم لیگ (ن)دے پارلیمانی لیڈر خواجہ آصف پارلیمانی پارٹی دے اجلاس وچ عسکری قیادت دی مدت ملازمت وچ توسیع بارے غیر مشروط حمایت تے پارٹی دے بعض ارکان ولوں کیتی جان والی تنقید تے سب توں ودھ رنجیدہ نیں۔ اوہ ایہناں دناں جتھے گرم پانیاں وچ نیں اوتھے ایہناں دے سیاسی مخالفین وی ایہناں تے پھبدی کس رہے نیں۔وفاقی وزیر سائنس و ٹیکنالوجی فواد حسین چوہدری نے وی مسلم لیگ (ن) دے اندر جنگ و جدل دا مذاق اڈایا اے تے آکھیا اے ہن تے خواجہ آصف نوں پارٹی اجلاساں وچ نہیں بلایا جاندا۔ خواجہ آصف نے پارلیمانی پارٹی دے اجلاس وچ اوہناں دے موقف دا دفاع نہ کرن تے پاکستان مسلم لیگ (ن) پارلیمانی ایڈوائزری گرو پ وچ کیتی جان والی تنقید تے وٹس گروپ نوں چھڈ دتا اے۔ اوہناں نے پارلیمانی پارٹی دے اجلاس وچ دوٹوک لفظاں وچ کہہ دتا سی سروسز ایکٹس ترمیمی بلاں دی حمایت پارٹی دے قائد میاں نوازشریف دا فیصلہ اے۔ ایہ میرا فیصلہ اے تے نہ ای میاں شہباز شریف دا۔ جس کسے نوں اعتراض اے میں اوہنوں میاں نوازشریف دا فون نمبر دینا آں اوہناں توں ایہدی تصدیق کر سکدا اے۔ ایہ گل قابل ذکر اے پارٹی دے کجھ ارکان نے اوہناں دی گل توں اختلاف رائے دا اظہار کیتا تے ایس گل تے اصرار کیتا کہ میاں نوازشریف نے ترمیمی بلاں دی مشروط حمایت حمایت دی گل کیتی سی تے آکھیا کہ ایہدے وچ sun setدی شق شامل کیتی جاوے پر اوہناں دی ایس ہدایت نوں نظر انداز کر دتا گیا۔پارٹی اجلاس وچ موجود سینیٹر پرویز رشید آکیا میں میاں نوازشریف نال مسلم لیگ (ن) پارلیمانی ایڈوائزری گروپ دے رہنماواں دی ملاقات وچ ہون والے گل بات بارے کوئی گل نہ کرن دا حلف چک رکھیا اے ایس لئی میں کوئی گل نہیں کراں گا پر اوہناں نے خواجہ آصف دے موقف دی تائید کیتی پارٹی دے ذمہ دار بندیاںنے میاں نوازشریف تے میاں شہباز شریف نوں پارٹی دی قیادت دے اندر پائی جان والی سرد جنگ توں آگاہ کر دتا اے۔ میاں شہباز شریف اگلے کجھ دناں وچ پارٹی رہنماواں نال ویڈیو لنک تے گل بات کرن گے تے ایس تنازع نوں ختم کرن دی کوشش کرن گے۔ پارلیمانی پارٹی دے بعض ارکان اعلیٰ قیادت توں ایس بارے ذمہ داری دا تعین کرن دا مطالبہ کر رہے نیں۔ خواجہ آصف آکھیا اے سانوں ایس گل دا پتہ اے کہ ساڈے فیصلہ توں رائے عامہ ساڈے خلاف اے، میں اپنے ولوں کچھ نہیں آکھیا، میاں نوازشریف ولوں حکم ملیا میں اوہی کیتا، پارٹی دا فیصلہ سی جہدی اسیں تکمیل کیتی۔ ایہ بالکل ٹھیک سی مینوں ایہدے تے کسے قسم دا دکھ نہیں۔ خواجہ آصف نے ایس گل دا برملا اعتراف کیتا اے کہ جدوں رائے عامہ مخالف ہو جاوے تے سیاستدان دی سیاست ختم ہو جاندی اے۔ ایہ گل قابل ذکر اے کہ پاکستان پیپلزپارٹی دی اعلیٰ قیادت بلاں دی منظوری دا سارا ملبہ پاکستان مسلم لیگ (ن) تے پان دی کوشش کر رہی اے جد کہ قومی اسمبلی وچ ترمیمی بلاں وچ تن ترامیم پیش کرکے سرکار دی عرضی تے اوہناں نال دستبرداری دا ڈرامہ رچایا گیا۔پاکستان پیپلزپارٹی دے چیئرمین بلاول بھٹو زرداری آپ تے ایوان زیریں وچ نہیں آئے پر اوہناں دی پوری پارٹی بلاں دی منظوری وچ سرکار دے نال کھڑی ہو گئی۔ سیاسی حلقیاں وچ ترمیمی بلاں دی غیر مشروط حمایت نوں نوازشریف دے ووٹ نوں عزت دیو دے نعرے دے منافی قرار دتا جا رہیا اے پر مسلم لیگی قیادت دا کہنا اے۔ ایس نعرے دا مقصد سول بالادستی دا قیام اے۔ خواجہ آصف نے پارٹی وچ نکتہ چینیاں نوں ایہ کہہ کے کہ میاں شہباز شریف اوہناں دے سوالاں دا جواب آپ آ کے دین گے جان چھڈا لئی اے پر انج وکھائی دیندا اے اوس ویلے تک پارٹی دے اندر نکتہ چینی اوہناں دا پچھا کردے رہن گے جدوں تک اوہناں نوں پارٹی دی اعلیٰ قیادت ولوں چپ رہن دا حکم جاری نہیں کر دتا جاندا۔

50% LikesVS
50% Dislikes

اپنا تبصرہ گھلو