اسلام آباد ہائیکورٹ: شوگر انکوائری کمیشن رپورٹ تے حکم امتناع وچ 1دن دا وادھا

اسلام آباد: اسلام آباد ہائی کورٹ نے شوگر انکوائری کمیشن رپورٹ تے حکم امتناع وچ اک دن دا وادھا کردتا۔ چیف جسٹس اطہر من اللہ نے ریمارکس دتے سرکار کول اختیار اے کہ اوہ نیب نوں شکایت گھل سکدی اے۔ شوگر ملز ایسوسی ایشن دے وکیل مخدوم علی خان نے اپنے دلائل وچ آکھیا تن اہم نوعیت دے سوال نیں؟ جہناں دا عدالت نے جائزہ لینا اے، انکوائری کیہنے تے کیویں کیتی؟ کیہ انکوائری کمیشن آزاد تے غیر جانبدار سی؟ کمیشن نے پہلاں توں کوئی مخصوص نتیجہ کڈھن دی سوچ نال کم تے نہیں کیتا؟ وزیراعظم دے معاونین پریس کانفرنساں وچ سانوں مافیا کہہ رہے نیں۔ چیف جسٹس نے استفسار کیتا حکومتی فیکٹ فائنڈنگ کمیشن توں شوگر ملز کیویں متاثر ہو رہیاں نیں؟ فرض کرو انکوائری کمیشن نہ وی بنایا جاندا حکومت فیر وی ایف آئی اے تے نیب نوں معاملہ گھل سکدی سی، کمیشن اجیہا بنایا جاندا جہدے تے کوئی اعتراض نہ ہوندا، جہڑے اداریاں دے کول ایہ معاملہ گھلیا جانا اے تسیں اوہناں نوں کمیشن وچ شامل کر لیا۔ شوگر ملز ایسوسی ایشن دے وکیل سلمان اکرم راجہ نے دلائل وچ آکھیا پورے عمل وچ آئین و قنون نوں بری طرح پامال کیتا گیا، شوگر انکوائری رپورٹ نوں کاغذ دا اک ٹکڑا قرار دے کے رپورٹ نوں کالعدم قرار دین دی استدعا کر دتی۔ دلائل پورے ہون تے چیف جسٹس اطہر من اللہ نے ریمارکس دتے کہ عدالت سرکار نوں اپنا اختیار استعمال کرن توں روک نہیں سکدی، کاشتکاراں دے وکیل متعلقہ عدالتاں نال رجوع کرن۔ اٹارنی جنرل خالد جاوید خان ہفتے نوں اپنا موقف پیش کرن گے۔

اپنا تبصرہ گھلو