وزیر خارجہ دا اپنے سعودی ہم منصب نال ٹیلیفونک رابطہ، دوطرفہ تعلقات تے تبادلہ خیال

اسلام آباد: وزیر خارجہ شاہ محمود قریشی نے سعودی وزیر خارجہ شہزادہ فیصل بن فرحان آل سعود نال ٹیلیفونک رابطہ کیتا۔ دوواں وزرائے خارجہ وچکار کورونا وبائی صورتحال، دوطرفہ تعلقات تے مقبوضہ جموں و کشمیر وچ جاری انسانی حقوق دی خلاف ورزیاں سنے باہمی دلچسپی دے امور تے تبادلہ خیال کیتا۔ ایس موقع تے وزیر خارجہ آکھیا پاکستان تے سعودی عرب وچکار گہرے تریخی، مذہبی، ثقافتی تے کثیر الجہتی تعلقات نیں، دوواں ملکاں وچکار کئی شعبیاں وچ، سٹرٹیجک شراکت داری وچ وادھا خوش آئند اے۔ وزیر خارجہ نے سعودی عرب وچ کورونا وباء پاروں ہون والے جانی نقصان تے گہرے دکھ تے افسوس دا اظہار کردیاں سعودی سرکار ولوں ایس وباء دے کھلار نوں روکن لئی کیتے گئے ویلے سر اقدامات دی تعریف کیتی، پاکستان اپنے محدود وسائل دے باوجود، ایس وباء دے کھلار نوں روکن تے معاشی بحران نال نبڑن لئی سارے ممکنہ اقدام کر رہیا اے۔وزیر خارجہ نے اپنے سعودی ہم منصب نوں بھارتی قابض فورسز ولوں مقبوضہ جموں و کشمیر وچ جاری انسانی حقوق دی مسلسل خلاف ورزیاں توں آگاہ کردیاں آکھیا نہتے کشمیری کورونا وباء دی وجہ توں دوہرا لاک ڈاؤن برداشت کر رہے نیں، بھارت مقبوضہ جموں و کشمیر وچ ڈومیسائل قواعد وچ تبدیلی دے راہیں مقبوضہ علاقے وچ علاقائی تناسب تبدیل کرن دے در اُتے اے جو کہ بین الاقوامی قوانین تے اقوام متحدہ سکیورٹی کونسل دی قرارداداں دی صریحاً خلاف ورزی اے۔