مہنگائی دے ذمے وار کون؟

لکھت:  ڈاکٹر اخترشمار

اک عورت اپنے خاوند دی دل دی بیماری توں بہت پریشان سی۔ ڈاکٹر اوہنوں مشورہ دتا کہ اوہ اپنے خاوند دا دل تبدیل کرا لوے۔ عورت راضی ہو گئی تے فیر کجھ دناں وچ ای دل بدل دتا گیا۔ کجھ مہینے بعد عورت ڈاکٹر کول آئی تے شکایت کیتی۔
غضب ہو گیا ڈاکٹر صاحب! امیرا خاوند مکمل بدل گیا اے، پہلاں جہڑا وعدہ کردا سی پورا کردا ہن خوبصورت وعدے تے پہلاں توں وی ودھ کردا اے پر کوئی اک وعدہ وی پورا نہیں کردا۔
ڈاکٹر عورت دی شکایت سن کے مسکرایا تے بولیا: محترمہ، سوری، آپریشن دے ویلے میرے کول کسے عام بندے دا دل سٹاک وچ نہیں سی۔ میں اوہدا دل اک سیاستدان (لیڈر) دے دل نال بدل دتا سی۔
ایہ اک عام جیہا تے قدرے گھسا پٹیا لطیفہ اے پر ساڈے ایتھوں دے سیاسی رہنماواں تے پورا اتردا اے۔ الیکشن آندیاں ای عوام، اک عام امیدوار توں لے کے پارٹی لیڈر تک دے وعدے سنن لگدے نیں تے فیر الیکشن جتن دے بعد وی سیاستدان وعدے ای کردے رہندے نیں۔
پی ٹی آئی دی تبدیلی دا وعدہ تے پارٹی دا ماٹو بن چکیا پر حرام اے جو اجے تک کوئی تبدیلی ویکھن وچ آئی ہووے ہاں ایناں ضرور اے، غریباں لئی ہن ساہ لینا وی اوکھا ہو چکیا اے۔ عام بندہ مہنگائی، بیروزگاری تے ناانصافی تے مرن دے نیڑے اے۔ کوئی پچھن والا نہیں۔ آٹا تے چینی دی ملاں دے مالکان عموماً حکومتاں وچ شامل رہندے نیں سگوں اسمبلی دے کئی اراکین کسے نہ کسے کاروبار تے تجارت نال جڑے نیں۔ جتھے سڑک نکلدی ہووے، ایئر پورٹ یاں کسے اہم منصوبہ پراجیکٹ دی منظوری دتی جاندی اے، تے ظاہر اے سب توں پہلاں پارلیمنٹ دے ممبران ای دے علم وچ آندا اے سو ایہ اجہی زمیناں نوں جتھے ایہ پراجیکٹ بن دا ہووے، سستے ریٹ خرید لیندے نیں تے فیر مال بناندے نیں۔ ایہو نہیں چینی آٹے نوں کجھ دن سٹاک کرکے مصنوعی قلت پیدا کرکے کئی گنا ریٹ ودھا کے کروڑاں روپے کما لیندے نیں۔
وزیراعظم کرپشن کیہ ختم کرن گے؟ اوہ آپ اپنی تقریراں وچ ایہناں خیالات دا اظہار کردے سن کہ کیویں پٹرول، چینی، آٹا مہنگا کیتا جاندا اے؟ کیویں زمیناں مہنگیاں ہوندیاں نیں۔ ہن وی اوہی کجھ ہو رہیا اے۔ ہن اوہناں نوں کون سمجھائے کہ تہاڈے قریبی ساتھی ای ایس مہنگائی دا موجب نیں۔ غریب بندے لئی دو ویلے دی روٹی کھانا کمانا مشکل ہو گیا اے۔ لگدا اے غریباں نوں ختم کرکے ای پاکستان توں غربت ختم کیتی جا رہی اے۔ صدر ایوب دے دور وچ اک واری چینی مارکیٹ توں غائب ہوئی سی اگلے دیہاڑ حکومت ولوں سخت اعلان کیتا گیا کہ صبح تک چینی مارکیٹ وچ نہ آئی تے ذخیرہ کرن والیاں نوں الٹا لٹکا دتا جاوے گا۔ اگلے دیہاڑ ای مارکیٹ وچ چینی موجود سی۔
حکومتاں اپنے عملی اقدامات توں پہچانی جاندیاں نیں۔ صرف بیانات نال کجھ نہیں ہوندا۔ بیانات تے سختی نال عملدرآمد کران والی شخصیت دا رعب داب وی اہمیت رکھدا اے، ہن ساڈے پنجاب دے وزیراعلیٰ جنے مرضی سخت بیانات وڈی وڈی شہ سرخیاں دے نال شائع کراندے رہن۔ اوہناں دے بیانات نوں سنجیدگی نال کون لیندا اے؟ عمران خان نے تے اوہناں نوں باقاعدہ اشتہاراں وچ اپنی تصویراں چھپوان دا مشورہ وی دتا اے پر مافیا تے بزدار صاحب دی شرافت تے دیانت دا کوئی اثر نہیں ہوندا۔ جدوں اوہ آپ کہندے نیں کہ میں اجے سیکھ رہیا آں تے عملی اقدامات کرن والی مشینری اوہناں دی گلاں دا کیہ اثر لوے گی؟
دوجی گل ایہ اے کہ ایس ملک دے عوام وی ڈنڈے دے نیں، اسیں بطور قوم وی کرپٹ آں۔ سرکار مہنگائی دا اعلان نہ وی کرے تے ذرا جہی قلت تے تاجر حضرات قیمتاں کئی گنا ودھا دیندے نیں۔ آٹا مہنگا ہویا اے تے ایہدی وجہ دھند بارش وی سی۔ سپلائی ذرا جہی متاثر ہوئی تے ذخیرہ اندوزاں نے ریٹ ودھا دتے۔ اج ایہ خبر چلے کہ پٹرول دو روپے لٹر مہنگا کیتا جاوے گا بس خبر دے نال ای پٹرول مہنگا فروخت ہون لگدا اے۔ بجلی گیس دیاں قیمتاں آسمان نال گلاں کر رہیاں نیں۔ عمران خان نظام بدلن دی کوششاں وچ نیں جد کہ ایہدے لئی پہلاں اوہناں دی کابینہ تے اسمبلی دے اراکین نوں بدلنا ہووے گا۔ اراکین اسمبلی تے صرف اپنی تنخواہواں دے ودھان دی کوشش کر رہے نیں۔ سینیٹر کروڑاں رقم نال سیٹ حاصل کر دے نیں۔ ہن اوہ وی تنخواہ ودھان دا بل لے آئے اوہ تے کجھ نہ کجھ شرام گئی کجھ اراکین نوں تے بل رد ہو گیا نہیں تاں اوہناں دی تنخواہواں ودھ جاندیاں۔ عمران خان اپنے مشیراں دی تعداد گھٹ کرن، دوست نوازی دے بجائے عوام نوں نوازن۔ لنگر شیلٹر ہوم ضرور کھولن ۔ گدا گراں نوں وی اوتھے پناہ دین پر فی الفور اشیائے خوردنی تے دواواں سستی کرن دی پالیسی تے عمل کرن نہیں تاں ٹڈی دل دا موسم اے تے اتحادی وی ہلچل وچ نیں ایہو حال رہیا تے:
تمہاری داستاں تک بھی نہ ہوگی داستانوں میں

اپنا تبصرہ گھلو