مخصوص نشستاں دا کیس؛ بلے دے نشان والے فیصلے اُتے لوکاں نوں گمراہ کیتا گیا،سپریم کورٹ

اسلام آباد(بیورورپورٹ)سپریم کورٹ دے جسٹس جمال مندوخیل نے ریمارکس د تے کہ انتخابی نشان واپس ہون دے بعد تاثر دتا گیا کہ سیاسی جماعت ختم تے جنازہ نکل گیا۔چیف جسٹس قاضی فائز عیسی دی سربراہی وچ فل کورٹ نے سنی اتحاد کونسل دی مخصوص نشستاںبارے کیس دی سماعت کیتی۔سنی اتحاد کونسل دے وکیل فیصل صدیقی نے دسیا کہ جنہاں نوں وَدھ نشستاں دتیاں گئیاں اوہ بینفشری نیں، مجموعی طور اُتے77متنازعہ نشستاں نیں، قومی اسمبلی دی 22 تے صوبائی دی 55 نشستاں متنازعہ نیں خیبر پختونخواہ نوں کے پی کے بولن توں روک دتاچیف جسٹس نے فیصل صدیقی نوں خیبر پختونخواہ نوں کے پی کے بولن توں روکدیاں ہویاں آکھیا کہ خیبر پختونخواہ دے لوگ اوس نام نال بلائے جان اُتے بُرامناندے نیں، یا ہوراں صوبیاں لئی وی مخفف استعمال کرن یا اونہاں دا وی پورا ناں لین۔فیصل صدیقی نے دسیا کہ ساڈھے جتن والے امیدواراں نے پارٹی دا سرٹیفکیٹ لایا سی اوس دے باوجود الیکشن کمیشن نے کہہ دتا تُسی آزاد امیدوار او۔جسٹس جمال مندوخیل نے ریمارکس د تے کہ کیا الیکشن کمیشن نوں ایہ اختیار اے کہ اوہ کسی نوں خود آزاد ڈیکلئیر کرد یوے؟ جدوں پارٹی وی کہہ رہی ہوئے ایہ ساڈھا امیدوار اے امیدوار وی پارٹی نوںاپنا آکھے تے الیکشن کمیشن دا اوس دے بعد کیہ اختیار اے؟چیف جسٹس نے پچھیا کہ کیا بینفشری جماعتاں وچوں کوئی عدالت وچ سنی اتحاد کونسل دی حمایت کردی اے؟ساریاں جماعتاں نے سنی اتحاد کونسل دی درخواست دی مخالفت کر دتی۔چیف جسٹس نے آکھیا کہ ایس دا مطلب ہویا کہ تُسی وَدھ ملیاں ہویاں نشستاں رکھنا چا ہندے او۔جسٹس اطہر من اللہ نے وی آکھیا کہ کیا انتخابی نشان واپس ہون نال سیاسی جماعت سارے حقوق توں محروم ہوجا ندی اے؟جسٹس جمال مندوخیل نے ریمارکس د تے کہ کیا انتخابی نشان واپس ہون دے بعد آرٹیکل 17 تحت قائم سیاسی جماعت ختم ہوگئی سی؟ کیا انتخابی نشان واپس ہون اُتے سیاسی جماعت امیدوار کھڑے نہیں کرسکدی؟ تاثر تے ایسا دتا گیا جسطرح سیاسی جماعت ختم ہوگئی تے جنازہ نکل گیا، کیا ایہ اخذ کر سکدے نیںکہ پی ٹی آئی بطور جماعت برقرار سی تے مخصوص نشستاں دی فہرستاں وی جمع کرائیاں سن؟فیصل صدیقی نے جواب دتا کہ پی ٹی آئی نے فہرستاں جمع کرایاں لیکن الیکشن کمیشن نے تسلیم نہیں کیتیاں۔چیف جسٹس نے فیصل صدیقی نوں ججاں دے سوالاں دے جواب دین توں روکدیاں ہویاںآکھیا کہ سوالاں نوں چھڈن اپنے طریقے نال جواب دین۔فیصل صدیقی نے ہسدیاں ہویاں جواب د تا کہ شکر اے ا جے تُسی سوال نہیں پچھے۔ ایس اُتے جسٹس منیب اختر نے آکھیا کہ فل کورٹ وچ بیٹھن دا مزا تے تکلیف ایہی اے۔جسٹس منیب اختر نے استفسار کیتا کہ الیکشن کمیشن دے نوٹیفیکیشن مطابق سنی اتحاد کونسل نے الیکشن وچ کوئی نشست نہیں جتی سی، الیکشن کمیشن دے حکم وچ کوئی منطق نہیں لگدی، الیکشن کمیشن اک پاسے کہندا اے کہ سنی اتحاد الیکشن نہیں لڑی نال ہی پارلیمانی جماعت وی مَن رہیا، اگر پارلیمانی جماعت قرار دین دے پیچھے پی ٹی آئی دی شمولیت اے تے اوہ پہلاں ہوچکی سی۔جسٹس اطہر من اللہ نے آکھیا کہ اگر سنی اتحاد کونسل توں غلطی ہوئی سی تے الیکشن کمیشن تصحیح کر سکدا سی، عوام نوں کَدی وی انتخابی عمل توںوَکھ نہیں کیتا جا سکدا۔