سرگودھا: ہور 2ڈاکٹرز کورونا وائرس نال انتقال کر گئے

سرگودھا وچ کورونا وائرس وچ مبتلا 2ڈاکٹرز انتقال کر گئے جہدے بعد ضلع بھر وچ ہن تک کورونا نال جاں بحق ہون والے ڈاکٹراں دی تعداد 4ہو گئی اے۔ تحصیل ہیڈ کوارٹر ہسپتال سلانوالی دے سابق میڈیکل سپرنٹنڈنٹ ڈاکٹر منور علی تے نجی میڈیکل کالج دے ڈاکٹر ارشاد نبی کورونا وائرس دی وجہ توں انتقال کر گئے۔ پاکستان میڈیکل ایسوسی ایشن (پی ایم اے) دے تعزیتی اجلاس وچ کورونا وائرس نال جاں بحق ہون والے ڈاکٹراں نوں خراج تحسین پیش کیتا گیا۔ ایس توں علاوہ کورونا وائرس وچ مبتلا ڈاکٹراں تے پیرا میڈکس سٹاف دی جلد صحت یابی لئی دعا کیتی گئی۔ ضلع وچ 12ڈاکٹراں سنے محکمہ صحت دے 39اہلکار کورونا وائرس وچ مبتلا نیں۔واضح رہوے پاکستان وچ کورونا وائرس دے کیساں وچ تیزی نال وادھا ہو رہیا اے جہدے وچ فرنٹ لائن تے کم کرن والے ڈاکٹراں تے پیرا میڈکس سٹاف دی وی بڑی تعداد شامل اے۔