عدالت نے ٹیلی کام کمپنیاں نوں نگرانی لئی فون کال ریکارڈ کرن توں روک دتا

اسلام آباد(بیورورپورٹ)اسلام آباد ہائی کورٹ نے ٹیلی کام کمپنیاں نوں نگرانی لئی فون کال ریکارڈ کرن توں روک دتا۔اسلام آباد ہائی کورٹ دے جسٹس بابر ستار نے سابق وزیر اعظم عمران خان دی گھر والی بشری بی بی تے سابق چیف جسٹس ثاقب نثار دے صاحبزادے نجم الثاقب دی آڈیو لیک دے خلاف درخواست اُتے سماعت کیتی۔سماعت دے شروع اُتے عدالت نے پاکستان ٹیلی کمیونکیشن اتھارٹی (پی ٹی اے) دے وکیل نال استفسار کیتا کہ پی ٹی اے نے جواب جمع نہیں کروایا ؟ وکیل نے دسیا کہ چھٹی پاروں اسیں اپنا جواب داخل نہیں کرواسکے۔بعد وچ ایڈیشنل اٹارنی جنرل منور اقبال دوگل روسٹرم اُتے آگئے۔جسٹس بابر ستار نے دریافت کیتا کہ ایہ دسیا جائے کہ شہریاں دی کالاں کس قنون تحت کون ریکارڈ کردا اے؟ ایس اُتے ایڈیشنل اٹارنی جنرل نے آکھیا کہ سیکشن 54 تحت پی ٹی اے نوں اختیار اے کہ اوہ کالاں ریکارڈ کرسکدا اے۔عدالت نے ہور دریافت کیتا کہ قنون دَسن کس قنون تحت پی ٹی اے نگرانی کر رہیا اے؟ کس سیکشن تحت پی ٹی اے والے سرویلینس کر رہے نیں؟ ایڈیشنل اٹارنی جنرل نے جواب دتا کہ لیگل فریم ورک ذریعے کر رہے، عدالت نے آکھیا کہ جیہڑا وی اے تُسی دسو کہ شہریاں دی کالاں کس قنون تحت ریکارڈ کر رہے او؟ زبانی کلامی نہ دسو باضابطہ طور اُتے دسو، تُسی دَسو تُسی کس نوں اجازت دے رکھی اے؟ کس نے اتھارٹی دتی ہوئی اے کہ لوکاں دی کالاں ریکارڈ کیتیاں جان؟ایس اُتے منور اقبال دوگل نے آکھیا کہ مینوں تھوڑا ویلا دے د یو میری استدعا اے۔ایڈیشنل اٹارنی جنرل دی استدعا اُتے عدالت برہم ہو گئی، جسٹس بابر ستار نے ایڈیشنل اٹارنی جنرل نال مکالمہ کیتا کہ دوگل صاحب ایہ حالت اے اسٹیٹ دی، اک ورھے توں انکوائری چل رہی اے، تُسی اک ورھے وچ ایس نتیجے تک نہیں پہنچے کہ جرم ہویا اے یا نہیںاسلام آباد ہائی کورٹ نے ایڈیشنل اٹارنی جنرل نوں وفاقی حکومت توں ہدایت لین تے عدالتی سوالاں دے جواب جمع کران دی ہدایت کردتی۔بعد وچ عدالت نے آڈیو لیکس کیس وچ وڈھا حکم جاری کر دیاں ہویاں ٹیلی کام کمپنیاں نوں نگرانی لئی فون کال ریکارڈ کرن توں روک دتا تے ریمارکس د تے کہ اگر ٹیلی کام کمپنیاں دا آلہ غیر قنونی سرویلینس لئی استعمال ہویا تے اونہاں اُتے اوس دی ذمہ داری عائد ہوئے گی۔