موجودہ صورتحال تے عام لوک

لکھت:ڈاکٹر اخترشمار

پہلاں خوشحال خٹک دی کجھ لائناں ملاحظہ ہون:اہلِ شرکے لیے پنجہ شاہیں پیدا کر اور اہلِ خیر کے لیے کبوتر سے بھی زیادہ حلیم وخاکسار بن جا،شیر دا مقام یاں تے پہاڑی دراں دی انتہائی بلندیاں تے ہوندا اے یاں فیر ایہدی قسمت وچ موت یاں زنجیر ہوندی اے۔ نویں ورھے 2020دی آمد دے نال ای کجھ اجہے واقعات رونما ہون لگے نیں کہ آن والے دناں دا نقشہ اکھاں دے ساہمنے لیایا جا سکدا اے۔ ایران دے جنرل قاسم سلیمانی نوں ٹارگٹ کرکے شہید کر دتا گیا اے۔ امریکہ دا صدر ٹرمپ اپنے خلاف مواخذے دے فیصلے توں پہلاں خاص طور تے آن والے انتخاب وچ کامیابی لئی امریکی عوام دی وجہ اپنی نالائقیاں توں ہٹانا چاہندا اے ۔ سو اوہنے ایرانی جنرل نوں اوس ویلے نشانہ بنایا جدوں اوہ عراق وچ سعودی حکومت لئی پیغام لے کے جا رہے سن ۔ ایس واقعہ نے ایس سارے خطے نوں جنگ دے دہانے تے لیا کھلاریا اے۔ پاکستان دا موقف فی الوقت ٹھیک اے کہ سانوں خطے وچ امن خراب کرن دی کسے وی کاروائی دا حصہ نہیں بننا چاہیدا۔ پاکستان دا ایہ فیصلہ وی قابل تحسین اے کہ اوہ اپنی سرزمین کسے نوں وی استعمال کرن دی اجازت نہیں دیوے گا۔ اللہ تعالیٰ ساڈے ساریاں دا حامی و ناصر ہووے۔جس دیہاڑ ایرانی جنرل نوں شہید کیتا گیا اسیں لہور توں اک اجہی محفل درویش وچ سی جتھے آلے دوالے دے پنڈ توں عام لوک وی تشریف لیائے سن۔ لوک جدوں نویں ورھے دیاں خوشیاں منا رہے سن اسیں اپنے درویش صفت بزرگ احباب دی محفل نوں نکل پئے۔ ڈیرہ نواب دی بستی وچ سائیں مسکین دی کٹیا وچ الاؤ جل رہیا سی۔ ایہنوں درویش لوک مچ دا ناں دیندے نیں۔ آؤ ایتھے بیٹھے ہوئے لوکاں دیاں گلاں سننے آں۔کالم دے شروع وچ خوشحال خان خٹک دی لکھیاں لائناں، محفل وچ مرددرویش بیان کررہے سن۔ فرمایا: انسان اپنی اصل نوں فراموش کرکے ایس مختصر تے فانی حیاتی ای نوں سب کجھ سمجھ بیٹھا اے۔ ایس عارضی زندگی لئی لالچ حرص تے آرزواں وچ غرق رہن نال ساڈی روحانی صلاحیتاں مردہ ہو جاندیاں نیں۔ایہ گل جاری سی کہ طارق لودھی نے ایران امریکہ کشیدگی دے حوالے نال گل شروع کر دتی ریاض بھٹی بولے: امریکہ نے ایرانی جنرل نوں نشانہ بنا کے ایس خطے نوں اگ وچ دھرو دتا اے۔ ایہ واقعہ کسے وی وڈی جنگ دا نقطہ آغاز قرار دتا جا سکدا اے۔ ہن مسلم امہ نوں اکٹھیاں ہونا پوے گا نہیں تاں اسیں تباہی توں دامن نہیں بچا سکدے۔ماسٹر دین محمد نے اپنی صلاح دیندیاں ہوئیاں آکھیا آن والے خطریاں لئی سانوں بطور پاکستانی قوم کجھ نہ کجھ حفاظتی اقدامات کرنے ہون گے۔ ساڈے ایتھے دشمن فرقہ واریت نوں ہوا دے سکدا اے۔ سانوں پہلاں توں وی ودھ چوکنا ہون دی لوڑ ہووے گی۔ اج جے خدانخواستہ ساڈی زمین وی جنگ دی اگ دے شعلیاں وچ گھر جاوے تے اسیں کیہ کراں گے؟اسیں تے آپس وچ لڑن توں باز نہیں آئے، ٹی وی ٹاک شوز وچ سیاستداناں تے ایہناں دے پارٹی عہدیداراں نوں ککڑاں وانگوں لڑایا جاندا اے، انسان خوراک وچ ملاوٹ کرکے اپنے آپ نوں ہلاک کرن تے تلے ہوئے نیں۔ ایس کجھ دناں دی زندگی وچ عیش و آرام لئی حرام مال بنان توں باز نہیں آندے، بالاں دے کھان پین دیاں شیواں وچ وی ملاوٹ کرکے ایہناں دی زندگی نال کھیڈیا جا رہیا اے۔ اسیں اپنی اولاد لئی نجائز ذرائع توں دولت جائیداد بنا کے اپنے آپ نوں بے سکون کرنے آں تے آخر وچ کسے موذی مرض وچ مبتلا ہو کے کومے وچ چلے جانے آںمجید خاں آکھیا جے جنگ ہوندی اے تے سانوں ایہدے وچ ہر حال وچ گھسیٹیا جاوے گا۔بھارت اپنے اندرونی خلفشار توں توجہ ہٹان لئی پاکستان تے حملہ آور ہو سکدا اے۔ امریکہ نوں ایران نال نبڑن لئی قریبی ہوائی اڈیاں دی لوڑ پوے گی تے بھارت تے افغانستان نوں استعمال کرن توں کیویں باز رہ سکدا اے؟ ایہناں حالات وچ پاکستانی عوام نوں سوچنا ہووے گا تے آپس وچ اتحاد پیدا کرن دی ہر ممکن کوشش کرنی ہووے گی۔ فرقیاں دے ملاں دیاں گلاں ان سنی کرکے سانوں بیرونی دشمناں لئی اکٹھیاں ہونا پوے گا۔جمیل بادشاہ آکھیا اسیں تے ٹریفک دے قوانین دی پابندی نہیں کردے اگلے دیہاڑ سوہاوہ دے نیڑے ساڈی گڈی نوں باقاعدہ پچھا کرکے تے فیر ٹول پلازے تے سپیکر توں اعلان کرکے رکوایا گیا۔ ساڈے کاغذات پورے سن۔ ٹریفک افسر آکھیا گڈی چیک کرنی اے۔ اسیں اتر گئے۔ افسر نے گڈی چلائی تے 20منٹ بعد واپس آیا تے آندیاں ای بولیا: گڈی ویچو گے؟ اسیں ایس سوال تے ہن تک حیران آں کہ ٹریفک افسران ایس طرح وی گڈیاں خریدن دا کم ڈیوٹی دے دوران کر رہے نیں؟ ایہ تے ٹریفک پلس دا حال اے عام بندے نال کیہ گلہ کریئے؟سائیں مسکین بولے! گل اوہی اے جہڑی سرکار نے فرمائی اے انسان حرص و ہوس نوں چھڈ کے زندگی گزارے تے معاشرہ پرامن تے خوشحال بن سکدا اے، جتھوں تک سیاسی مسئلیاں دا تعلق اے تے گل ایہ اے کہ
گل من کے ضمیر دی ٹریئے
کلی دا بھانویں ککھ نہ رہوے
یعنی دل تے ضمیر دی گل من کے فیصلہ کرو تے چنگا اے چاہوے ایہدے وچ جان تے جہان وی قربان کرنا پوے تے کوئی گل نہیں۔ طارق لودھی آکھیا بالکل ٹھیک اے سائیں جی! مینوں وی شعر یاد آ گیا ایہدے تے گل ختم اے کہ دکھ گٹھڑی چکنی پوے تے چک لو:
پنڈ چاکے دکھاں دی بھاری
تے علی علی کر بیلیا

اپنا تبصرہ گھلو