ماہم دی بغاوت

لکھت: رئوف کلاسرا

امریکہ وچ عمران خان دا رومانس باقی اے۔
اسیں پاکستانی کجھ وی کہندے رہیے پر امریکی ہن وی سمجھدے نیں کہ پاکستانیاں نوں اجے سمجھ نہیں کہ عمران خان صاحب کیہ کیہ وڈے کم کر رہے نیں۔پاکستانیاں توں پچھیا جاوے تے اوہ کہندے نیں کہ امریکی پاکستانیاں نوں ایس لئی عمران خان چنگے لگدے نیں کہ جو کجھ پاکستان وچ فیصلے ہوندے نیں ایہناں دا چنگا بھیڑااثر ایہناں امریکی پاکستانیاں تے نہیں پیندا ایس لئی اوہ ایہ سمجھدے نیں کہ خان صاحب دی حکومت پاکستان دی بہترین حکومتاں وچوں اے۔ فیر ڈالر دا ریٹ ودھن دا وی اوہناں نوں فائدہ اے۔ اوہ پاکستانی میڈیا توں ناراض لگدے نیں تے بعض تے ایہ وی کہندے نیں جے خان صاحب دے وزیر تے قریبی کرپشن کر رہے نیں یاں چینی سکینڈل یاں کنک سکینڈل یاں دوائیاں دا سکینڈل یاں ہن ماسک سکینڈل وچ ارباں کما لئے گئے نیں تے فیر وی میڈیا نوں اوہ سکینڈل رپورٹ نہیں کرنے چاہیدے۔ تسیں حیران ہوندے او۔ تہاڈی اکھاں وچ حیرانی ویکھ کے اوہ تہاڈا منہ بند کران لئی اگوں کہندے او: تے فیر تسیں لوک زرداری تے شریف خاندان نوں واپس لیانا چاہندے او؟ تسیں اوہناں نوں اجے دسن دی کوشش کر رہے ہوندے او کہ جناب اک صحافی کیہ کریوہ کیویں خان صاحب دے قریبی ساتھیاں دے مبینہ ارباں روپے کمان دے سکینڈل نوں ایس لئی رپورٹ نہ کرے کہ ایہدے توں نوازشریف تے زرداری واپس آ جان گے؟ سوال ایہ اے کہ ایہ گل عمران خان تے اوہناں دے وزیر یاں قریبی دوست کیو ں نہیں سوچندے؟ جہڑی گل وزیراں یاں عمران خان صاحب دے سوچن دی اے اوہ میڈیا کیوں سوچے؟ میڈیا نوں اک طرح توں بلیک میل کیتا جا رہیا اے کہ حکومت وچ مال بنان والیاں نوں ایکسپوز کیتا تے تساں لوک بالواسطہ شریف تے زرداری نوں واپس لیان دے مشن تے کم کر رہے او۔ انج تاں ایہ وی تے ہو سکدا اے کہ مبینہ طور تے وزیراعظم دے جہڑے قریبی چینی کنک یاں دواواں نال مال بنا رہے نیں اوہ دراصل شریفاں تے زرداریاں دا کم آسان کر رہے ہون۔ جنی ایہناں سکینڈلز توں سرکار بدنام ہووے گی ایناں ای شریفاں دا فائدہ ہووے گا۔ جدوں تسیں ایہ جواز دیندے او تے تہانوں جواب ملدا اے کہ چلو فیر ایہ دسو کہ عمران خان دی تھاں کیہنوں لیان گے؟ کوئی بندہ ای نہیں بچیا… تے اوہ کہندے نیں کہ اوہ آخری آس نیں۔تسیں ایہناں نوں فلاسفی نال سمجھان دی کوشش کردے او کہ ہزاراں ورھیاں توں انسان دنیا وچ آندے جاندے رہندے نیں۔ اللہ دے نیک لوک نہ رہے، وڈے وڈے بادشاہ نہ رہے پر دنیا فیر وی چلدی رہی تے چلدی رہوے گی۔ لوک اہم ضرور ہوندے نیں پر ضروری کوئی نہیں ہوندا۔ جان ایف کینیڈی توں ودھ پاپولر صدر امریکن ہسٹری وچ کوئی نہیں آیا۔ جدوں اوہ قتل ہویا تے سب نوں ایہو لگیا سی کہ شاید قیامت آ گئی۔ اج 65,60ورھے بعد وی امریکہ چل رہیا اے تے شاید بہتر چل رہیا اے۔خیر اک دو چیزاں اجہی ہوئیاں جہناں نے مینوں کجھ حیران کیتا۔ اک تے ڈاکٹر عاصم صہبائی وچ تبدیلی نوٹ کیتی جہڑی رات الیکشن ہو رہے سن ، عاصم نے عمران خان دے حق وچ فیس بک تے کئی چیزاں لا رکھیاں سن تے گھر تے وی ایہناں سب نے اک جشن دا سماں بنھیا ہویا سی تاں جے بیٹھ کے الیکشن رزلٹ نوں ویکھیا تے سنیا جاوے۔ سب دی طرح عاصم وی عمران خان دے حق وچ جوشیلے سن۔ مینوں وی کہندے کہ عامر متین تے تسیں خان صاحب تے ہتھ ہولا رکھیا کرو۔ میں محسوس کیتا کہ ڈاکٹر عاصم صہبائی وچ ایس واری تبدیلی سی۔ اوہ ہن عمران خان دے ویسے جوشیلے حامی نہیں رہے۔ بھاویں عاصم صہبائی دے پیو شاہین صہبائی عمران خان دے حق وچ دلائل دیندے نظر آندے نیں عاصم دی امی افسانہ صاحبہ وی عمران خان دی سپورٹر نیں ایہدے باوجود عاصم صہبائی عمران حکومت توں ودھ متاثر نہیں لگ رہیا سی۔ جدوں عاصم دے ابو تے امی میرے اُتے چڑھائی کر رہے سن تے عاصم صہبائی میری سپورٹ کر رہیا سی۔ اوہنے دو تن واری آکھیا: ابو امی جہڑے سوالات رؤف بھائی کر رہے نیں تسیں ایہناں دا وی تے جواب دیو۔ لگ رہیا سی عاصم صہبائی وی ایس اٹھارہ ویہہ مہینے دے اقتدار تے پالیسیاں توں مطمئن نہیں سن حالاں جے جناں میں عاصم نوں اپنے امی ابو دا احترام تے پیار کردے ویکھیا اے کسے نوں نہیں ویکھیا ہووے گا۔ اوہ ماپے تے جان چھڑکدا اے پر ایس معاملے وچ اوہنوں لگ رہیا سی کہ عمران خان صاحب توں گل نہیں بن پا رہی۔ایسے طرح دا اک منظر اکبر چوہدری دے گھر وی ویکھیا جتھے نرگس بھابھی تے اکبر چوہدری بڑے زور و شور نال عمران خان دی تعریفاں دے پل بنھ رہے سن۔ میز دے آلے دوالے میرے علاوہ اکبر چوہدری تے نرگس بھابھی دی دھی ماہم وی موجود سن جد کہ اکبر چوہدری دی نکی جہی اک بھتیجی ہر اک توں پچھدی پھر رہی سی کہ اوہ عمران خان تے نہیں؟ اکبر چوہدری دا عمران خان دے ہسپتال لئی چندہ اکٹھا کرن وچ بڑا اہم رول اے۔ عمران خان امریکہ جاندے تے اکبر چوہدری دے ایسے گھر وچ ٹھہردے۔ نرگس بھابھی کہن لگیاں: عمران خان طبیعت دا سادہ بندہ اے دو تن شرٹاں تے اک جینز دے نال پورا امریکہ اوہ تے اکبر پھر لیندے سن۔میرے چوہدری صاحب تے نرگس بھابھی وچکار بحث ہو رہی سی تے اوہناں دی دھی ماہم چپ کرکے سن رہی سی۔ ماہم شوکت خانم ہسپتال دے کئی فنڈز ریزنگ فنکشنز وچ اہم کردار ادا کردی رہی اے تے فنکشنز وچ سٹیج دا کم وی سنبھالدی رہی اے۔ اوہ کافی دیر تک ساڈی گلاں سن دی رہیاں۔ آخر اوہ اپنے ماما بابا نوں ویکھ کے بولی: جو کجھ پاکستانی میڈیا تے سوشل میڈیا دے نال کیتا جا رہیا اے اوہ چنگا نہیں تے تسیں جس طرح اوہناں دا دفاع کر رہے او ایہ کوئی Blind Followerای کر سکدا اے۔ تسیں دوواں خان صاحب دے Blind Follwerاو آزاد میڈیا دے بغیر کسے ملک وچ کیویں کوئی جمہوریت چل سکدی اے یاں کوئی اپنے آپ نوں کیویں جمہوری لیڈر کہلوا سکدا اے؟ ماہم نے ہور آکھیا: پاکستانی میڈیا دا گلہ گھونٹیا جا رہیا اے تے ایہ گل مینوں ہرگز پسند نہیں۔اک پل لئی اوتھے سناٹا جیہا چھا گیا کیوں جے ساڈے ایتھے ایہ تصور نہیں کہ کوئی بچہ ماپے نوں سدھا دس دیوے کہ اوہناں دی سیاسی رائے ٹھیک نہیں یاں جو کجھ اوہ سوچ رہے نیں اوہ حرف آخر نہیں۔ میں حیرانی نال اپنے قریب بیٹھی ماہم نوں ویکھیا۔ اک عجیب جہی خوشی ہوئی کہ امریکہ وچ پورے پندرہ دن گزارن دے بعد تے عمران خان صاحب دے حق وچ بہت ساری لمی چوڑی تقریراں سنن دے بعد کوئی اک کُڑی اجہی ملی جہنوں ایہ فکر سی کہ عمران خان دے دور وچ جس طرح میڈیا دا گلہ گھونٹیا جا رہیا سی ایہ پاکستانی جمہوریت لئی بہت وڈا خطرہ اے۔ ایہ فرق سی ایہناں پاکستانیاں وچ جہڑے پاکستان توں امریکہ جا کے سیٹل ہوئے تے جہناں دے نزدیک میڈیا دی کسے ملک یاں جمہوریت وچ کوئی اہمیت نہیں ہوندی ایس لئی اک سیاسی لیڈر نوں ایہ حق اے کہ اوہ میڈیا نوں کرش کر دیوے اوہدا گلہ دبا دیوے۔ دوجے پاسے امریکہ وچ پیدا ہون والی کُڑی ماہم نے ماپے دے عمران خان دے نال جڑے رومانس نوں اک پاسے رکھ کے سدھی گل کیتی کہ جہڑا لیڈر میڈیا دی قدر نہیں کردا اوہ ایہدے توں متاثر نہیں اے۔ پندرہ دن وچ ایہو سن دا رہیا کہ پاکستان وچ سارا قصور میڈیا دا اے تے ایتھے اک کُڑی نے اک منٹ وچ گل ختم کر دتی سی کہ انھے فالوورز نہ بنن۔ جہڑا لیڈر میڈیا دی آزادی تے یقین نہیں رکھدا اوہنوں سیریس نہیں لیا جا سکدا۔ امریکی جمہوریت دے کلچر تے آزادی نال سوچن دی روایت نے اوتھوں دے پاکستانیاں دی نویں نسل وچ گھٹ توں گھٹ ایہ شعور پیدا کر دتا اے کہ بغیر آزاد میڈیا دے پاکستانی جمہوریت قائم نہیں رہ سکے گی۔ جہڑی گل ماہم سمجھ چکی اے پندرہ دن وچ اک وی پاکستانی نہ ملیا جہڑا ایہ سمجھدا ہووے۔ سب پاکستانی میڈیا توں نالاں نظر آئے تے کلہی ماہم عمران خان دی میڈیا پالیسیاں توں نالاں۔ اوہی ماہم جہڑی عمران خان دے فنکشنز وچ ہوندی سی۔ ایس بچی نوں وی سمجھ اے پر وڈیاں نوں کوں سمجھاوے؟شکریہ ماہم چلو پورے امریکہ وچ کوئی اک تے اجیہا ملیا جہنوں ایہدا پتہ اے کہ جمہوریت نے زندہ رہنا اے تے میڈیا نوں آزاد رہنا ہووے گا تے کوئی تے اے جہڑا اپنی آزاد رائے رکھدا اے۔ کوئی تے اے جہڑا ماپے دے منہ تے کہہ دیوے کہ اوہ ایہناں دی طرح کسے دی Blind Followerنہیں کہ حکومت پاکستان وچ میڈیا تے سوشل میڈیا تے کریک ڈاؤن کردی رہوے تے اوہ تاڑیاں وجاندی رہوے۔

اپنا تبصرہ گھلو