کورونانال لوک مر رہے نیں تے وزیراعظم ہر دن نواں عذر تراش رہے نیں: شہباز شریف

لہور: مسلم لیگ (ن) دے صدر شہباز شریف دا کہنا اے کورونا توں موتاں تے مریضاں دی تعداد وچ ہوشربا وادھا جاری اے جد کہ وزیراعظم ہر دن اک نواں عذر تراش رہے نیں۔ وزیراعظم عمران خان دے کورونا دے حوالے نال بیان تے ردعمل دا اظہار کردیاں پارلیمنٹ وچ قائد حزب اختلاف شہباز شریف دا کہنا سی وزیراعظم دا کنفیوژن تے مبنی بیان اوہناں دے مسلسل حالات انکار وچ ہون دا ثبوت اے، وزراء ملک وچ کورونا توں موتاں تے مریضاں دی ودھدی تعداد دے اعلان کر رہے نیں جد کہ عمران خان ایہدے الٹ بیانات دے رہے نیں۔ شہباز شریف دا کہنا سی وفاقی سطح تے ایہو اوہ کنفیوژن اے جہدی قیمت عوام اپنی جان توں ادا کر رہے نیں، اسیں ایس کنفیوژن، افراتفری دی کئی وار نشاندہی کیتی، کورونا دے خلاف سانجھی حکمت عملی دا تقاضا کیتا، کورونا توں موتاں تے مریضاں دی تعداد وچ ہوشربا وادھا جاری اے جد کہ وزیراعظم ہر دن اک نواں عذر تراش رہے نیں۔قائد حزب اختلاف آکھیا وزیراعظم نوں این سی او سی دے اجلاس وچ بلا کے بریفنگ دتی جائے، وفاق تے صوبے رل کے مشترک حکمت عملی اپنان، جون دے آخر تے جولائی وچ کورونا دے بلند ترین سطح تے ہون دی اطلاعواں نوں سنجیدہ لیا جائے، مشترکہ مفادات تے این سی او سی اجلاس وچ ٹھوس فیصلے کیتے جان۔