وزیرستان وچ شہید ہون والے کیپٹن صبیح ابرار پورے فوجی اعزاز دے نال سپرد خاک

راولپنڈی: وزیرستان وچ امن دشمناں نال جھڑپ دے دوران مادر وطن تے جان قربان کرن والے پاک فوج دے کیپٹن صبیح ابرار پورے فوجی اعزاز دے نال سپرد خاک کر دتے گئے۔ کیپٹن صبیح ابرار نوں راولپنڈی دی تحصیل کہوٹہ وچ آبائی پنڈ پنیالی وچ سپرد خاک کیتا گیا، شہید دی نماز جنازہ وچ اعلیٰ فوجی و سول افسراں سنے اہل علاقہ نے رلت کیتی، پاک فوج دے چاک و چوبند دستے نے گارڈ آف آنر پیش کیتا تے پھلاں دی چادر چڑھائی۔ پاک فوج ولوں کیپٹن صبیح ابرار دے والدین نوں قومی جھنڈا تے شہید دی وردی پیش کیتی گئی۔پچھلے دیہاڑ وزیرستان دے علاقہ گہرون دے لاگے سرحدی علاقہ وچ پٹرولنگ دے دوران ات گرداں نے حملہ کیتا، فائرنگ دے تبادلے وچ اک دہشت گرد ماریا گیا جد کہ امن دشمناں نال لڑدیاں ہوئیاں کیپٹن صبیح ابرار تے سپاہی نوید احمد ستی وطن تے قربان ہو گئے۔