لہور وچ کورونا توں متاثرہ ہور8علاقے مکمل بند کرن تے اتفاق

لہور: پنجاب حکومت نے کورونا کیسز پھیلن پاروں سمارٹ لاک ڈاؤن سخت کرکے ہور 8علاقیاں نوں بند کرن دا فیصلہ کیتا اے جہناں وچ گلبرگ، ڈی ایچ اے، گلشن راوی، فیصل ٹاؤن، گارڈن ٹاؤن تے اندرون شہر شامل نیں۔ ذرائع کمشنر آفس دے مطابق پنج دن پہلاں شہر دے 21علاقیاں دی 61گلیاں تے بلاکس نوں بند کیت اگیا، ہن 8ہور علاقیاں وچ مکمل لاک ڈاؤن کرن دا باقاعدہ فیصلہ کر لیا گیا اے۔ ایہناں وچ 3ہزار 613مریض رپورٹ ہوئے نیں۔ کمشنر آفس ذرائع نے ہور دسیا مجوزہ علاقیاں نوں بند کرکے داخلی و خارجی راہواں تے سخت پہرہ دتا جائے گا، ایس او پیز تے عملدرآمد لئی دفعہ 144نوں نافذ کر دتا گیا اے۔ پوش علاقیاں نوں بند کرن دا باقاعدہ فیصلہ کیبنٹ کمیٹی نال مشروط ہووے گا، ڈی ایچ اے وچ 1403مریض رپورٹ ہوئے نیں جہدے بعد 22ہزار 405 گھر، 44ہزار 810خاندان، 2لکھ 16ہزار آبادی نوں لاک ڈاؤن کیتا جائے گا۔گلبرگ ون، ٹو تے تھری دے سارے بلاکس وچ لاک ڈاؤن کیتا جائے گا، پورے علاقے توں کورونا دے 736کنفرم کیسز رپورٹ ہوئے نیں۔ ماڈل ٹاؤن وچ659کنفرم کورونا وائرس دے کیسز رپورٹ ہوئے۔ فیصل ٹاؤن وچ 188کنفر، کیسز، گارڈن ٹاؤن توں 238، گلشن راوی وچ 212، والڈ سٹی وچ 170مریض کنفرم ہوئے نیں۔اندرون شہر دی اکبری منڈی تے شاہ عالم مارکیٹ کھلی رہوے گی، جوہر ٹاؤن دے علاقیاں وچ ایس او پیز تے عملدرآمد کران تے اتفاق کیتا گیا اے۔ مکمل لاک ڈاؤن ہون والے علاقیاں وچ شاپنگ مالز تے مارکیٹاں بند رہن گیاں۔