وزیراعظم عمران خان دا کامیاب دورہ ملائیشیا

لکھت:  اعجاز علی ساغر

وزیراعظم پاکستان عمران خان ملائیشیا دا کامیاب دورہ کرکے وطن واپس اپڑ چکے نیں موجودہ صورتحال وچ وزیراعظم دا ایہ دورہ بہت اہم سی۔ ملائیشین وزیراعظم مہاتیر محمد نے پچھلے دناں مسئلہ کشمیر تے پاکستانی موقف دی حمایت کردیاں آکھیا کہ بھارت کشمیریاں تے مظالم بند کرے تے مظلوم کشمیریاں نوں اوہناں دا حق خود ارادیت دیوے وزیراعظم پاکستان عمران خان نوں دورہ ملائیشیا دی لوڑ پیش کیوں آئی؟ ہویا انج کہ مسئلہ کشمیر تے ملائیشیا تے مہاتیر محمد نے کھل کے پاکستان دی حمایت کیتی جو ظاہر اے بھارت نوں کیویں ہضم ہو سکدی سی چنانچہ انڈیا نے ملائیشیا توں پام آئل دی خریداری بند کر دتی تے دھمکی دتی جے ملائیشیا نے کشمیر تے پاکستان دی حمایت وچ ہور کجھ آکھیا تے اسیں اوہدے نال تجارت بند کر دیواں گے بھارت ملائیشیا توں سالانہ 4ٹن پام آئل خریددا اے جد کہ پاکستان اک ٹن لیندا اے۔ بھارت دی ایس دھمکی دے بعد ایہ دورہ بہت ضروری سی۔ وزیراعظم پاکستان عمران خان آکھیا اسیں ملائیشین گورنمنٹ، عوام تے اسپیشلی وزیراعظم مہاتیر محمد دے شکر گزار آں کہ جہناں نے مشکل ویلے وچ پاکستان دا ساتھ دتا۔ اسیں ملائیشیا دے ایس نقصان دا ازالہ کراں گے۔
وزیراعظم پاکستان عمران خان دی ملائیشین وزیراعظم مہاتیر محمد نال ون آن ون ملاقات ہوئی جہدے وچ عمران خان نے کوالالمپور سمٹ نہ کرن تے معذرت کیتی تے آکھیا ساڈے دوست ملکاں ولوں ایہ خدشہ ظاہر کیتا جا رہیا سی کہ ایس سمٹ نال مسلم امہ دے تقسیم ہون دا خدشہ اے ایس لئی ایہدے وچ رلت نہ کیتی جاوے۔ یادرہوے ایس سمٹ وچ عمران خان دے رلت نہ کرن تے ترکی دے صدر رجب طیب اردگان نے پریس کانفرنس کردیاں دسیا سی کہ پاکستان سعودی عرب دی دھمکی دے بعد ایس سمٹ وچ شریک نہیں ہویا کیوں جے سعودی عرب نے پاکستان نوں دھمکی دتی اے جے عمران خان نے سمٹ وچ رلت کیتی تے اوہ سعودیہ وچ کم کرن والے 40لکھ پاکستانیاں نوں نوکریاں توں کڈھ دین گے تے پاکستان دی امداد وی روک لئی جاوے گی۔ رجب طیب اردگان دے ایہناں الزامات تے سعودی ولی عہد نے تردید کیتی تے آکھیا پاکستان تے سعودیہ دے تعلقات اجہے نہیں کہ ایس طرح دی نوبت آوے ۔ ساڈے تعلقات مثالی نیں ایہدے بعد وزیراعظم عمران خان نے سعودی عرب دا دورہ کیتا تے سعودی ولی عہد نال ملاقات کرکے سارے خدشات نوں دور کیتا۔ وزیراعظم عمران خان دے دورہ ملائیشیا وچ قیدیاں دے تبادلے تے دستخط ہوئے اوہناں نے مہاتیر محمد تے ملائیشیا نوں یقین دوایا کہ اوہ اگلی سمٹ وچ ضرور رلت کرن گے کیوں جے ایس سمٹ نال مسلم امہ وچ تقسیم نہیں سگوں محبت پیدا ہووے گی عمران خان نے وزیراعظم بن دیاں ای آکھیا سی کہ اوہ ملائیشیا دی مثال نوں ساہمنے رکھدیاں ہوئیاں پاکستان وچ کرپشن دا خاتمہ کرن گے تے اداریاں نوں خود مختار تے آزاد بنان گے۔ عمران خان نے مہاتیر محمد نوں اپنا آئیڈیل قرار دیندیاں آکھیا سی کہ میں اوہناں توں بہت کجھ سیکھنا آں۔ عمران خان دے ایہناں لفظاں تے مہاتیر محمد نے عمران خان دا شکریہ ادا کیتا سی۔
وزیراعظم پاکستان عمران خان دی دورہ ملائیشیا تے وفود دی سطح تے وی مہاتیر محمد دے نال ملاقات ہوئی جہدے وچ باہمی تجارت، سیاحت سنے دوجے شعبیاں نوں فروغ دین تے گل بات ہوئی وزیراعظم دے ایس دورے وچ اوہناں نال وزیر خارجہ شاہ محمود قریشی، وزیر منصوبہ بندی اسد عمر تے مشیر تجارت عبدالرزاق داؤد وی نال سن۔ ایس دورے دا مقصد باہمی تعلقات نوں فروغ دینا سی تے جہڑے خدشات کوالالمپور سمٹ وچ رلت نہ کرن توں پیدا ہوئے سن ایہناں نوں دور کرنا سی۔ وزیراعظم پاکستان عمران خان نے تھنک ٹینک نال گل کردیاں آکھیا اسیں مسئلہ کشمیر تے اقوام عالم ول ویکھ رہے آں۔ 5اگست 2019توں ہن تک مقبوضہ کشمیر نوں بھارتی فوج نے دنیا دی سب توں وڈی تے بدترین جیل وچ بدل دتا اے جتھے مظلوم تے نہتے کشمیریاں تے مظالم دے پہاڑ توڑے جا رہے نیں۔ اقوام متحدہ مظلوم کشمیریاں نوں اوہناں دا حق خود ارادیت دوائے عمران خان نے دورہ ملائیشیا وچ کشمیر دا مسئلہ بڑے واضح انداز وچ پیش کیتا۔ دورہ ملائیشیا توں پہلاں عمران خان نے 5فروری یوم یکجہتی کشمیر موثر انداز وچ منان دی پوری قوم توں اپیل کیتی جہنوں بھرپور انداز وچ منایا گیا ۔ وزیراعظم پاکستان عمران خان دے دورے دے اختتام تے ملائیشین وزیراعظم دا شکریہ ادا کردیاں ایس عزم دا اعادہ کیتا کہ پاکستان ہر مشکل ویلے وچ ملائیشیا دے نال کھڑا اے تے ساڈے تعلقات ہور مستحکم ہون گے۔

اپنا تبصرہ گھلو