کراچی سنے دیس دے وکھو وکھ علاقیاں وچ دو ہفتے دا مکمل لاک ڈاؤن

کراچی: کمشنر کراچی نے شہر دی وکھو وکھ یونین کونسل وچ سخت لاک ڈاؤن لاؤن دے احکامات جاری کر دتے ۔ لاک ڈاؤن 18جون توں 2جولائی تک ہووے گا۔ جاری نوٹیفکیشن دے مطابق کمشنر کراچی نے شہر دی وکھو وکھ یونین کونسل وچ سخت لاک ڈاؤن لاؤن دے احکامات جاری کر دتے، لاک ڈاؤن 18جون توں 2جولائی تک جاری رہوے گا۔ ڈپٹی کمشنر نے محکمہ صحت دی سفارش تے لاک ڈاؤن لاؤن دی تجویز دتی سی۔ لاک ڈاؤن دا نفاذ شہر دی 41یوسیز دے وکھو وکھ ہاٹ سپاٹس تے ہووے گا، ضلع کورنگی تے جنوبی دی پنج ، پنج یوسیز وچ، ضلع شرقی دی 17، غربی دی 6یونین کونسلاں وچ، ضلع ملیر دی 6، ضلع وسطی دی دو یونین کونسلاں دے ہاٹ سپاٹس تے لاک ڈاؤن ہووے گا۔ لاک ڈاؤن والے مقامات تے ماسک دا استعمال لازمی ہووے گا۔ نوٹیفکیشن دے مطابق حساس تھاواں تے کریانہ تے میڈیکل سٹورز کھلے رہن گے، جد کہ لاک ڈاؤن والے علاقے وچ ہر طرح دے صنعتی یونٹس بند رہن گے تے ہر قسم دی کاروباری سرگرمیاں وی ممنوع ہون گیاں۔دوجے پاسے راولپنڈی وچ وی 22علاقے ہاٹ سپاٹ ڈکلیئر کرکے مکمل لاک ڈاؤن نافذ کر دتا گیا۔ محکمہ داخلہ پنجاب نے باقاعدہ نوٹیفکیشن جاری کر دتا جہدا اطلاق 30جون تک رہوے گا۔ حساس علاقیاں وچ راول ٹاؤن دی 7یونین کونسلاں دے 15علاقیاں سنے کینٹ دے 7علاقے شامل نیں۔ نوٹیفکیشن دے مطابق ہاٹ سپاٹ ڈکلیئر کرکے سیل کیتے جان والے علاقیاں وچ سارے نجی و سرکاری دفاتر شاپنگ مالز و کاروباری مراکز بند رہن گے۔ دارالحکومت اسلام آباد آئی ایٹ تھری، فور تے مرکز جد کہ آئی ٹین ون ٹو تے مرکز وچ وی مکمل لاک ڈاؤن دا دوجا دن اے۔ جی نائن تھری تے فور وچ پہلاں ای لاک ڈاؤن جاری اے جد کہ غوری ٹاؤن، لوہی بھیر، جی سیون ٹو تے پی ڈبلیو ڈی نوں لاک ڈاؤن کرن تے غور کیتا جا رہیا اے۔

اپنا تبصرہ گھلو