پی ٹی آئی سرکارکول 6مہینے نیں،کجھ نہ کیتا تے ویلا ہتھوں نکل جائے گا: فواد چودھری

اسلام آباد: وفاقی وزیر سائنس و ٹیکنالوجی فواد چودھری آکھیا اے پی ٹی آئی حکومت دے کول چھ مہینے نیں تے وزیراعظم عمران خان نے کابینہ توں آکھیا اے چھ مہینے وچ کارکردگی نہ وکھائی تے معاملات دوجے پاسے چلے جان گے۔ امریکی نشریاتی ادارے وائس آف امریکا نوں دتے گئے انٹرویو وچ فواد چودھری آکھیا پی ٹی آئی دی حکومت تے وزیراعظم عمران خان توں بہت زیادہ توقعات وابستہ کیتی گئیاں۔ ایہ توقعات نٹ بولٹ ٹھیک کرن لئی نہیں سگوں پورے نظام دی اصلاح لئی سن۔ ایس لئی ایس سرکار دی کارکردگی نوں جانچن لئی پیمانہ وی دوجیاں توں وکھرا اے۔ ساڈی اپنی کوتاہیاں نیں کہ ڈیلیور نہیں کر سکے۔ حکومت دو چیزاں تے چلدی اے۔ اک سیاست تے دوجی گورننس اُتے۔ ایہناں دوواں وچ توازن قائم نہ رہوے تے معاملات کسے وی ویلے قابو توں باہر نکل جاندے نیں۔ عمران خان نوں ایس گل دا پورا احساس اے۔ اوہناں نے کابینہ اجلاس وچ وی آکھیا تہاڈے کول چھ مہینے نیں، کم کرن لئی۔ ایہدے بعد ویلا تہاڈے ہتھ توں نکل جائے گا تے معاملات دوجے پاسے چلے جان گے۔ فواد چودھری آکھیا اطلاعات دی وزارت توں ہٹان دے بعد میں آکھیا مینوں وزارت نہیں چاہیدی، صرف ایم این اے رہن دیو پر زلفی بخاری آکھیا وزیراعظم چاہندے نیں کہ تسیں دوجی وزارت لوو، اوہناں نے کئی وزارتاں دے ناں لئے تے میں سائنس و ٹیکنالوجی لے لئی۔ تن مہینے وچ مینوں اندازہ ہویا کسے وزارت وچ بہت زیادہ کم کرن دی گنجائش اے تے اوہ ایہ وزارت اے۔