صنم جاوید نوں ہور کسی مقدمے وچ گرفتارنہ کرن دی درخواست اُتے جواب طلب

لہور(پنجابی میڈیا) لہور ہائیکورٹ نے پی ٹی آئی کارکن صنم جاوید نوں ہور کسی وی مقدمے وچ گرفتارنہ کرن دی درخواست اُتے فریقیاں توں جواب منگ لیا۔لہور ہائیکورٹ دے جسٹس شہباز رضوی نے صنم جاوید دے والد جاوید اقبال دی درخواست اُتے بطور اعتراض سماعت کیتی، درخواست گزار ولوں ایڈووکیٹ ابوذر سلمان نیازی عدالت وچ پیش ہوئے۔وکیل درخواست گزار نے موقف اپنایا کہ صنم جاوید پچھلے 400 دناں توں گرفتار اے، جس اُتے جسٹس شہباز رضوی نے استفسار کیتا کہ درخواست صنم جاوید ولوں بذات خود کیوں نہیں دائر کیتی گئی؟ایڈووکیٹ ابوذر سلمان نیازی نے آکھیا کہ ایہ اینہا آسان کم نہیں اے ، صنم جاوید زیر حراست نیں، اونہاں دی قید دی جگہ تبدیل ہندی رہندی اے، کَدی سرگودھا وچ تے کَدی میانوالی وچ قید رکھیا جاندا اے۔بعد وچ عدالت عالیہ نے صنم جاوید نوں ہور کسی وی مقدمے وچ گرفتار کرن توں روکن دی درخواست اُتے ملزمہ دی نظر بندی دا آرڈر فراہم کرن دی ہدایت کردتی تے صنم جاوید تک رسائی نہ ہون اُتے فریقیاں توں جواب منگدیاں ہو یاں سماعت کل تک ملتوی کردتی۔