مریم نواز دا ’’چپ دا روزہ‘‘ تے جنوبی پنجاب دا لولی پاپ

لکھت:محمد نواز رضا

آخر کار مسلم لیگ (ن) دی نائب صدر مریم نواز نے چار مہینے بعد چپ دا روزہ توڑ دتا اے۔ اوہناں نے ضمانت تے رہائی دے بعد اپنے آپ نوں جاتی امرا وچ قید کر لیا سی ایس دوران اوہناں نے اپنے آپ نوں عملی سیاست توں وکھرا رکھیا حتیٰ کہ پارٹی دے کسے لیڈر نال ملاقات نہیں کیتی حکومت نے مریم نواز دا ناں ایگزٹ کنٹرول لسٹ تے پا رکھیا اے حکومت نے اوہناں نوں اپنے پیو میاں نوازشریف دی عیادت تے تیمار داری لئی برطانیہ جان دی اجازت دین توں انکار کر دتا اے جہدے بعد مریم نواز نے برطانیہ جان دی اجازت حاصل کرن لئی لہور ہائی کورٹ دا بوہا کھڑکایا اے اجے تک لہور ہائی کورٹ نے اوہناں دی عرضی تے کوئی فیصلہ نہیں کیتا سیاسی حلقیاں وچ مریم نواز دی خاموشی وچ طرح طرح دی چہ میگوئیاں کیتی جا رہیاں سن۔دوجے پاسے اجیہا وکھائی دیندا اے حکومت مریم نواز نوں کسے قیمت تے بیرون ملک جان دی اجازت دیوے گی کیوں جے اوہ مریم نواز نوں سیاسی یرغمال دے طور تے پاکستان وچ رکھنا چاہندی اے جدوں مریم نواز نے رابطہ عوام مہم شروع کیتی تے عوام ولوں اوہناں نوں زبردست رسپانس ملیا جہدے بعد اوہناں نوں نیب دے اک کیس وچ گرفتار کر لیا لہور ہائی کورٹ توں ضمانت تے رہائی دے بعد مریم نواز نے مصلحتاً خاموشی اختیار کر لئی حکمران جماعت نے وی مریم نواز دی خاموشی نوں اوہناں دی کمزوری سمجھ لیا پر اوہناں نے اچانک وفاقی دارالحکومت اسلام آباد دا دورہ کرکے سرپرائز دتا۔ اوہناں نے اپنی آمد دا پیشگی اعلان نہیں کیتا اجے اوہناں دی گڈی موٹروے تے ای سی کہ ٹی وی چینلاں تے اوہناں دے دورہ اسلام آباد دی چیخدی چنگاڑدی خبر نے مسلم لیگی کارکناں نوں متحرک کر دتا تے مختصر نوٹس تے سینکڑاں کارکن مسلم لیگ (ن) دے سینئر نائب صدر شاہد خاقان عباسی تے سیکرٹری جنرل احسن اقبال دی رہائش گاہواں تے اکٹھے ہو گئے کیپٹن (ر) صفدر مریم نواز دی گڈی ڈرائیو کر رہے سن اوہناں دے سیاسی استاد سینیٹر پرویز رشید نال سن۔ مریم نواز دی اسلام آباد وچ دبنگ انٹری نے مسلم لیگی کارکناں وچ جوش و ولولہ پیدا کر دتا۔ مریم نواز دی آمد تے اسلام آباد دا سرکاری ماحول وزیراعظم نوازشریف، میری تیری آواز قوم دی آواز مریم نواز، شیرنی، شیرنی دے نعریاں نال گونج پیا۔ مریم نواز دی باڈی لینگوئج توں اندازہ لایا جا سکدا سی کہ اوہناں دا مورال کافی اُچا اے چار مہینے بعد سیاسی منظر تے نمودار ہون دے بعد اوہناں دے انداز تخاطب توں اندازہ لایا جا سکدا اے کہ اوہ بیرون ملک جان دی اجازت نہ ملن تے ملکی سیاست وچ سرگرم حصہ لین گیاں اوہناں نے لگی لپٹی رکھے بناں کھل کے حکومت تے تنقید کیتی۔ شاہد خاقان عباسی تے احسن اقبال دا مریم نواز نال قریبی رابطہ اے تے اوہ ایہناں نال پارٹی لائن تے مشاورت وی کردے نیں عام تاثر ایہ اے کہ اوہ ہارڈ لائنر ہون دی وجہ توں اوہناں نوں مریم نواز دی آشیر باد حاصل اے ایہو وجہ اے مریم نوازشاہد خاقان عباسی تے احسن اقبال دی ضمانت تے رہائی دے بعد حوصلہ افزائی لئی اوہناں دی رہائش گاہواں تے گئیاں تے اوہناں دے اہل خانہ نال اظہار یکجہتی کیتا سوشل میڈیا تے ہزاراں بندیاں نے مریم نوازدے جاتی امرا توں باہر نکلن دے فیصلے نوں سراہیا اے۔ اوہناں نے شاہد خاقان عباسی تے احسن اقبال نال ملاقات دے دوران پارٹی نوں متحرک کرن دی حکمت عملی تے تبادلہ خیال کیتا شنید اے کہ مریم نواز جلد ضلعی سطح تے ورکرز کنونشن نال خطاب کرن گیاں۔ مریم نواز دے اچانک منظر عام تے آن نال جتھے مسلم لیگی کارکناں دا حوصلہ ودھ گیا اے اوتھے سیاسی حلقیاں وچ وی ہلچل پے گئی اے۔ مریم نواز دے منظرعام تے آن دے بعد سوشل میڈیا دی ویب سائٹ ٹویٹر تے Lionessisbackدے ہیش ٹیگ دے نال ٹاپ ٹرینڈ بن گیا جہدے وچ ہزاراں لوکاں نے اوہناں دے حق وچ ٹویٹس کیتیاں، منظرعام تے آن تے خاموشی توڑن تے مسرت دا اظہار کیتا۔ ایہ گل قابل ذکر اے کہ بعض ٹویٹر صارفین نے اوہناں تے تنقید وی کیتی اے تے آکھیا کہ اوہ اپنے چچا شہباز شریف دے بیرون ملک ہون توں نجائز فائدہ چک رہیاں نیں جے میاں شہباز شریف دی وطن واپسی وچ تاخیر ہو گئی تے یقینا مریم نواز پارٹی وچ قیادت دا خلا پُر کرکے دوبارہ میدان وچ آ جان گیاں پر پارلیمنٹ دے اندر میاں شہباز شریف دا ای رول ہووے گا جدوں مریم نوازاسلام آباد آئیاں تے اوہناں نوں میڈیا دے سخت سوالات دا وی ساہمنا کرنا پیا اوہناں دی لمی چپ بارے استفسار کیتا گیا تے اوہناں آکھیا میں چپ سی تے ایہدی وی بہت ساری وجوہات ہو سکدیاں نیں ذاتی وجوہات تے چپ سی، میاں نوازشریف دی طبیعت خراب اے، جدوں وڈے ہدایت دین گے تے اگے آ کے کردار ادا کراں گی۔آئین و جمہوریت تے سویلین بالادستی دے نال اوہناں دی کمٹمنٹ ہور مضبوط ہوئی اے۔ جے کوئی سمجھدا اے کہ ڈرا دھمکا کے جیل وچ سُٹ کے خوف وچ مبتلا کر سکدا اے تے اوہدی سوچ غلط اے، آئین ، پارٹی تے سیویلین بالادستی لئی میرا عزم کمزور نہیں مضبوط ہویا اے، اوہناں آکھیا میاں نوازشریف دے دل دی اک شریان 90فیصد بند اے، جہدا علاج ہونا ضروری اے، عدالت وی جاندی اے میرے اُتے مقدمات دی وجہ کیہ اے، لندن جان دی اجازت مل جاوے تے چنگا اے، نہیں ملی تے والد صاحب نوں چھیتی توں چھیتی علاج کران دا کہواں گی۔ اوہناں آکھیا اقتدار وچ رہن نال جناں تحریک انصاف بے نقاب ہوئی اے جے حکومت وچ نہ ہوندی تے کون اوہدی اصلیت جاندا اوہناں آکھیا حکومت برطانیہ نوں خط وچ ایہ وی لکھنا چاہیدا سی کہ نوازشریف دی زندگی نوں خطرے دی رپورٹ وی اوہناں نے ای بنائی سی۔ اوہناں آکھیا خوف دا ایہ عالم ا ے کہ اج میڈیا زنجیراں وچ جکڑیا ہویا اے، پارٹی ڈسپلن دی پابند آں جے پارٹی ولوں کردار ادا کرن دا آکھیا گیا تے بھرپورکردار ادا کراں گی مریم نواز دے جاتی امرا توں باہر نکلن نال مسلم لیگی کارکناں وچ جوش و خروش دیدنی اے انج وکھائی دیندا اے آن والے دناں وچ میاں شہباز شریف پارلیمنٹ دے اندر تے مریم نواز پارلیمنٹ دے باہر سیاست کرن گیاں۔ قومی اسمبلی دے 20ویں سیشن دے دوران مسلم لیگ (ن) دی پارلیمانی پارٹی دے اجلاس منعقد ہوئے نیں جہناں وچ بطور حزب اختلاف پارٹی دی کارکردگی تے عدم اطمینان دا اظہار کیتا گیا جہناں وچ پارٹی دے رہنماواں نے خود احتسابی کیتی تے ایس گل دا برمال اعتراف کیتا مسلم لیگ (ن) توں عوام نے جنی توقعات وابستہ کر رکھیاں نیں اوہناں نوں پورا نہیں کر رہی۔ اجلاس نال خطاب کردیاں مسلم لیگ لیگ (ن) دے سینئر نائب صدر شاہد خاقان عباسی آکھیا بطور اپوزیشن جماعت اسیں پارلیمنٹ وچ موثر کردار ادا نہیں کر پا رہے پہلی واری عوام حزب اختلاف ول ویکھ رہے نیں پر اسیں کجھ کر نہیں پا رہے اک اجلاس وچ تے ارکان پھٹ پئے تے پارٹی پالیسیاں تے سخت تنقید کیتی تے کھلم کھلا پارٹی دے قائد نوازشریف دے بیانیہ نوں پس پشت پان دا الزام لاگو کر دتا اک رکن نے تے ایتھوں تک کہہ دتاچار لوک عقل کل نہیں ہوندے مشاورت دا عمل وسیع کیتا جاوے سینیٹر پیر صابر شاہ آکھیا کہ تحریک انصاف دی ناقص کارکردگی دا مسلم لیگ (ن) نوں سیاسی فائدہ چکنا چاہیدا سی۔ سانوں نوازشریف دے بیانیہ تے چلنا ہووے گا نہیں تاں عوام ساڈا ساتھ چھڈ جان گے، اسیں پارٹی وچ صرف نوازشریف دے احکامات من دے یں پر مسلم لیگ (ن) صرف پنجاب دی پارٹی بن کے رہ گئی اے۔ احسن اقبال آکھیا پیر صابر شاہ جذبات وچ بہت کجھ کہہ گئے نیں پر اوہناں دی کجھ گلاں ٹھیک تے کجھ ٹھیک نہیں مسلم لیگ (ن) وچ اتحاد تے اتفاق دا محور نوازشریف نیں، پارٹی وچ کسے قسم دا کوئی اختلاف نہیں پارلیمانی پارٹی دے اجلاس وچ محسن شانواز رانجھا نے اپوزیشن لیڈر شہباز شریف دی وطن واپسی دا مطالبہ کر دتا جہدی ارکان دی اکثریت نے تائید کیتی۔ اوہناں آکھیا ساری جماعتاں دے کاؤنٹرز تے اوہناں دی پارٹی قیادت موجود اے جد کہ ساڈا کاؤنٹر خالی اے پارٹی دی صفاں توں میاں شہباز شریف دی واپسی دا مطالبہ حیران کن گل اے۔وفاق نے صوبہ جنوبی پنجاب دے قیام وچ پیشرفت لئی پہلے مرحلے وچ بہاولپور وچ وزیراعلیٰ سیکرٹریٹ قائم کرن دا اعلان کر دتا اے۔ سیکرٹریٹ تے ساڈھے تن ارب روپے دی لاگت آوے گی۔ ایڈیشنل چیف سیکرٹری تے ایڈیشنل آئی جی پلس دی تعیناتی ہووے گی، یکم اپریل توں وفاق دے فیصلیاں تے عملدرآمد شروع ہو جاوے گا۔ تحریک انصاف نے جنوبی پنجاب دا صوبہ بنان دا وعدہ کر رکھیا اے پر حکومت قائم ہوئے ڈیڑھ سال ہون نوں اے پر اجے تک جنوبی پنجاب دا وزیراعلیٰ سیکرٹریٹ قائم ہون دا ای اعلان ہو سکیا۔ وزیر خارجہ شاہ محمود قریشی نے وزیراعظم عمران خان دی زیر صدارت منعقد ہون والے اجلاس وچ بہاولپور وچ وزیراعلیٰ سیکرٹریٹ قائم کرن دی مخالفت کیتی تے ایس گل تے زور دتا گیا وزیراعلیٰ سیکرٹریٹ ملتان وچ قائم کیتا جاوے پر وزیراعظم عمران خان نے بہاولپور صوبہ بنان دے حامی ارکان نوں مطمئن کرن لئی بہاولپور وچ وزیراعلیٰ سیکرٹریٹ قائم کرن دے حق وچ اپنا بھار پا دتا بھانویں حکومت بہاولپور وچ وزیراعلیٰ سیکرٹریٹ دے قیام نوں تحریک انصاف حکومت دا جنوبی پنجاب صوبہ ولوں پہلا قدم قرار دے رہی اے پر اپوزیشن ایس اقدام نوں جنوبی پنجاب دے عوام نوں لولی پاپ دین دے مترادف قرار دے رہی اے۔ مسلم لیگ (ن) نے 8مہینے پہلاں جنوبی پنجاب تے بہاولپور دے دو نویں صوبے بنان دی آئینی ترمیم پارلیمان وچ جمع کرا رکھی اے جہڑی قومی اسمبلی سیکرٹریٹ دے سردخانہ وچ پئی اے حکومت نے ایہ جاندیاں ہوئیاں کہ ایہدے کول پارلیمنٹ وچ دو تہائی اکثریت حاصل نہیں قومی اسمبلی دے آئندہ سیشن وچ جنوبی پنجاب دا صوبہ قائم کرن دے آئینی ترمیم پیش کرن دا اعلان کر دتا اے مسلم لیگ (ن)تے پیپلزپارٹی دی حمایت دے بغیر حکومت لئی نواں صوبہ بنانا ممکن نہیں ایس لئی نہ نومن تیل ہووے گا نہ رادھا نچے گی دوجے پاسے مسلم لیگ (ن) دے رکن قومی اسمبلی مرتضیٰ جاوید عباسی نے قومی اسمبلی تے جمعیت علماء اسلام (ف) دے مرکزی رہنما سینیٹر طلحہ محمود نے سینیٹ وچ ہزارہ دا صوبہ بنان دی آئینی ترامیم جمع کرا دتیاں نیں انج وکھائی دیندا اے نویں صوبے بنان دی گل چلے گی تے پنڈورہ باکس کھل جاوے گا۔ ایم کیو ایم کراچی دا نوں صوبہ بنان دا مطالبہ لے کے آ جاوے گی۔

اپنا تبصرہ گھلو