گل کسے بنے لگدی نظر آ رہی اے؟

لکھت:  محمد نواز رضا

پارلیمان دے دوواں ایواناں دے اجلاساں دے دوران پارلیمنٹ دی غلام گردشاں وچ حکومت دا مستقبل موضوع گفتگو بنیا ہویا اے ہر کوئی ایہو سوال کردا اے کہ ایہ حکومت کنے دن چلے گی؟ بہرحال پارلیمنٹ ہاؤس وچ جتھے سرکار تے اپوزیشن وچکار نیب قنون وچ ترامیم تے مذاکرات ہو رہے نیں اوتھے حکومتی کمیٹیاں ناراض اتحادیاں نوں منان لئی سر جوڑ کے بیٹھی ہوئیاں نیں اتحادیاں دے بدلے بدلے تیور ایس گل دی عکاسی کر رہے نیں کہ سب چنگا نہیں۔ حکومتی کمیٹیاں نوں وی کجھ سمجھ نہیں آ رہیا کیوں جے ساری اتحادی جماعتاں نے اپنے اپنے مقام تے پوزیشن لے لئی اے تے تسلیم شدہ مطالبات تے عملدرآمد دا تقاضا کر رہے نیں۔ حکمران جماعت تے اتحادی جماعتاں وچ سرد جنگ نے شدت اختیار کر لئی اے۔ بظاہر سب چنگا دے گیت گائے جا رہے نیں پر سرد جنگ وچ اسلام آباد، لہور، کراچی تے کوئٹہ توں اٹھن والے دھویںنال پورا سیاسی ماحول دھندلا گیا اے کوئی سیاسی نجومی آن والے دناں دے سیاسی منظر بارے پیشگوئی نہیں کر سکدا پر سیاسی شعور رکھن والا ہر بندہ ایہ گل برملا کہہ رہیا اے کہ آن والے دناں وچ کجھ ہون والا اے۔مسلم لیگ (ق) تے حکومت وچکار برف پگھل نہیں سکی دو دن پہلاں اتحادیاں نال مذاکرات لئی قائم کیتی کمیٹیاں دا اہم اجلاس وزیر دفاع پرویز خٹک دی زیر صدارت پارلیمنٹ ہاؤس وچ ہویا۔ اجلاس وچ وزیراعلی پنجاب عثمان بزدار، گورنر پنجاب چوہدری سرور، گورنر سندھ عمران اسماعیل ،ڈپٹی سپیکر قاسم سوری، شفقت محمود، اسد عمر نے رلت کیتی جہدے وچ اتحادیاں طے شدہ امور تے عملدرآمد دا فیصلہ کیتا گیا۔ حکومتی کمیٹیاں دے اجلاس وچ پنجاب اسمبلی دے سپیکر چودھری پرویز الٰہی دی ہارڈ لائن موضوع گفتگو رہی کمیٹیاں دے ارکان نے پاکستان مسلم لیگ (ن) دے رہنماواں چوہدری شجاعت حسین ، چوہدری پرویز الہی ، طارق بشیر چیمہ ، کامل علی آغا تے مونس الہی دے تیکھے بیانات دا وی جائزہ لیا گیا۔ اجلاس وچ پاکستان مسلم لیگ (ق) تے ایم کیو ایم دے غیر لچک دار رویہ توں پیدا ہون والی صورتحال تے وی غور کیتا گیا۔ وفاقی وزیر شفقت محمود نے مسلم لیگ (ق) دے تحفظات توں اجلاس دے شرکا نوں آگاہ کیتا تے آکھیا کہ چودھری برادران نوں حکومتی طرز عمل بارے شکایتاں نیں سردست اجلاس وچ چودھری برادران دے تحفظات نوں دور کرن دا فیصلہ کیتا گیا اے۔ چودھری شجاعت حسین عمرہ دی ادائیگی لئی سعودی عرب چلے گئے نیں ایس دوران اوہناں نے صحافیاں نال گل کردیاں آکھیا اے کہ تحریک انصاف دی حکومت تے وزیراعظم عمران خان دے نال اتحاد صڑف ملکی مفاد وچ کیتا اے کوئی ذاتی لالچ نہیں اے۔ وزیراعظم اتحادیاں تے اعتماد کرن، فسادیاں دی گلاں تے کن نہ دھرن کیوں جے فسادیاں نے ہمیشہ نفرت تے انتشار دی سیاست کیتی اے۔ مسلم لیگ (ق) دے ہارڈ لائنر چودھری پرویز الٰہی اسلام آباد آن لئی تیار نیں تے نہ ای نویں حکومتی کمیٹی نال مذاکرات کرن تے راضی ہوئے نیں حکومتی کمیٹیاں نے اتحادیاں نال باضابطہ رابطہ شروع کر دتے نیں تے اوہناں نوں پہلے طے شدہ معاملات تے اک واری فیر عملدرآمد دی یقین دہانیاں کرانا شروع کر دتیاں نیں۔ کمیٹیاں دے اجلاس دے بعد وزیراعلیٰ پنجاب عثمان بزدار آکھیا اے اتحادی وی نال رہن گے تے اتحادی وی برقرار رہوے گا۔ آس لان والے پہلاں وی نکام ہوئے نیں، اوہناں نوں ہن وی مایوس ہووے گی۔ سارے معاملات وی افہام و تفہیم نال حل کر لئے جان گے۔ گورنر پنجاب چودھری سرور وی پُرامید وکھائی دیندے نیں اوہناں نے آکھیا اے اتحادیاں نال سارے معاملات خوش اسلوبی نال طے کر لئے جان گے۔ وفاقی وزیر تعلیم و تربیت شفقت محمود نے دسیا کہ اگلے ہفتے اپنے اتحادیاں نال رابطہ کرکے ملاقات کراں گے۔ ساری کمیٹیاں اپنے اپنے ٹاسک دے مطابق اتحادیاں نال ملن گیاں۔ پہلاں توں طے شدہ معاملات تے عملدرآمد کیتا جاوے گا۔ وزیر دفاع پرویز خٹک آکھیا اے اگلے ہفتے اتحادیاں نال مذاکرات شروع ہو جان گے، اتحادیاں نال مذاکرات دے پہلاں توں طے شدہ طریقہ کار تے گل ہووے گی۔وسیلیاں دے مطابق ملاقات وچ اتحادیاں دے مطالبات، عملدرآمد دا جائزہ لیا جاوے گا، پرویز خٹک نے ایس گل دی نوید سنائی اے کہ اتحادیاں نال معاملات ہفتہ عشرہ وچ طے ہو جان گے۔ ایہ گل قابل ذکر اے کمیٹیاں دے سانجھے اجلاس دے بعد صحافیاں نے پچھیا کیہ جہانگیر ترین نوں دوبارہ کمیٹیاں وچ شامل کیتا جاوے گا؟ جہدا کسے دے کول کوئی جواب نہیں سی۔ پرویز خٹک آکھیا ایس گل دا فیصلہ کرن دا اختیار وزیراعظم عمران خان دے کول اے۔ پاکستان تحریک انصاف تے مسلم لیگ (ق)وچکار تیزی نال فاصلے ودھ رہے نیں ۔ مسلم لیگ (ق) دی قیادت ایہدا ذمہ داران لوکاں نوں قرار دے رہی اے جہڑے پاکستان مسلم لیگ (ق) چھڈ کے پاکستان تحریک انصاف وچ شامل ہوئے نیں۔ پاکستان مسلم لیگ (ق) دے سینئر رہنما تے پنجاب اسمبلی دے سپیکر چودھری پرویز الٰہی لگی لپٹی رکھے بناں گل کرن والے لیڈر نیں اوہ کھل کے اپنا نکتہ نظر بیان کردے نیں۔ چودھری برادران دا موقف اے کہ دھرنا ختم کران وچ اوہناں دی مخلصانہ کوششاں نوں شک دی نظر نال ویکھیا گیا ایہدے تے طرفہ تماشا ایہ کہ وزیراعظم نے اشاریاں کنایاں وچ سازش دا ذکرکر کے چودھری برادران نوں رنج کر دتا اے۔ چودھری برادران بار بار وزیراعظم نوں سوچ سمجھ کے کوئی گل کرن تے فیر ایہدے تے قائم رہن دا مشورہ دے رہے نیں۔ پر مونس الٰہی آکھیا اے اک کمیٹی دے ہوندیاں ہوئیاں دوجی کمیٹی دا قیام بلاجواز سی۔ اسمبلی وچ کئی لوک ساڈی سوچ دے نیں۔ پر اوہناں آکھیا چودھری پرویز الٰہی وزیراعلیٰ دے امیدوار نہیں۔ ہن ویکھنا اے کہ مسلم لیگ (ق) دی اعلیٰ قیادت اپنے رویہ وچ لچک پیدا کردی اے یاں تحریک انصاف اپنا اقتدار بچان لئی اتحادیاں دے ساہمنے ڈھیر ہو جاندی اے ایس سوال دا جواب آن والے دناں وچ ای مل سکے گا۔ سردست چودھری پرویز الٰہی نے اپنے موقف وچ لچک پیدا کرن توں انکار کر دتا اے۔ وفاقی وزیر ہاؤسنگ و ورکس طارق بشیر چیمہ آکھیا اے پاکستان تحریک انصاف وڈی جماعت اے اوہدے سوچن دا انداز وکھرا اے، اوہ اپنے غلط فیصلیاں دی سزا پائے اسیں کیوں اوہناں دے غلط فیصلیاں دی بھینٹ چڑھیے۔ ڈیڑھ سال انتظار کیتا کہ معاملات چنگے ہون پر نہیں ہوئے ایہو جرم سرزد ہویا کہ اتحادی ہون دے ناطے عوام دے حقوق دی گل کیتی اسیں اک ای کشتی دے سوار آں تے کشتی ڈُبی تے ایہناں دی وجہ توں ای ڈُبے گی، کنارے لگی تے دوواں دی کشتی پار لگے گی۔ مسلم لیگ (ق) پنجاب دے جنرل سیکرٹری سینیٹر کامل علی آغا نے اعتراف کیتا اے کہ اجے تک حکومت دے نال ڈیڈ لاک برقرار اے، جہانگیر ترین کمیٹی دے فیصلیاں تے عملدرآمد دے بغیر اسیں اک قدم اگے نہیں چلاں گے۔حکومتی کمیٹی نال متحدہ قومی موومنٹ (ایم کیو ایم) پاکستان دے وفد دی ملاقات ہوئی اے اجے تاک حکومتی کمیٹی ایم کیو ایم نوں وزارت دا استعفیٰ واپس لین تے راضی نہ کر سکی۔ ایم کیو ایم کراچی پیکیج تے عملدرآمد تے اڑی ہوئی اے۔ وفاقی وزیر منصوبہ بندی اسد عمر، گورنر سندھ عمران اسمعیل، وزیر اعظم دے معاون خصوصی شہزاد اکبر تے ایم کیو ایم دے کنوینر خالد مقبول صدیقی تے فیصل سبزواری دی وچکار ہون والی ملاقات وچ کوئی پیش رفت نہیں ہوئی۔ اسد عمر آکھیا اے ایم کیو ایم نال گل بات جاری اے ۔ ایم کیو ایم نے کدی وزارت دی گل کیتی تے نہ ای ایم کیو ایم تے تحریک انصاف وچکار کوئی کشمکش اے۔ خالد مقبول صدیقی نے معنی خیز گل آکھی اے کہ ملاقات لئی آئے سی مذاکرات لئی نہیں جد کہ ساڈے جہڑے سوالات سن اوہناں دے جوابات منگے نیں۔ وزیراعظم نے کمیٹیاں نوں اتحادیاں نوں راضی کرن دا ٹاسک دے رکھیا اے جدوں تک کمیٹی توں جہانگیر نوں ڈراپ کرن توں پیدا ہون والی کشیدگی ختم نہیں ہوندی اوس ویلے تک تحریک انصاف تے مسلم لیگ (ق) وچکار فاصلے گھٹ ہون دا امکان نہیں۔ جہانگیر ترین دی وزیراعظم نال ملاقات دے بعد اجے تک وزیراعظم ہاؤس توں کوئی چونکا دین والی خبر نہیں آئی۔

اپنا تبصرہ گھلو