جعلی کرنسی تے گرفتار بھارتی ہائی کمیشن دے دو اہلکاراں نوں واپس گھل دتا گیا

لہور: اسلام آباد وچ ٹریفک حادثہ تے جعلی کرنسی وچ ملوث بھارتی ہائی کمیشن دے دو اہلکاراں نوں پاکستان توں واپس گھل دتا گیا۔ دوواں اہلکار واہگہ بارڈر دے راستے واپس انڈیا چلے گئے نیں جد کہ ایہناں دے نال بھارتی سفارتخانے دے سیکنڈ سیکرٹری تے ایئر ایڈوائزر وی واپس انڈیا گئے نیں جہناں نوں موجودہ پاک بھارت تناؤ بارے مشاورت لئی نئی دہلی وچ طلب کیتا گیا اے۔ بھارتی سفارتخانے دے دو اہلکاراں سلوادیس پال تے دواموبراہموس نوں اسلام پلس نے پچھلے ہفتے گرفتار کیتا سی پر کجھ گھنٹیاں بعد اوہنوں رہائی مل گئی سی۔ ایہناں اہلکاراں نوں دوران سفر اک شہری نوں گڈی دی ٹکر نال زخمی کرکے فرار ہون تے جعلی کرنسی دے الزام وچ گر فتار کیتا گیا سی۔ بھارتی سفارتخانے دے اہلکاراں دی تلاشی دے دوران 10ہزار روپے دی جعلی کرنسی برآمد ہوئی سی جہدے تے ایہناں نوں ناپسندیدہ قرار دے کے پاکستان چھڈن دا آکھیا گیا سی۔ سفارتی ذرائع دے مطابق دوواں سینئر آفیشلز کیپٹن مانو میڈھا تے شیو کمار نوں موجودہ پاک بھارت تناؤ دے حوالے نال مشاورت لئی نئی دہلی وچ طلب کیتا گیا اے تے اوہ کجھ دن وچ واپس آ جان گے۔