واہ مراد سعید جی واہ!

لکھت:اعجاز علی ساگر

اسیں شہد دیاں بوتلاں چُک کے مشہور کوریئر کمپنی دے دفتر جا اپڑے تے اوہناں نوں اوہ بوتلاں دتیاں کہ ایہناں نوں کراچی گھلنا اے ساڈی گل سن کے کوریئر کمپنی دے نمائندے نے بیزار جہے لہجے وچ آکھیا ساڈے کول لیکوئیڈ لے جان دی سہولت موجود نہیں اے ایس لئی اسیں اوتھوں نکلے تے فیر دوجی مشہور کوریئر کمپنیاں دا رخ کیتا پر کوئی وی کوریئر کمپنی سامان گھلن نوں تیار نہیں سی اسیں ایدھر اودھر بھج بھج کے تھک چکے سی ایس دوران میں اپنے دوست توں آکھیا کیوں نہ اسیں پوسٹ آفس دا چکر لا لیئے شاید اوہ ساڈا سامان گھل دین۔ چنانچہ اسیںپوسٹ آفس جا اپڑے اوتھے اسیں اوہناں نوں ساری صورتحال دسی تے سب توں پہلاں عملے نے سانوں کرسیاں پیش کیتیاں کہ سر تسیں بیٹھو ایہ لیکوئیڈ اے ایہنوں پیک کرنا پوے گا ایس لئی اسیں بیٹھ گئے اوہ ساڈے ساہمنے ای پیکنگ کرن لگے۔ اوہناں نے ایس شہد نوں ڈبے وچ چنگی طرح بند کرکے پکی پیکنگ کر دتی تے ایڈریس وغیرہ لکھ کے انتہائی معقول چارجز وصول کیتے تے رسید بنا دتی اسیں اوہناں دے چنگے اخلاق توں کافی متاثر ہوئے۔

حیرانگی ایس گل دی سی کہ اک ورھے پہلاں تک ایہ ادارہ تقریباً تباہی دے دہانے تے اپڑ چکیا سی تے عملے دا اخلاق ایس قدر خراب سی کہ کوئی وی پوسٹ آفس دا رخ ای نہیں کردا سی آخر اجہی کیہ تبدیلی آئی کہ نقصان وچ جان والا ادارہ منافع بخش تے بہترین ادارہ بن گیا ایہدا کریڈٹ یقینا تحریک انصاف تے اسپیشلی طور تے مراد سعید نوں جاندا اے ایس نوجوان نے جہڑے ویلے ایس ادارے دی باگ ڈور سنبھالی تے اوس ویلے ادارے دی حالت سی کہ ملازماں دیاں تنخواہواں دے لالے پئے ہوئے سن رشوت تے کرپشن دا بازار گرم سی تے ایہ ادارہ تقریباً ختم ہون دے نیڑے سی اودوں ایس نوجوان نے اپنے لیڈر عمران خان دے نقش قدم تے چلدیاں ہوئیاں ایس تباہ حال ادارے نوں دوبارہ چُکن دا فیصلہ کیتا تے انتظامی ڈھانچے وچ تبدیلی کیتی تے جدت لے آئے سب توں پہلاں ایپ متعارف کرائی گئی جہدے وچ کسے وی گھلے گئے سامان بارے پوری معلومات سی ایس ایپ نال سامان گھلن والا تے ریسیو کرن والا دوواں براہ راست باخبر رہ سکدے سن۔ ایہ انقلاب تے اوہ تبدیلی سی جہدا وعدہ عمران خان نے اپنی قوم نال کیتا۔

ایہدے بعد سب توں وڈے مسئلے ول توجہ دتی گئی کہ جہڑا وی کوئی سامان یاں کاغذات پوسٹ آفس دے راہیں گھلے جاندے سن ایہناں نوں مطلوبہ ہدف یاں مقام تک اپڑدیاں کئی ہفتے لگ جاندے سن جد کہ ایہدے مقابلے وچ پرائیویٹ کوریئر سروسز دو تن دن وچ سامان اپڑاندیاں سن ایس لئی لوک زیادہ تر پرائیویٹ کمپنیاں نوں ای ترجیح دیندے جہدے نال ایہناں دے ریونیو وچ دن بدن وادھا ہوندا چلا جا رہیا سی جد کہ پوسٹ آفس دن بدن زوال ول ودھ رہیا سی دبنگ منسٹر نے اندرون شہر سیم ڈے ڈلیوری دا سنٹر قائم کیتا جد کہ ڈاک دی ترسیل نوں تیز ترین کر دتا تے سارا سامان دہلیز تے اپڑان دی ذمہ داری وی چکے ایہ اک بہت وڈا کارنامہ سی جہنے کجھ ای دناں وچ کامیابی دے ریکارڈ توڑ دتے اداریاں دی سالانہ کارکردگی رپورٹ جدوں وزیراعظم نوں پیش کیتی گئی تے عوام دے ساہمنے اک سالہ کارکردگی رکھی گئی تے پوسٹ آفس اوہ کلّا ادارہ سی جہنے سب توں ودھ ریونیو اکٹھا کیتا تے شفافیت وچ وی ایہ ادارہ پہلے نمبر تے سی۔ وزیراعظم عمران خان اپنے نوجوان وزیر دی کارکردگی توں کافی خوش ہوئے تے اوہناں نوں شاباش دتی۔ پچھلی حکومتاں نے اداریاں نوں تباہ کر دتا سی کرپشن تے اقربا پروری دی وجہ توں کارکردگی صفر سی ایہناں حالات وچ تحریک انصاف تے عمران خان نے تباہی دے دہانے تے اپڑے اداریاں نوں اپنے پیراں تے کھڑا کرن دا عزم کیتا تے صرف کجھ مہینے وچ اوہ کر وکھایا جو پچھلی حکومتاں 35ورھیاں وچ نہ کر سکیاں۔ مراد سعید دی بہترین کارکردگی نوں ویکھدیاں ہوئیاں وزیراعظم پاکستان عمران خان نے اوہناں نوں اک ہور وزارت دا قلمدان وی دے دتا ایس ملک تے قوم نوں اجہی محنتی تے ایماندار قیادت دی لوڑ سی جو ایس قوم دیاں نسلاں سنوارن لئی دن رات اک کر دین تے انج حقیقی معنیاں وچ مراد سعید نے کرکے وکھایا۔(شاباش مراد سعید شاباش)

50% LikesVS
50% Dislikes

اپنا تبصرہ گھلو