عثمان بزدار نال پرویز الٰہی دی ملاقات، اتحادی حکومت دے معاملات تے مشاورت

لہور: وزیراعلیٰ پنجاب عثمان بزدار نال سپیکر پنجاب اسمبلی پرویز الٰہی نے ملاقات کیتی جہدے وچ اتحادی حکومت دے معاملیاں تے مشاورت تے باہمی تعلقات ہور بہتر بنان تے گل بات ہوئی۔ وزیراعلیٰ پنجاب تے سپیکر پنجاب اسمبلی وچکار ملاقات وچ بجٹ سیشن، موجودہ سیاسی صورتحال تے فلاح عامہ دے پروگرام تے تبادلہ خیال کیتا گیا، کورونا وباء دا کھلار روکن لئی اقدامات تے وی گل بات ہوئی۔ چودھری پرویز الٰہی نے ریلیف بجٹ پیش کرن تے سردار عثمان بزدار نوں مبارکباد دتی۔ وزیراعلیٰ عثمان بزدار نے بجٹ سیشن احسن طریقے نال چلان تے چودھری پرویز الٰہی دی کاوشاں نوں سراہیا۔ وزیراعلیٰ تے سپیکر پنجاب اسمبلی نے عوام دی خدمت لئی رل کے کم کرن دے عزم دا اعادہ کیتا تے بہترین ورکنگ ریلیشن شپ تے اطمینان دا اظہار کیتا۔ وزیراعلیٰ عثمان بزدار آکھیا دوواں اتحادی جماعتاں آئندہ وی نال رہن گیاں۔ اتحادی مضبوط تر ہووے گا۔ چودھری پرویز الٰہی آکھیا وزیراعلیٰ عثمان بزدار دے نال آں تے رہواں گے۔ لوکائی دی خدمت دے سفر وچ تحریک انصاف دے شانہ بشانہ کھڑے آں، اسیں صرف خدمت خلق تے یقین رکھنے آں۔ صوبے دے عوام نوں ریلیف دی فراہمی لئی رل کے کم کردے رہواں گے۔