کراچی: احساس پروگرام دے دفتر اُتے بم حملہ

لیاقت آباد وچ احساس پروگرام دے دفتر تے دستی بمب حملے وچ اک بندہ جاں بحق تے 8زخمی ہوگئے۔ کراچی دے علاقے لیاقت آباد وچ نامعلوم موٹرسائیکل سوار احساس پروگرام دے دفتر دے نیڑے دستی بمب سُٹ کے فرار ہو گئے جہدے نتیجے وچ 9بندے زخمی ہوئے جہناں نوں فوری طور تے عباسی شہید ہسپتال منتقل کر دتا گیا جد کہ اک بندہ جاں بحق ہو گیا۔ حملے دے فوری بعد قنون نافذ کرن والے ادارے وقوعہ تے اپڑ گئے تے علاقے نوں ٹریفک لئی بند کر دتا جد کہ پلس تے رینجرز حکام جائے وقوعہ توں شواہد اکٹھے کر رہے نیں۔ ریسکیو ذرائع دے مطابق دستی بمب حملے وچ زخمی ہون والیاں وچ سلیم، روشن علی، ذیشان، فیضان تے صابر شامل نیں۔ دوجے پاسے گورنر سندھ عمران اسماعیل نے لیاقت آباد وچ احساس سنٹر تے حملے دا سخت نوٹس لیندیاں آئی جی سندھ توں تفصیلی رپورٹ طلب کر لئی۔