جسٹس جمال مندوخیل نے وی آکھیا کہ اگر ایسا ہو جائے تے نشستاں پی ٹی آئی نوں ملن گیاں سنی اتحاد نوں نہیں، عوام نے کسی آزاد نوںنہیں بلکہ سیاسی جماعت دے نامزد افرادنوں ووٹ د تے۔چیف جسٹس نے اک وارفیر فیصل صدیقی نوں ججاں دے سوالاں دے جواب دین توں روکدیاں ہویاں آکھیا کہ تُسی اپنے دلائل نہیں دیوگے تے مینوں کیہ سمجھ آئے گی کہ تہاڈے پاسیوں کیہ لکھنا اے، میرا خیال اے فیصل صدیقی صاحب اسیں تہانوں سُنن بیٹھے ہاں۔ایس اُتے جسٹس منیب اختر نے آکھیا کہ ایہ اک غیرذمہ دارانہ بیان اے، فل کورٹ وچ ہر جج نوں سوال پچھن دااختیار تے حق حاصل اے، ایس قسم دا غیرذمہ دارانہ بیان تسلیم نہیں کیتا جا سکدا۔چیف جسٹس نے آکھیا کہ فیصل صاحب اگے ودھن میں تے ہلکے پھلکے انداز وچ گل کیتی سی ،ایس موقع اُتے جسٹس منصور علی شاہ نے ریمارکس د تے کہ الیکشن کمیشن نے آزاد امیدواراںنوں سنی اتحاد کونسل وچ شمولیت توں نہیں روکیا، کمیشن کہہ سکدا سی ایس جماعت نے تے الیکشن نہیں لڑیا، مگر کمیشن نے اینج نہیں کیتاکہ لوکاں دی سنی اتحاد کونسل وچ شمولیت نوں تسلیم کیتا، جَدوں 3دن دا ویلا لَنگ گیا اوس دے بعد الیکشن کمیشن نے کہہ دتا تہانوں تے مخصوص نشستاں نہیں ملنیاں،ہُن اوہ لوگ کہہ سکدے نیں تُسی شمولیت کروائی ہن میں اپنا حق منگن آیا ہاں الیکشن کمیشن پہلاں شمولیت درست من دااے بعد وچ مخصوص نشستاں وی نہیں دیندا، رکن اسمبلی کہہ سکدا اے کہ پہلاں شمولیت توں روکیا نہیں تے ہُن حق وی دین۔جسٹس جمال مندوخیل نے آکھیا کہ بلے دے نشان والے فیصلے اُتے لوکاں نوں مس گائیڈ کیتا گیا، آزاد امیدوار پی ٹی آئی وچ وی شامل ہو سکدے سن کوئی پابندی نہیں سی۔جسٹس جمال مندوخیل دے ریمارکس دے بعد چیف جسٹس نے فیصل صدیقی توں آکھیا کہ تُسی پی ٹی آئی ولوں نہیں بول سکدے ، میرے قلم نے ادھے گھنٹے توں کجھ نہیں لکھیا، تُسی ادھے گھنٹے توں کجھ وی نہیں لکھوایا۔فیصل صدیقی نے جواباََ آکھیا کہ میں پہلاں حقیقت تہاڈے سامنے رکھ رہیا ہاں، تُسی لکھ لوں کِدھرے قلم سُکھ نہ جائے۔جسٹس منیب اختر نے آکھیا کہ اسیں حقیقت نوں کیوں نہ ویکھیئے، سنی اتحاد کونسل ساڈھے سامنے ایس لئی اے کہ اوس وچ پی ٹی آئی دے جتے لوگ شامل نیں۔جسٹس جمال خان مندوخیل نے آکھیا کہ 6 ڈی فیصلہ کرے گا سیٹیاں سنی اتحاد کونسل نوں مل سکدیا نیں یا نہیں، ایس وچ 2 چیزاں نیں اک پارٹی لسٹ پہلاں توں ہونی چا ہیدی، دُوجی گل اے الیکشن وچ سیٹاں جتنیاں۔فیصل صدیقی نے دلائل د تے کہ قنون مطابق مخصوص نشستاں لئی کسی جماعت دا الیکشن لڑنا ضروری نہیں، آزاد امیدوار وی جماعت وچ شامل ہوجان تے مخصوص نشستاں دتیاں جانیاں نیں، ساہنوں پہلاں بلا لیا گیافیر آکھیا گیا ہُن بیٹنگ کرو۔جسٹس عرفان سعادت نے آکھیا کہ اگر مومن ہوئے تے بے تیغ وی لڑدا اے۔چیف جسٹس پاکستان نے آکھیا کہ سیاسی مسئلے پارلیمان وچ حل ہونے چا ہیئدے، ہر مسئلہ سپریم کورٹ وچ کیوں آندا اے۔جسٹس اطہر من اللہ نے آکھیا کہ ہر دور وچ کوئی نہ کوئی پارٹی زیر عتاب رہی، پیپلزپارٹی توں تلوار دا نشان کھویا گیا، ن لیگ دے نال وی اینج ہی ہویا۔سپریم کورٹ نے سنی اتحاد کونسل دی مخصوص نشستاں بارے کیس دی سماعت کل تک ملتوی کردتی۔واضح رہے کہ سنی اتحاد کونسل نے مخصوص نشستاں لئی پشور ہائیکورٹ دے فیصلے خلاف سپریم کورٹ نال رجوع کیتا اے۔ پچھلی سماعت اُتے سپریم کورٹ دے3 رکنی بینچ نے پشور ہائیکورٹ دے فیصلے نوںوَدھ نشستاں دی حد تک معطل کر دتا سی۔