سرکار نے کورونا دے خلاف جنگ وچ ہتھیار سُٹ دتے: شہباز شریف

لہور: مسلم لیگ (ن) دے صدر تے قائد حزب اختلاف شہباز شریف دا کہنا اے بجٹ اعداد و شمار ظاہر کردے نیں سرکار نے کورونا دے خلاف جنگ وچ ہتھیار سُٹ دتے نیں۔ شہباز شریف نے اگلے مالی ورھے دے بجٹ وچ غریباں لئی کوئی ریلیف نہ ہون تے سبسڈیز وچ کٹوتی دی مذمت کردیاں آکھیا اے لاک ڈاؤن نہ کرن دی کنفیوژ پالیسی توں غیر موثر لاک ڈاؤن تک سرکار وباء دے پھیلاؤ نوں روکن وچ نکام رہی۔ بجٹ اعداد و شمار ظاہر کردے نیں سرکار نے کورونا دے خلاف جنگ وچ ہتھیار سُٹ دتے نیں، ایم ڈی ایم اے لئی وسائل 25ارب توں گھٹ کرکے 5ارب کر دتے گئے نیں، سرکار نے طے کر لیا اے عوام تے کورونا آپ ای اک دوجے نال نبڑ لین۔ اپوزیشن لیڈر دا کہنا سی سرکار دے کول وڈی کمپنیاں لئی ارباں روپے سن پر غریباں نوں دین لئی کجھ نہیں، بجٹ وچ سرکار نے کورونا نال لڑدیاں غریباں لئی کوئی پیسہ نہیں رکھیا۔ سرکار نے مزدوراں دی مدد دی مد وچ 75ارب دے بجٹ وچ کمی کر دتی اے۔ یوٹیلیٹی سٹوراں لئی سبسڈی 10ارب توں گھٹ کرکے اگلے ورھے لئی صفر کر دتی گئی اے۔ بجلی صارفین دی مدد لئی 10ارب روپے دی رقم وی بجٹ وچ صفر کر دتی گئی۔